არჩევნებამდე ერთი კვირით ადრე საარჩევნო კამპანიაში პოლიტიკური რეიტინგებით ბრძოლა გახსნილად გამოცხადდა. სულ რამდენიმე დღის წინ ერთი და იგივე დროს ჩატარებული ორი ურთიერთგამომრიცხავი სოციოლოგიური კვლევა გამოაქვეყნა ორმა ტელევიზიამ - "იმედის" კვლევაში "ქართული ოცნება" დამაჯერებლად იმარჯვებს, "რუსთავი 2"-ის კვლევით კი უმნიშვნელო სხვაობით, მაგრამ მაინც პირველ ადგილზე "ნაციონალური მოძრაობაა" და ეს მხოლოდ დასაწყისია, რადგან მოლოდინია, რომ ეგზიტპოლების დაპირისპირება იქნება 8 ოქტომბერს, არჩევნების საღამოს 8 საათზეც არჩევნების მთავარი მანიპულაციის საგანი.

"რუსთავი 2"-ის გენდირექტორის განცხადება, რომ შალვა რამიშვილი მას "ქართული ოცნების" წინააღმდეგ მუშაობას სთავაზობდა ამ უკანასკნელს ხუმრობის ხასიათზე აყენებს, ამბობს, რომ კახა კალაძეზე აქვს "კომპრომატი", რაშინ მილიონს ითხოვდა, თუმცა გვარამიამ მხოლოდ ამ თანხის ნახევარი შესთავზა.

"ნაციონალური მოძრაობის" მთაწმინდის მაჟორიტარი დეპუტატობის კანდიდატი ნიკა რურუა ხელისუფლებას ოპოზიციის დაშინებაში ადანაშაულებს და ამას მისი შტაბის ხელმძღვანელის დაკავებით ხსნის. ამბობს, რომ დავით ჯაფარიძეს იარაღი ჩაუდეს და რეალურად საქმეში არანაირი მტკიცებულება არ დევს. თავად მღებრიშვილის უწყებაში კი აცხადებენ, რომ ყველაფერს გამოძიება დაადგენს.

გორის მაჟორიტარობის კანდიდატი და თავდაცვის ყოფილი მინისტრი ირაკლი ოქრუაშვილი გორში კვირას მომხდარ სროლას "ქართული ოცნების" საარჩევნო შტაბის უფროსს, კახი კალაძეს აბრალებს.

საპარლამენტო უმრავლესობის წევრი "ქართული ოცნებიდან" გუგული მაღრაძე ამბობს, რომ მართალია, "ნაციონალური მოძრაობა" სიტუაციის ასარევად ყოველ ღონეს ხმარობს, მაინც არაფერი გამოუვა, რადგან ამას არც ხალხი, არც ხელისუფლება და არც საერთაშორისო საზოგადოება არ დაუშვებს.

საქართველოში ყოველი მე-3 ადამიანი სახელმწიფოსგან ფინანსურ დახმარებას იღებს. 3 მლნ 730 ათასი ადამიანიდან პენსია და სოციალურ შემწეობა 1 მლნ 220 ათას ადამიანზე გაიცემა, რაც მთელი მოსახლეობის დაახლოებით 32,8%-ია. ევროპასა და ამერიკაში ეს თანაფარდობა, საშუალოდ, 10-15%-ია.

საქართველოს მთავრობას ლარის კურსის შედარებით გამყარების იმედი აქვს, რაც 2017 წლის ბიუჯეტის პროექტის თავდაპირველ ვარიანტში ნათლად გამოჩნდა. 2017 წლის ბიუჯეტის პროექტში ჩადებულია ლარის გაცვლითი კურსი დოლართან - 2.30. წლევანდელ ბიუჯეტში ეს მაჩვენებელი 2,40-ია და აშკარაა, რომ მთელი წელი კურსიც დაახლოებით ამ მაჩვენებელის ფარგლებში ტრიალებს.

ხელისუფლების წევრთა არაერთი განცხადების მიუხედავად, ეროვნული ვალუტის კურსი არასტაბილურობის ზენიტშია. ბოლო ერთი წლის განმავლობაში ლარი თითქმის არ გამყარებულა. ეს მაშინ, როცა მთავრობის წევრები ეროვნულ ვალუტას მუდმივად გამყარებას უწინასწარმეტყველებდნენ.

სასესხო ლიმიტის გაზრდაში წამყვანი ბანკები მიკროსაფინანსო ორგანიზაციებს ტოლს არ უდებენ. სულ რამდენიმე თვის წინ, თუ სესხის ლიმიტის მოცულობა ფიზიკური პირებისთვის 300 ლარს არ აჭარბებდა, ეს მაჩვენებელი 600-1000 ლარამდე მოიმატა.

არჩევნებში გამარჯვების შემთხვევაში ყველა პარტია თუ კოალიცია ადმინისტრაციული ხარჯის შემცირებას აპირებს. ასეთი სურათი იკვეთება პოლიტიკური სუბიექტების წინასაარჩევნო პროგრამებში, სადაც ბიუროკრატიული აპარატის შეზღუდვა ერთ-ერთი მნიშვნელოვანი კომპონენტია. მათ შორისაა "ქართული ოცნება", რომლის საარჩევნო პროგრამაში ვკითხულობთ, რომ "გაგრძელდება ხარჯების ოპტიმიზაციის პროცესი, შეიზღუდება ადმინისტრაციული ხარჯები". კიდევ უფრო მეტი კონკრეტიკაა ოპოზციური პარტიების პროგრამებში.

ანალიტიკოსი და პოლიტოლოგი გია ხუხაშვილი ამბობს, რომ თუ პარლამენტში მხოლოდ "ოცნება" და "ნაციონალები" შევლენ, ეს ქვეყანაში კრიზისის ერთ-ერთი მიზეზი გახდება. მისივე შეფასებით, დღეს ქვეყანაში მოჩვენებითი სიწყნარეა, რადგანაც მთავარი პროცესები არჩევნების შემდგომ განვითარდება, რომელშიც, დიდი ალბათობით, მთელი ქართული პოლიტიკური ელიტა ჩაერევა.

საქართველოში წინასაარჩევნო გარემოზე საუბრისას ექსპერტთა უმრავლესობა აღნიშნავს, რომ ვითარება წინა არჩევნებთან საკმაოდ მშვიდია და დაძაბულობა ნაკლებია. თუმცა, ამ ფონზე უკვე მოხდა რამდენიმე ფიზიკური დაპირისპირება ამა თუ იმ პარტიის დეპუტატობის კანდიდატთა მონაწილეობით, თანაც - პირდაპირ ეთერში.