ლარის დევალვაციისა და საწვავის გაძვირების გამო საქალაქთაშორისო მარშრუტებზე მგზავრობის გაძვირება დაიწყო. ახალციხე-თბილისის მიმართულება პირველია, სადაც მგზავრობის საფასური გაიზარდა. მანამდე თბილისში ტაქსების მომსახურება დაახლოებით 1-2 ლარის ფარგლებში გაძვირდა. სპეციალისტები ვარაუდობენ, რომ მალე გაძვირების გზას ბევრი დაადგება, რადგან ავტოსადგურებში ფასების შენარჩუნებას მხოლოდ დიდი ძალისხმევით ახერხებენ, რაც ზოგიერთი გადამზიდავი კომპანიის შესაძლებლობასაც კი აღემატება.

მიუხედავად ბევრი პროგრამისა, რომელიც თითქოს მცირე და საშუალო ბიზნესის ხელშემწყობი უნდა იყოს, ქვეყანაში მეწარმეთა უდიდეს ნაწილს წარმოებას მაინც არ უფინანსებენ. ისინი სახელმწიფოსგან დახმარებას ელიან, თუმცა უშედეგოდ. მეწარმეები ამბობენ, რომ საქართველოში უცხოელებს მეტი ხელშეწყობა აქვთ სახელმწიფოს მხრიდან, ვიდრე ადგილობრივებს, რაც იმაზე მიუთითებს, რომ სახელმწიფოს იმპორტის ექსპორტით ჩანაცვლება არ სურს. ამ მოსაზრებას ეთანხმებიან სპეციალისტები, თუმცა უარყოფენ მცირე და საშუალო საწარმოთა ასოციაციაში.

ბაზრობაზე მოვაჭრე პირებს სპეციალური სტატუსი მიენიჭება და მათთვის დაბეგვრის განსხვავებული საგადასახადო რეჟიმი შემუშავდება. სამართლის სფეროს სპეციალისტები მთავრობის ინიციატივას ეჭვის თვალით უყურებენ, მაგრამ მოვაჭრეთა ნაწილი ახალი სისტემით დაბეგვრის მომხრეა, რადგან დღევანდელი გადასახადების სიმძიმეს ვეღარ აუდიან.

ხელისუფლების ეკონომიკური გუნდი საგარეო ფინანსური ვალდებულებების ზრდას აანონსებს. სახელმწიფოს მხარს უბამს კერძო სექტორიც და ისინიც კიდევ უფრო დიდი ტემპით იღებენ ახალ-ახალ ვალდებულებებს. საბოლოო ჯამში, მთელი ეკონომიკა ისევ ვალებს ჩამოეკიდა, რაც უახლოეს წლებში მძიმე შედეგის წინაშე დააყენებს ქვეყანას.

წელს არჩევნებმა სარეკლამო ბაზარი საკმაოდ შეცვალა. პოლიტიკური რეკლამის გავლენა გრძელდება დღესაც, რაც დედაქალაქში განთავსებულ ბილბორდებზეც აისახება. შესამჩნევია ასევე სხვადასხვა ბრენდის რეკლამაც, ამ მხრივ კი პირველობას ბაზარზე სულ ახლახან შემოსული "ჰ და მ" იჩენს, რომელიც, სპეციალისტების შეფასებით, ბოლო დროის ყველაზე მეტად გარეკლამებული ბრენდია საქართველოში.

დედაქალაქში უძრავი ქონების ბაზარზე, ბოლო სამი თვეა, მდგომარეობა მოულოდნელად გამოსწორდა და რეალიზაცია საკმაოდ წარმატებით მიმდინარეობს. ბოლოდროინდელი ტენდენციის მიხედვით, ადამიანები უმეტესად ახალაშენებულ ბინებს ანიჭებენ უპირატესობას. ბაზარზე ძველ ბინებზე მოთხოვნა შემცირდა, რამაც ფასზე გავლენა მოახდინა და მისი ღირებულება შეამცირა.

