მარჯვენასაჭიანი ავტომობილების რეგისტრაციის აკრძალვის თარიღმა, შესაძლოა, 2017 წლამდე გადაიწიოს. მასთან ერთად კი მოხდება ყველა იმ ცვლილების გადავადება, რომელსაც მთავრობა საგზაო უსაფრთხოების გამკაცრების მხრივ გეგმავდა. არჩევნების წელს ხელისუფლებას საზოგადოებრივი პროტესტი არ აწყობს და სავსებით შესაძლებელია, პარლამენტმაც ცვლილებების მოწინააღმდეგეთა აზრი გაითვალისწინოს.

საგარეო საქმეთა მინისტრის მოადგილის პოსტზე დავით ზალკალიანის დაბრუნების შემდეგ კულუარებში კოალიციისა და "თავისუფალი დემოკრატების" შერიგებაზე ალაპარაკდნენ. ამგვარი ხმების გავრცელებას ფრაქცია "ქართული ოცნების" წევრი ომარ ნიშნიანიძეც ადასტურებს, "თავისუფალი დემოკრატები" კი კატეგორიულად უარყოფენ, ირწმუნებიან, რომ საარჩევნო მარათონში დამოუკიდებლად, ყოველგვარი კოალიციის გარეშე ჩაერთვებიან.

როგორც დაავადებათა კონტროლის ეროვნული ცენტრის სამეცნიერო საბჭოს ხელმძღვანელი პაატა იმნაძე "რეზონანსთან" საუბრისას ამბობს, ეს ზამთარი გრიპისა და მსგავსი ვირუსული დაავადებების დაბალი ინტენსივობით გამოირჩევა.

პოლიტოლოგი, ექსპერტი კავკასიის საკითხებში მამუკა არეშიძე დარწმუნებულია, რომ თურქეთში ტერორისტული აქტები გაგრძელდება. ამბობს, რომ პრეზიდენტ რეჯეფ თაიფ ერდოღანს საკმარისზე მეტი მტერი ჰყავს, ამიტომ ამის გამკეთებელი ბევრია.

თბილისში 4-ჯერ ნაკლები გამწვანებული ტერიტორიაა, ვიდრე ამას ჯანდაცვის მსოფლიო ორგანიზაციის რეკომენდაციები ითვალისწინებს, - აცხადებს დემოკრატიული ინსტიტუტის ხელმძღვანელი, ეკოლოგი ლაშა ჩხარტიშვილი. მისი თქმით, თბილისში ყველაზე ცოტა ბაღი და სკვერი ცენტრალურ, პრესტიჟულ უბნებშია - ვაკეში, საბურთალოსა და მთაწმინდაზე.

ტელეკომპანია "ტაბულას" ჟურნალისტებზე თავდასხმის ფაქტზე შსს-მ გამოძიება სისხლის სამართლის კოდექსის 125-ე მუხლით დაიწყო, რაც ფიზიკურ შეურაცხყოფას, ცემას გულისხმობს. გუშინდელი მონაცემებით, თავდამსხმელები დაკავებული ჯერ არ იყვნენ. დაზარალებული ჟურნალისტები კი საქმის გადაკვალიფიცირებას ხულიგნობისა და მუქარის მუხლით ითხოვენ.

ბორჯომის მე-6 საჯარო სკოლის მე-12 კლასის მოსწავლე ქალაქის ერთ-ერთ მიტოვებულ შენობაში ჩამომხრჩვალი იპოვეს. გარდაცვლილი ბიჭის ახლობლების თქმით, მან თავი სწორედ იმ ქუჩაზე ჩამოიხრჩო, სადაც თავად ცხოვრობდა.

2015 წელი ქართული ღვინის ექსპორტისთვის 39%-იანი კლებით დასრულდა. ექსპორტი 50%-ზე მეტით შემცირდა ძირითად ბაზრებზე, თუმცა ზრდა შეინიშნებოდა ევროკავშირში და აზიაში. მთავარ საექსპორტო ქვეყნებში - რუსეთში, უკრაინაში, ყაზახეთსა და უკვე ჩინეთში ეკონომიკური კრიზისი წელსაც გრძელდება. მიუხედავად ამისა, მეღვინეები პერსპექტივას იმედიანად უყურებენ და მომდევნო თვეებში ექსპორტის ზრდას ელიან.

ქართველების უმეტესობა 14 იანვარს უფრო გრანდიოზულად აღნიშნავს, ვიდრე პირველ იანვარს. ისინი ამის მიზეზად ეკლესიური ცხოვრების ერთ-ერთ უმთავრეს წესს - მარხვას - ასახელებენ. რესპონდენტების ნაწილმა ახალ წელთან მიმართებაში ხელისუფლებისა და მედიის დამოკიდებულებაზეც ისაუბრა. მათი განმარტებით, ორივე რგოლი საზოგადოებაში ახალი წლის პოპულარიზაციას უფრო მეტად ეწევა, მაგალითად კი დედაქლაქსა და რეგიონებში გამართული კონცერტები და საახალწლო შინაარსის გადაცემები მოჰყავთ.

საქართველოს მთავრობის "გაზპრომთან" კავშირით შეშფოთებული აზერბაიჯანული დელეგაცია გუშინ საქართველოს ესტუმრა. "სოკარი" ამბობს, რომ საქართველოსთვის გაზის დღიური კვოტის გაზრდის შესაძლებლობას განიხილავს, ასევე დაინტერესდება გაზსაცავის მშენებლობით. კომერციული გაზის საფასურის შემცირებაზე აზერბაიჯანულ მხარეს ამჯერად არაფერი უთქვამს. კახა კალაძე ირწმუნება, რომ აზერბაიჯანი საქართველოს მეგობარი და მთავარი პარტნიორია, თუმცა ბუნებრივი აირის მოცულობის გაზრდა ახალი კომპრესორების დამონტაჟებას და დამატებით ინვესტიციებს მოითხოვს. ამ ყველაფერს დრო უნდა, საქართველოს კი გაზი ახლა სჭირდება.

ფიფას 2015 წლის "ოქროს ბურთის" დაჯილდოებას დიდი გამოხმაურება მოჰყვა. მსოფლიოს საუკეთესო ფეხბურთელის ტიტულის მფლობელ ლიონელ მესის საფეხბურთო სამყაროში ზოგი ულოცავს, ზოგიც თვლის, რომ ამ ჯილდოს კრიშტიანუ რონალდუ ანდაც სხვა ფეხბურთელი იმსახურებდა.

მერიაში გამართულ პრეზენტაციაზე, სადაც საკრებულოს წევრები და არასამთავრობო ორგანიზაციების წარმომადგენლები იყვნენ მიწვეულები, საბურთალოს რაიონის საცობებისგან განტვირთვის აუცილებელობაზე ისაუბრეს.