ტელეკომპანია "მაესტროს" გარშემო ატეხილი აჟიოტაჟი ნელ-ნელა ცხრება - არხის დამფუძნებლებმა, მაკა ასათიანმა და გია გაჩეჩილაძემ რამდენიმე საკითხზე შეთანხმება მოახერხეს და მოლაპარაკებებს აგრძელებენ. მანამდე კი არხის თანამშრომლები ლევან გაჩეჩილაძის სახელზე დაწერილი განცხადების ანულირებას ითხოვენ.

ექსპრეზიდენტი მიხეილ სააკაშვილი "ერთიან ნაციონალურ მოძრაობას" ურჩევს, საარჩევნო სიის 50 პროცენტი ქალი კანდიდატებით დააკომპლექტოს. ამის შესახებ ოდესის გუბერნატორი სოციალურ ქსელში საკუთარ გვერდზე წერს. მისი თქმით, ამით ქართულ საზოგადოებაში ქალების როლს ხაზი გაესმება და არჩევნებში გამარჯვება "გარდაუვალი გახდება".

პარტია "თავისუფალი საქართველოს" თავმჯდომარე კახა კუკავა ფიქრობს, რომ ქორწინებასთან დაკავშირებით კონსტიტუციაში განსახორციელებელ ცვლილებაზე დავა წინასარჩევნო კამპანიის ნაწილია, რომელიც ხელისუფლებამ ამომრჩევლის გულის მოგების მიზნით შეიმუშავა.

"ჩვენ თვითონ უნდა ჩამოვყალიბდეთ, ან სერიოზულად ვაპირებთ რუსეთთან ნორმალიზაციის პროცესის ახალ სიმაღლეზე აყვანას, ან ვაგრძელებთ ძველ კურსს ღია კონფრონტაციაზე," - აცხადებს პოლიტოლოგი სოსო ცინცაძე, რომელსაც "რეზონანსი" რუსეთ-საქართველოს სამომავლო ურთიერთობებზე ესაუბრა.

სავალუტო ჯიხურებში ლარზე მოთხოვნა გაიზარდა. ეროვნული ვალუტის გამყარების გამო ხალხი, ვისაც დანაზოგი აქვს, მასობრივად ცდილობს დოლარის გადახურდავებას. ვალუტის გადამცვლელ პუნქტებში ამბობენ, რომ ბაზარზე პანიკამ რამდენიმე დღე გასტანა, მაგრამ მოსახლეობა ახლაც გაურკვევლობაშია.

ახალმა საპენსიო რეფორმამ და დაგროვებითი საპენსიო სისტემის შესაძლო ამოქმედებამ ხალხში გაუგებრობა გამოიწვია. რესპონდენტების ნაწილი ცვლილებას სკეპტიკურად უყურებს და ფიქრობს, რომ ახალი მოდელი მათ ფინანსურად დააზარალებს. ბევრს ისიც ვერ გაუგია, თუ რას ნიშნავს დაგროვებითი საპენსიო სისტემა და როგორ მოხდება მისი დანერგვა.

ქართული ადგილწარმოშობის ღვინოები მსოფლიოს სხვადასხვა ბაზარზე სახეცვლილი დასახელებით მაინც იყიდება. სომელიეთა ასოციაციაში ამბობენ, რომ არის შემთხვევები, როდესაც "ხვანჭკარის" ნაცვლად "ხვანჭკარაულს" არქმევენ, "ქინძმარაულის" მაგიერ "ქინძმარს" და ა.შ. რაც შეეხება ქართული ყურძნის ჯიშებს, როგორებიცაა რქაწითელი და საფერავი, ღვინოსთვის ამ სახელის დარქმევა ყველა იმ მწარმოებელს შეუძლია, ვინც ღვინოს სწორედ ამ ჯიშისგან ამზადებს.

უცხოური მედიასაშუალებების მიერ გავრცელებული ცნობით, ერაყელმა სამხედროებმა, ერაყის ტერიტორიაზე ტერორისტული დაჯგუფება "ისლამური სახელმწიფოს" ერთ-ერთი საველე მეთაურის, თარხან ბათირაშვილის, იმავე აბუ ომარ ალ-შიშანის გვამი იპოვეს.

სტივენ ჯერარდმა "ტელეგრამთან" ინტერვიუში აღნიშნა, რომ მას ძალიან ენატრება "ლივერპული", მაგრამ ახლა მაქსიმალურად ცდილობს ლოს-ანჯელესზე გადაიტანოს ყურადღება.

სსიპ "ტექნოლოგიური განვითარების ფონდის" სასწავლო ცენტრში ჩატარდა პროექტის "თბილისის მერიის მოხელეებისთვის კომპიუტერისა და ბიზნეს-ტექნიკური ინგლისური ენის სწავლება" მოდულის "GIS ArcMap, ArcCatalog, ArcReader-აპლიკაციები" მონაწილეთა შესარჩევი ტესტირება.

რეგიონის მასშტაბით პური ყველაზე ძვირი სომხეთშია, იქ ერთი კილოგრამის ღირებულება 2-2,2 ლარს შეადგენს, ყველაზე იაფი კი აზერბაიჯანში, სადაც კილოგრამი 0,9 ლარად იყიდება. ქართულ ბაზარზე კი ერთი კილოგრამი პური 1,7-1,8 ლარი ღირს. მეხორბლეთა ასოციაციაში ამბობენ, რომ ქვეყანაში პურის გაიაფების რესურსი არსებობს და ამის არგუმენტად ფქვილზე შემცირებული ფასი მოჰყავთ. მეპურეები კი მეხორბლეების პოზიციას არ იზიარებენ და აცხადებენ, პურის გაიაფება შეუძლებელია.

მსოფლიოში ძვირი დოლარის 2-წლიანი ეპოქა დამთავრდა. რამდენიმე კვირაა ამერიკული ფული სხვა ვალუტების მიმართ პოზიციებს ყოველდღიურად თმობს. დოლარის შესუსტების ერთ-ერთი მიზეზი ფედერალური სისტემის გადაწყვეტილება გახდა, რომლის მიხედვითაც საბაზისო საპროცენტო განაკვეთი ისევ 0,25-0,5%-ზე დარჩა. სპეციალისტები 2016 წელს დოლარის კიდევ უფრო დასუსტებას ელოდებიან, ვინაიდან კატასტროფულად გამყარებული "მწვანე ვალუტა" უკვე ამერიკასაც არ აძლევს ხელს.