ბოლო წლებში რთულ მდგომარეობაში მყოფი ავტობიზნესი გამოცოცხლდა. მსუბუქი ავტომობილების რეექსპორტისა და იმპორტის წილი საკმაოდ გაიზარდა. საქართველოდან მანქანები სომხეთში, აზერბაიჯანსა და უკრაინაში გაჰყავთ. მიუხედავად იმისა, რომ აქციზის გადასახადი და ნავთობი მკვეთრად გაზრდილია, ამას იმპორტიორი კომპანიებისა და ზოგადად საავტომობილო ბაზრისათვის ხელი არ შეუშლია.

არჩევნების შემდეგ, ერთ თვეში საწვავი დაახლოებით 20 თეთრით გაძვირდა. ამჟამად ავტოგასამართ სადგურებზე ბოლო წლების მაქსიმალური ფასია დაფიქსირებული. ნავთობპროდუქტები ბოლო პერიოდში უცხოურ ბაზრებზეც გაძვირდა, მაგრამ ამ შემთხვევაში ბენზინისა და დიზელის ფასზე ძირითადი გავლენა ლარის გაუფასურებამ მოახდინა. ერთ თვეში კურსი 25 პუნქტით დაეცა, რამაც საწვავის საცალო ღირებულებაზე მყისიერად იმოქმედა.

როგორც მოსალოდნელი იყო, წლის ბოლოს ქვეყანა ინფლაციურ წნეხში მოექცა. მთავრობა და ეროვნული ბანკი მხოლოდ მიმდინარე მოვლენებს აკვირდებიან, თუმცა მდგომარეობის გამოსასწორებელ ნაბიჯებს არ დგამენ. ამასობაში, ფასები მაღლა იწევს და ძალიან მალე ინფლაციური პროცესების შეჩერება შეუძლებელი გახდება. სავარაუდოდ, 2017 წლის ბოლომდე ინფლაცია 8%-ს მიაღწევს. ეს ნიშნავს, რომ მიზნობრივს ორჯერ გადააჭარბებს.

2017 წლის ბიუჯეტში ცვლილებები შედის. ბიუჯეტის ხარჯები 305 მილიონი ლარით იზრდება. ამ ზრდის შედეგად საქართველოს ბიუჯეტი წელს 11.7 მილიარდ ლარს მიაღწევს და წლის ბოლომდე კიდევ უფრო მეტი ფული იქნება დასახარჯი. 20 ნოემბრის მონაცემებით, ბიუჯეტიდან გადასახდელების სახით სულ 9,683 მლრდ ლარია გაცემული. გამოდის, რომ, ახალი ცვლილების შედეგად, წლის ბოლომდე, ანუ 40 დღეში 2 მლრდ ლარი იქნება დასახარჯი.

საქართველოს პარლამენტმა შესაძლოა, ეროვნულ ბანკს კურსის სტაბილურობასა და ინფლაციის გაკონტროლებასთან დაკავშირებით სამოქმედო გეგმა მოსთხოვოს. ეს იქნება ერთ-ერთი საკითხი, რაზეც საპარლამენტო უმრავლესობის წარმომადგენლები ეროვნული ბანკის პრეზიდენტთან შეხვედრისას ისაუბრებენ. ლარი უკვე იმ დონეზე გაუფასურდა, რომ მისმა მოჩვენებითმა სტაბილურობამაც კი 1 დღეზე მეტხანს ვერ გასტანა. 20 ნოემბერს კურსი უმნიშვნელოდ გამყარდა, მაგრამ მეორე დღესვე კვლავ დევალვაციისკენ აიღო გეზი.

დენის ტარიფის გაძვირების ალბათობა მალე რეალობად იქცევა. ენერგეტიკოსები უკვე თამამად აცხადებენ, რომ ლარის დევალვაციის ფონზე გადასახადის გაძვირება გარდაუვალია. სავალუტო კრიზისმა საქართველოს ფინანსური ბაზარი იმდენად არასტაბილური გახადა, რომ ტარიფებთან დაკავშირებით კითხვის ნიშნების დასმას კომპეტენტური პირებიც უკვე აშკარად ერიდებიან. ისინი ელოდებიან, რომ ტარიფი მოიმატებს. საქართველოს ენერგეტიკისა და წყალმომარაგების მარეგულირებელ ეროვნულ კომისიაში (სემეკი) ამ საკითხის განხილვა, დღის წესრიგით, ჯერჯერობით არ ჩანიშნულა.