ბორჯომის ტყეში გაჩენილი ხანძრის შედეგად უკვე 12 ჰექტარზე მეტია დამწვარი. გუშინ გავრცელდა საგანგაშო ცნობა, რომ ტყეს ცეცხლი ატენის ხეობაშიც გაუჩნდა. მთავრობამ ტექნიკა და ადამიანები ატენშიც გადაისროლა. გუშინ გვიან ღამის მონაცემებით, ხანძარი კვლავ მძვინვარებდა, თუმცა პრემიერი კვირიკაშვილი, რომელიც სტიქიასთან ბრძოლის შტაბს ხელმძღვანელობს, აცხადებს, რომ მოსახლეობას საფრთხე არ ემუქრება;

თვითმმართველობის არჩევნები 21 ოქტომბერს გაიმართება - შესაბამის აქტს პრეზიდენტმა გიორგი მარგველაშვილმა ხელი უკვე მოაწერა. აქედან გამომდინარე, დღეიდან წინასაარჩევნო კამპანიაც სტარტს აიღებს, თუმცა ეს მხოლოდ ოფიციალურად, არაოფიციალურად კი უკვე ერთ თვეზე მეტია, რაც პარტიები კარდაკარ მოსახლეობას ხვდებიან და მეტ-ნაკლებად აქტიურ კამპანიას წარმართავენ.

საკონსტიტუციო ცვლილებებთან დაკავშირებით ოპოზიციისა და ხელისუფლების შეხვედრის მეორე რაუნდი, შესაძლოა, ამ კვირაში ვეღარ შედგეს. ყოველ შემთხვევაში, საპარლამენტო უმრავლესობაში აცხადებენ, რომ სხვა პრობლემები აქვთ, რომელთაც უნდა მიხედონ. ოპოზიცია კი თარიღის დანიშვნას კვლავ "ოცნებისგან" ელოდება, რადგან საკუთარი მოსაზრებები დაპირებისამებრ პარასკევ საღამოსვე გაუგზავნეს და ახლა უმრავლესობის პოზიციას ელოდებიან.

"მითხარით იმ მერის მდგომარეობა, რომელმაც ვერ შეძლო მისი წინამორბედის მიერ ჰარი-ჰარალედ გაცემული ნებართვების გაუქმება. იმის ბერკეტიც კი არ ჰქონდა, მერიაში მოკალათებული "ნაცმოძრაობის" ძველი კადრები ახალგაზრდა, საღად მოაზროვნე კადრებით ჩაენაცვლებინა," - ამბობს მწერალი რევაზ მიშველაძე, რომელსაც "რეზონანსი" მოახლოებულ თვითმმართველობის არჩევნებთან დაკავშირებით ესაუბრა.

"დღეს საქართველოში ეროვნული გადარჩენისა და განვითარების პროგრამით შეიარაღებული ოპოზიციური პარტია არ გვყავს. ესენი ფაფხურობენ რაღაცას იმისთვის, რომ ხელისუფლებაში მოვიდნენ," - აცხადებს პოლიტოლოგი იგორ კვესელავა.

"ბავშვთა სამყაროს" დაზარალებულ მოვაჭრეებს ბანკების მიერ დაწესებული საშეღავათო პერიოდის ვადა ეწურებათ. საბოლოოდ აღმოჩნდა, რომ მოვაჭრეების დასახმარებლად "გაღებული მოწყალებით" კმაყოფილი მხოლოდ საბანკო სექტორია. რისი მოლოდინიც დაზარალებულებს ჰქონდათ, არ გამართლდა და საპროცენტო განაკვეთის შემცირების ნაცვლად, მათ ხარჯი კიდევ უფრო გაეზარდათ.

სტუდენტთა ნაწილი სწავლას ფინანსური პრობლემის გამო ვერ აგრძელებს. უმაღლესი სასწავლებლების სხვადასხვა კურსზე მყოფი სტუდენტები გადასახადის გადახდას მუშაობით ცდილობენ. მათგან ბევრი, ვისაც წელს ფასიან სექტორში ჩარიცხვის მოლოდინი აქვს, ამ პრობლემასთან გამკლავებას თბილისის მერიისა და მუნიციპალიტეტების დახმარებით შეეცდება.

ცხინვალის ოსებსა და ქართველებს შორის სავაჭრო ურთიერთობა ჯერ კიდევ აქტიურია. მიუხედავად იმისა, რომ ტვირთის გადაზიდვისას შეზღუდვები მოქმედებს, ხალხი საჭირო პროდუქტის შეტანას მაინც ახერხებს. ადგილობრივების ინფორმაციით, ეს ურთიერთობა უფრო ცალმხრივია და სურსათის თუ სხვა პროდუქციის შეტანა ხალხს იმდენად არ უჭირს, ვიდრე აქეთა ტერიტორიაზე გადმოტანა.

მიმდინარე წლის 20 აგვისტოს შსს-ს საგანგებო სიტუაციების მართვის სააგენტოში "112"-დან შემოვიდა შეტყობინება, რომ თბილისში, ლისის ტბის მიმდებარე ტერიტორიაზე, ხანძარი გაჩნდა. ცეცხლი ბალახს და მწვანე ნარგავებს მოეკიდა. 

"უწინ გლოვის დღე იყო. თანდათანობით ტრაგედიაში ცოტა სიმღერა და პოეზიაც დამკვიდრდა. აბა, სულ გლოვა და ტირილი ხომ არ შეიძლება. გულში ვტირით, სახით კი ვიღიმებით" - იტყვის  საფრანგეთში მცხოვრები ოთარ პატარიძე 1924 წლის აგვისტოს აჯანყებაში სამშობლოსათვის დაღუპულ გმირთა პატივსაცემად გამართულ ერთ-ერთ ღონისძიებაზე, რომელსაც ქართული სათვისტომო ლევილში ყოველწლიურად აღნიშნავს.

საზაფხულო სეზონი იწურება. 2017 წლის ზაფხული განსაკუთრებულად ცხელი აღმოჩნდა როგორც ამინდის, ასევე ფასების მხრივ. წელს როგორც საზღვაო კურორტები, ასევე მთის კურორტებიც საკმაოდ მოთხოვნადი აღმოჩნდა. ბათუმსა და ქობულეთს კი ანაკლიაში ჩატარებულმა ფესტივალმა დიდი კონკურენცია გაუწია და წელს ანაკლია-განმუხურის სანაპიროზე საკმაოდ ბევრი დამსვენებელი იყო.

ელექტროენერგიის შესაძლო გაძვირება, დიდი ალბათობით, "ინტერ რაოს" მხრიდან საარბიტრაჟო შანტაჟს უკავშირდება. მართალია, ეს ვერსია ოფიციალურად არ დასტურდება, თუმცა სპეციალისტები არ გამორიცხავენ, რომ ტარიფის გადახედვის ერთ-ერთი მიზეზი რეალურად ესეც იყოს. მით უმეტეს, გაბათილებულია ყველა კომპონენტი, რომელიც გადასახადის ზრდას უკავშირდება - როგორც ინვესტიციები, ასევე ლარის კურსი.