განხეთქილება უმრავლესობის ორ ფრაქციას შორის - "რესპუბლიკელები" "მრეწველებს" ღიად დაუპირისპირდნენ, რაშიც პარტია "ქართული ოცნებაც" ჩაერია. "რესპუბლიკელები" პოლიტიკური მოკავშირეებისგან საჯაროდ ითხოვენ გოგი თოფაძის განცხადებებთან და, სავარაუდოდ, პირადად მისგანაც გამიჯვნას. ნომერი მეორე "მრეწველი" ზურაბ ტყემალაძე კი ამბობს, რომ თოფაძე მისი მეგობარია, თავდაცვის მინისტრის მიმართ მისი დამოკიდებულება კი მისი სუბიექტური აზრია.

საქართველოს მთავრობა აფხაზეთს რუსეთისგან ელექტროენერგიას შეუძენს და უფასოდ გადასცემს. აფხაზები ენგურჰესიდან გამომუშავებული დენით მარაგდებიან და ზამთრის თვეებში ჰესი მთლიანად მათ განკარგულებაშია. ახლა ვინაიდან ენგურში წყლის დონე შემცირდა, აფხაზეთს დეფიციტი რომ არ შეექმნას, მთავრობამ გადაწყვიტა, ეს რეგიონი რუსული დენით მოამარაგოს. სპეციალისტების განცხადებით, სეპარატისტებს წელიწადში 35 მლნ ლარის ღირებულების დენს ისედაც ვჩუქნით. დამატებით საქართველოს დანარჩენი მოსახლეობის ხარჯზე, ძვირად ღირებული (6,5-ცენტიანი) ელექტროენერგიის ყიდვა მცდარი გადაწყვეტილებაა.

დედაქალაქის განაშენიანების რეგულირების წესებში ცვლილება შედის. ერთ-ერთი მთავარი საკითხი სამშენებლო კ2 კოეფიციენტის მომატებასთან დაკავშირებით დროებით შეზღუდვას შეეხება. მოსალოდნელია ცვლილება კ3-ზეც, რომლის მასშტაბი 10%-ის ნაცვლად, 20%-ით განისაზღვრება.

რამდენიმე დღეა, ვალუტის გადამცვლელ პუნქტებში დოლარი ეროვნული ბანკის ოფიციალურ კურსსა და "ბლუმბერგის" სავაჭრო სისტემაში დაფიქსირებულ ღირებულებაზე იაფად იყიდება. როგორც წესი, სავალუტო ჯიხურები ელექტრონული სისტემის სავაჭრო ტენდენციას მიჰყვებიან, თუმცა ახლა ეს კონიუნქტურა დაირღვა. სპეცალისტების შეფასებით, საქმე გვაქვს ხელოვნურად აწეულ კურსთან, რეალურად კი ბაზაზე სულ სხვა ვითარებაა.

განახლდა ჩემპიონთა ლიგის მიმდინარე გათამაშება, გაიმართა ორი მატჩი. პარიზში, პარკ დე ფრანსზე ადგილობრივმა პსჟ-მ ლონდონის "ჩელსი" მიიღო და დაამარცხა 2:1. ლისაბონში კი ესტადიუ დუ ბენფიკაზე პორტუგალიურმა "ბენფიკამ" მატჩის ბოლო წუთზე გატანილი ერთადერთი გოლის წყალობით შეძლო სანქტ-პეტერბურგის "ზენიტის" ძლევა 1:0.

საპარლამენტო უმრავლესობის წევრი სოსო ჯაჭვლიანი არ გამორიცხავს, რომ კანონპროექტი რელიგიური გრძნობების შეურაცხყოფაზე პარლამენტში განსახილველად მომავალშიც შეიტანოს. მისი თქმით, ამ ეტაპზე კანონპროექტის უკან გათხოვა იმიტომ გადაწყვიტა, რომ მას დიდი აჟიოტაჟი და ვნებათაღელვა მოჰყვა.

დიღმის მასივში, დავით აღმაშენებლის ძეგლის მიმდებარე ტერიტორიაზე, ბენზინგასამართ სადგურზე სისხლიანი გარჩევა მოხდა. თვითმხილველების ინფორმაციით, ძმებ ზურა და გია ბერიშვილებს 5-მა შეიარაღებულმა პირმა ცეცხლსასროლი იარაღიდან ესროლა. ერთი ძმა ადგილზევე დაიღუპა, ხოლო მეორე მსუბუქად დაიჭრა.

იმ შემთხვევისთვის, თუკი საქართველოს თავშესაფრის მაძიებელი უცხოელი დევნილები მასობრივად მოაწყდებიან, მათთვის სპეციალურად ახალი სტატუსის - დროებითი დაცვის ქვეშ მყოფი პირის სტატუსის შემოღება იგეგმება, რომლის მიხედვითაც, მინიმუმ 1 წელი ასეთი პირები საქართველოში იცხოვრებენ, მაქსიმუმ კი იმ დრომდე, სანამ საკუთარ ქვეყანაში ვითარება არ დასტაბილურდება. კანონპროექტი უკვე არსებობს და მას მალე პარლამენტშიც შეიტანენ.

12 წლის შემდეგ, პროკურატურამ ტელეკომპანია "იბერიის" დახურვისა და სამაუწყებლო ლიცენზიის ჩამორთმევის საქმე გახსნა. პროკურატურის განცახდებით, აღნიშნულ ფაქტთან დაკავშირებით ყოფილი გენერალური პროკურორი ზურაბ ადეიშვილი და მისი პირველი მოადგილე გიორგი ლაცაბიძე სისხლის სამართლის პასუხისგებაში იქნა მიცემული.

მაგთიკომი თავის ოფიციალურ ინფორმაციასა თუ მიმართვას სოციალურ ქსელებში ანთავსებს კომპანიის ოფიციალურ Facebook გვერდზე, რომლის მისამართია https://www.facebook.com/MagtiFun

პოლიტოლოგი რამაზ საყვარელიძე ხელისუფლებაში მოხშირებულ და გამწვავებულ დაპირისპირებებზე საუბრობს და ამბობს, რომ არჩევნების მოახლოებამ სიტუაცია კიდევ უფრო დაძაბა.

საქართველოს 20 წლამდელ მორაგბეთა ნაკრებს უახლოეს დღეებში საკმაოდ საინტერესო სამხრეთამერიკული ტურნე ელის. ილია მაისურაძის შეგირდები უკვე გაემგზავრნენ არგენტინაში, სადაც 20 და 24 თებერვალს ამ ქვეყნის 20 წლამდელებთან სპარინგებია დაგეგმილი. 28 თებერვალსა და 4 მარტს კი ჩვენი ბიჭები ურუგვაელ თანატოლებს შეერკინებიან.