არჩევნებში დამარცხებული ძალა დედაქალაქში 2 დეკემბრიდან მრავალათასიანი აქციების დაწყებას აპირებს. "ძალა ერთობაშია" არჩევნების შედეგს უნდობლობას უცხადებს. რა გავლენა ექნება არასტაბილურ პოლიტიკურ გარემოს საქართველოს ეკონომიკაზე და რამდენად მძიმე ზამთარი გველის წინ, ეს ყოველივე დამოკიდებულია იმაზე, თუ რამდენად მასშტაბური და დაძაბული იქნება დემონსტრაციები.

არჩევნების დასრულებისთანავე სავალუტო ბაზარზე უკვე არასტაბილური ვითარებაა. უშუალოდ კენჭისყრის დღეს ეროვნული ვალუტა 2,71-ის ნიშნულს მიუხლოვდა, გუშინ დილით კიდევ 2 პუნქტით გაუფასურდა, მაგრამ შემდეგ გამყარება დაიწყო. ფინანსისტები დამაიმედებელ პროგნოზს ვერ გამოთქვამენ. მათი აზრით, დეკემბრის მეორე ნახევრამდე ლარი დოლარის მიმართ 2.80-იან ნიშნულს მიაღწევს.

თხილის ფასი რეგიონებში 2 ლარამდე ჩამოვარდა. წლის მიწურულს თხილი ყოველთვის ძვირია, თუმცა ბოლო წლების განმავლობაში ეს პირველი შემთხვევაა, როცა ფასი მინიმუმამდე დაეცა. მიუხედავად იმისა, რომ მარაგი მცირეა და ხალხს გადანახული მოსავალი ცოტა შემორჩა, ფასი არ იზრდება. კატასტროფულად იაფია თხილი აფხაზეთში, სადაც 1 კგ პროდუქტის ფასი 80 თეთრს არ აჭარბებს.

თბილისში საერთაშორისო სტანდარტების შესაბამისი ოცდაათი ახალი რეტერატი დაიდგა. საზოგადოებრივი რეტერატების, ანუ საპირფარეშოების, მოწყობის ვალდებულება მერიის მიერ გამოცხადებულ აუქციონზე გამარჯვებულმა კომპანიამ იკისრა. ახლო მომავალში დედაქალაქში დამატებით 6 რეტერატი განთავსდება.

მმართველი პარტია წინასაარჩევნო ვალდებულებებს თუ არ შეასრულებს, ხალხს ზამთრის გადატანა ძალიან გაუჭირდება. პროდუქტები გაძვირდა, ლარი უფასურდება და მოსახლეობას არსებული პრობლემის დაძლევა მომავალ წელს კიდევ უფრო გაუჭირდება. როგორც ცნობილია, პენსია მოიმატებს, თუმცა რეალურად განხორციელდება თუ არა ვალების ჩამოწერა და სხვადასხვა სოციალური პროექტის განხორციელება, ჯერჯერობით ეჭვს მაინც იწვევს, თუმცა არც სხვა გამოსავალი ჩანს. სპეციალისტები აცხადებენ, რომ მომავალი წლიდან საქართველოს უამრავი ოჯახისათვის ცხოვრება გაუსაძლისად მძიმე გახდება.

არჩევნების მეორე ტურის შემდეგ კომუნალური გადასახადების გაზრდაზე მუშაობა დაიწყება. მიზეზი მთავრობის მიერ ბიუჯეტში განსაზღვრული საპროგნოზო მაჩვენებელია, რომლითაც ლარის კურსი დოლართან მიმართებით 2.70-ია. ასევე სხვა ფაქტორების გათვალისწინებით, სექტემბრის ბოლოს სემეკ-ის თავმჯდომარემ ტარიფების გადათვლა დააანონსა.

უკრაინასა და რუსეთს შორის საომარი მდგომარეობა საქართველოზე არა მხოლოდ პოლიტიკურად, არამედ ეკონომიკურადაც აისახება. ორივე ქვეყანა საქართველოს უმნიშვნელოვანესი სავაჭრო პარტნიორია და ამ ქვეყნებში დაძაბული ვითარება პირდაპირპროპორციულად შეამცირებს ექსპორტის წილს.

დედაქალაქში ახალაშენებული ბინის ფასი 15%-ით გაიზრდება. მიზეზი 1-ლი იანვრიდან ასამოქმედებელი რეგულაციაა. საუბარია ისეთ უსაფრთხოების სტანდარტებზე, როგორებიცაა სახანძრო და დაპროექტების, ასევე მშნებლობაზე დასაქმებულთა რისკების მინიმუმამდე დაყვანა. თითოეულ კვადრატულ მეტრზე ფასის 100-150 დოლარით მატების შესახებ "არსის" დირექტორი საუბრობს, თუმცა ასეთი ნახტომისებური ზრდის ტენდენციას არ ეთანხმებიან სხვა მშენებლები.

წლის ბოლომდე შესაძლოა, საქართველოში კაპიტალდაბანდებები შემცირდეს. ინვესტორების პასიურობა არჩევნებს უკავშირდება და ქვეყნის ეკონომიკაზე უარყოფითად აისახება, სამომავლოდ კი ინვესტიციებზე პოლიტიკური პროცესების გავლენა უშუალოდ არჩევნების შედეგზე იქნება დამოკიდებული. ექსპერტების აზრით, გრიგოლ ვაშაძის გამარჯვების შემთხვევაში ეკონომიკური განვითარება საგრძნობლად შენელდება და შეიძლება, კრიზისიც დაიწყოს, რაც სალომე ზურაბიშვილის გამარჯვების შემთხვევაში მოსალოდნელი არ არის.

22 ნოემბერს სარეიტინგო სააგენტო “Fitch”-მა დაადასტურა სს „საქართველოს რკინიგზის“ რეიტინგი „B+“ და ამასთანავე გააუმჯობესა საპროგნოზო მოლოდინები რეიტინგთან მიმართებაში „სტაბილურიდან“ „პოზიტიურზე“, რაც მნიშვნელოვანწილად გამოწვეულია საქართველოს სუვერენული რეიტინგის პროგნოზების გაუმჯობესებით.

პაციენტისთვის სწორი დიაგნოსტიკა მკურნალობაზე რთულია. ჩვენი მოქალაქეები არ ენდობიან საქართველოში ჩატარებულ კვლევებს და იძულებული არიან, სხვა ქვეყნების სამედიცინო მომსახურებით ისარგებლონ. მიუხედავად იმისა, რომ ჯანდაცვის რეფორმაში მილიონობით ლარი იხარჯება, სამედიცინო მომსახურების ხარისხი მაინც დაბალია. რაც აუნდა ვიტრაბახოთ, რომ სერვისი უმჯობესდება, ხარისხიანი სამედიცინო მომსახურების მიღება ხშირ შემთხვევაში მაღალი დონის კლინიკებშიც კი შეუძლებელია.

ბანკები არღვევენ კანონს და არაპროფილურ საქმიანობას არხეინად აგრძელებენ. მიუხედავად იმისა, რომ მათ არასაბანკო საქმიანობა ეკრძალებათ, უმსხვილესი საფინანსო ინსტიტუტები სხვადასხვა ბიზნესში აქტივებს დღესაც ფლობენ და არ დარჩა ეკონომიკის თითქმის არც ერთი მიმართულება, სადაც ბანკების გავლენა არ იგრძნობა. დეველოპერული და ტურისტული კომპანიები, სააფთიაქო ბიზნესი, უნივერსიტეტები, ღვინისა და კონიაკის საწარმოები და სხვა ბანკების ბოლოდროინდელი ფუნდამენტური მიმართულებაა.