სააღდგომოდ დედაქალაქს, წინა წლებთან შედარებით, ბევრად უფრო ნაკლები მოქალაქე დატოვებს. ერთ-ერთი მიზეზი, სხვა უამრავ ხარჯთან ერთად, საწვავის გაზრდილი ფასიცაა, რამაც ტრანსპორტირება გააძვირა. მართალია, ავტოსადგურები ამ ფაქტს არ ადასტურებენ, თუმცა პირად საუბარში მძღოლებისგან ირკვევა, რომ მოთხოვნა შემცირდა და მოგების მარჟის შესანარჩუნებლად ფასი მოიმატებს. სადღესასწაულო დღეებში რეგიონში წამსვლელთა უმეტესობა სტუდენტია, რომელთა ფაქტობრივი საცხოვრებელი დედაქალაქი არ არის.

ქვეყნის ერთ-ერთი უმსხვილესი ბანკის პროგნოზით, წლის მეორე ნახევრიდან ლარი უნდა გამყარდეს. მსგავსი მოლოდინის საფუძველს ვერ ხედავენ სხვა ფინანსური ორგანიზაციების წარმომადგენლები და სპეციალისტები. ანალიტიკოსების აზრით, ლარი დოლარის მიმართ 2.70-2.80 შორის იტრიალებს მესამე კვარტალის დასასრულიდან წლის ბოლომდე.

"თიბისი ბანკის" ინიციატივით, მაკროეკონომიკური მიმოხილვის შესახებ პრეზენტაცია გაიმართა. ბანკის კორპორაციულ კლიენტებთან და მომხმარებლებთან შეხვედრა "ჰოლიდეი ინ"-ში მოეწყო. მათ ამომწურავი ინფორმაცია მიიღეს მაკროეკონომიკის მიმართულებით არსებული ძირითადი მაჩვენებლების, დინამიკისა და პროგნოზთან დაკავშირებით.

ავტოიმპორტი კვლავ მცირდება. ბაზარზე, რომელიც სულ რამდენიმე წლის წინ ერთ-ერთი ყველაზე მზარდი და მომგებიანი იყო, კლების შეუქცევადი ტენდენციაა. ქვეყნის შიგნით გაყიდვის შემცირებაზე საუბრობს თითქმის ყველა ავტოიმპორტიორი. მიზეზი ახალი საკანონმდებლო ცვლილება, საბანკო და საავტომობილო სფეროში გატარებული რეგულაციაა.

იანვარში, თებერვალსა და მარტში სასტუმროების დატვირთვის კოეფიციენტი 9%-ით შემცირდა. ასეთია სასტუმროების ინფორმაცია. მიუხედავად იმისა, რომ ქვეყანაში მატულობს მაღალი კლასის სასტუმროების რიცხვი, ვიზიტორთა შემცირებამ გავლენა ფასზეც იქონია და წლის დასაწყისიდან იკლებს მომსახურების საშუალო ფასიც. ტურისტთა კლება კი განსაკუთრებით ირანიდან ნაკადის შეწყვეტამ გამოიწვია.

მაისის ბოლოდან საქართველოში, შესაძლოა, ფქვილი გაიაფდეს, რაც პურის ფასს შეამცირებს. მწარმოებლები ვარაუდობენ, რომ ბაზარი დასტაბილურდება, რაზეც გავლენას მოახდენს ყაზახური ხორბლის იმპორტი. დიდი გაურკვევლობის შემდეგ მხოლოდ ახლა გახდა შესაძლებელი, რომ ბაზრის დივერსიფიცირება მოხდეს და რუსული ხორბლის იმპორტი შემცირდეს. ყაზახური წარმოების 1 ტონა ხორბლის ფასი 90 დოლარია. სატარიფო ცვლილების შემთხვევაში მოსალოდნელია, რომ ფასი დაახლოებით 70 დოლარამდე დავიდეს.

თეირანის მუქარა, რომ ჰორმუზის სრუტეს გადაკეტავს, ნავთობის ფასებზე კატასტროფულად იმოქმედებს. ანალიტიკოსების შეფასებით, ირანმა ეს ნაბიჯი რომ არ გადადგას, ნავთობპროდუქტების გაძვირება გარდაუვალია.

სურსათზე ფასი მაისის შუა რიცხვებიდან დაიწევს. ეს, ძირითადად, სასოფლო-სამეურნეო პროდუქტს შეეხება, თუმცა ბაზარზე იმპორტირებული პროდუქციის სიჭარბე იქნება და ფასის კლებაც მის ხარჯზე მოხდება. სპეციალისტები ამბობენ, რომ ქვეყნაში ადგილობრივი წარმოების განვითარებისათვის მცირე ბიზნესის რეალური ხელშეწყობაა საჭირო. მანამდე მუდმივად სიძვირე იქნება.

საქართველო ვალებს ვერ აუდის. გარდა იმისა, რომ სახელმწიფო ვალი მუდმივად მატულობს, ქვეყნისათვის არანაკლები ზიანის მომტანია სახელმწიფო შპს-ების ვალიც, რომელიც, სპეციალისტების შეფასებით, უდიდესია და ბოლო 6 წლის განმავლობაში 7 მილიარდ ლარამდეა გაზრდილი.

მსოფლიოს რამდენიმე ქვეყანაში ქართულ პროდუქციას ბარიერი ხვდება. პრობლემა მასშტაბურია არმატურისა და ცემენტის მწარმოებლებისთვის, რომელთა განცხადებითაც, პროდუქტს ვერ ყიდიან მეზობელ და რამდენიმე ისეთ ქვეყანაში, რომლებთანაც საქართველოს თავისუფალი ვაჭრობის რეჟიმი აკავშირებს. ეს მაშინ, როცა საქართველოში იმპორტული ფოლადი უპრობლემოდ შემოდის და ხშირად ადგილობრივ ბაზარზე დემპინგურ ფასად იყიდება.

საჯარიმო სანქციები დღითი დღე მკაცრდება და უკვე რეპრესიულ სახეს იღებს, თანაც ისე, რომ საჯარიმო თანხის მოცულობაც მატულობს როგორც იურიდიული, ასევე ფიზიკური პირებისთვის. ბიზნესისთვის ეს საკითხი, შესაძლოა, ნაკლებად მტკივნეულია, მაგრამ ძალიან მძიმე ტვირთია სოციალურად გაჭირვებული მოსახლეობისთვის, რომელიც ყოველდღიური ხარჯის გამკლავებასაც ვერ ახერხებს.

სააღდგომოდ გაძვირებულმა პროდუქციამ და ძალიან მაღალმა ფასებმა მომხმარებლები რთულ მდგომარეობაში ჩააყენა. გაძვირებულია როგორც საკვები პროდუქტები, ასევე სხვადასხვა მომსახურება, რის გამოც ხალხის დიდ ნაწილს უჭირს სადღესასწაულო ხარჯთან გამკლავება. ეკონომისტები "ბიზნეს-რეზონანსთან" საუბრისას აღნიშნავენ, რომ პროდუქტებზე ფასის ზრდა მაღალი მოთხოვნის შედეგია.