არალეგალური ნაგავსაყრელები თითქმის ყველა რაიონსა და სოფელშია განთავსებული. რადგან მოსახლეობას არ ჰქონდა ალტერნატივა, თავად შექმნა ნაგვის გატანის მექანიზმი, რაც გარემოს მნიშვნელოვნად აზიანებს. ნაგავსაყრელები თითქმის ყველგან მდინერეებისა და ხევების მიმდებარე ტერიტორიაზე მდებარეობს, რის შედეგადაც ბინძურდება როგორც წყალი, ისე ჰაერი და გარემო. როგორც სპეციალისტები ამბობენ, რეგიონებში მყარ საყოფაცხოვრებო ნარჩენებთან დაკავშირებით ყველაზე მძიმე მდგომარეობაა იმერეთში, შიდა ქართლსა და ქვემო სვანეთში.

მშვიდობის, დემოკრატიისა და განვითარების კავკასიური ინსტიტუტის თავმჯდომარე გია ნოდია "რეზონანსთან" საუბრისას საქართველოს პრეზიდენტის სამომავლო პოლიტიკურ ნაბიჯებზე საუბრობს. მისი თქმით, არ არის გამორიცხული, რომ წინასაარჩევნოდ გიორგი მარგველაშვილმა, როგორც დამოუკიდებელმა პოლიტიკურმა ფიგურამ, უფრო მკვეთრი თამაში და მოქმედება დაიწყოს. მომავალში კი ლოგიკურად მიიჩნევს მარგველაშვილის დაჯგუფებას ირაკლი ალასანიას "თავისუფალ დემოკრატებთან".

პედაგოგთა პროფესიული განვითარების სქემის მიხედვით, მასწავლებლები 4 კატეგორიად დაიყო. ყველაზე დიდი რაოდენობის პედაგოგი პრაქტიკოსი აღმოჩნდა, რომელიც სქემაში პირველ კატეგორიას იკავებს. რაც შეეხება ყველაზე მაღალ, მენტორის სტატუსს, ასეთი პედაგოგი წელს არ გვეყოლება.

ოკუპირებული სამხრეთ ოსეთის სასაზღვრო სოფელ ხელჩუაში შეიძლება საქართველოსთან დამაკავშირებელი "სასაზღვრო" პუნქტი გაიხსნას. როგორც სააგენტო "სპუტნიკი" იუწყება, აღნიშნული გადაწყვეტილება ცხინვალის ე.წ. მთავრობის სხდომაზე, სახელმწიფო უშიშროების კომიტეტის ინიციატივით მიიღეს.

პანკისში, სადაც არც რაიმე ბიზნესსაწარმო, არც დასაქმების საშუალება და არც გასართობი ცენტრი არ არსებობს და ბოლო წლებში საზოგადოების ყურადღების ცენტრში მხოლოდ იმიტომ ექცევა-ხოლმე, რომ იქიდან სირიაში საბრძოლველად ახალგაზრდები მიდიან, ამჯერად ადგილობრივი სოციალურად დაუცველი თემი და არასამთავრობოები ხელისუფლებისაგან ყურადღების მიპყრობას სოციალური მეწარმეობის მხარდაჭერისათვის ითხოვენ.

ანაკლიის პორტის ასაშენებლად ინვესტორი ჯერ კიდევ ვერ შეირჩა. ეკონომიკის სამინისტროში იმედოვნებენ, რომ ეს პროცესი მალე დასრულდება, თუმცა ჯერ კიდევ პირი არ უჩანს. საბოლოო ვადა მშენებელი კომპანიის გამოსავლენად სექტემბრის ბოლომდე იყო განსაზღვრული.

ქართველ ბიზნესმენთა ინფორმაციით, წლის პირველი ორი კვარტალი უკრაინასა და რუსეთში განსაკუთრებით პრობლემური იყო. მსხვილ კომპანიებში ექსპორტი თითქმის განახევრდა, თუმცა ზაფხულიდან მდგომარეობა ცოტათი გამოსწორდა, რასაც კომპანიებმა დამატებითი აქტივობით მიაღწიეს.

მოსახლეობის დიდი ნაწილი ზამთრისთვის ვერ ემზადება. მიზეზი ფინანსებია. ისინი ბოლო დროს განვითარებული ეკონომიკური ცვლილებების ფონზე, კრიზისს განიცდიან, რადგან ხარჯი გაეზარდათ და შემოსავალი იგივე დარჩათ. თუკი ადრე ყოველთვიურად აღებული თანხა კომუნალურ გადასახადებს, პროდუქტებს და სხვა სახის ოჯახისთვის საჭირო ხარჯს ყოფნიდა, ახლა იმის ნახევარსაც ვეღარ ყიდულობენ.

მთავრობა და პარლამენტი პენსიის ზრდისთვის ფინანსურ წყაროს ეძებენ. დეპუტატები მიიჩნევენ, რომ ბიუჯეტის პროექტით პენსიის გაზრდის რესურსი ნამდვილად არსებობს, ფინანსთა სამინისტროში კი აცხადებენ, მომატება შესაძლებელი მაშინ გახდება, თუ გადაწყდება, რომ სხვა მიმართულებით ხარჯი შემცირდეს. ამ დროისთვის გადაწყვეტილია, რომ სექტემბრიდან მთაში მცხოვრებთათვის პენსია 192 ლარამდე გაიზრდება. იმ შემთხვევაში, თუ ბარში მცხოვრებთა პენსიაც მოიმატებს, ეს ბიუჯეტს 1 წლის განმავლობაში 100 მლნ ლარი დაუჯდება.

სანაკრებო თამაშებმა ჩაიარა, გამოვლინდა ის ნაკრებები, რომლებიც ევრო 2016-ზე იასპარეზებენ. მათ შორისაა გერმანიაც, რომელმაც რამდენიმე დღის წინ საქართველოს 2:1 მოუგო. მატჩში მონაწილეობა მიიღო ლონდონის "არსენალის" ფეხბურთელმა მესუთ იოზილმაც, თუმცა "ჯვაროსანთა" კარი არ დაულაშქრავს. თურქული წარმოშობის გერმანელი ფეხბურთელი კლუბს დაუბრუნდა და ახლა საზრუნავი პრემიერლიგისა თუ ჩემპიონთა ლიგის მოგება დარჩა.

ანკარაში განვითარებული მოვლენების შემდეგ მოსალოდნელი ტერაქტების საფრთხეებზე საუბრობენ საქართველოშიც და ხელისუფლებას უსაფრთხოების ზომების გამკაცრებისკენ მოუწოდებენ. უსაფრთხოების საკითხებში ექსპერტ ვახტანგ მაისაიას თქმით, დაზღვეული არაფრისგან არ ვართ, რადგანაც გლობალური მეოთხე თაობის ომში ვართ ჩაბმული.

"ასე თუ მივყევით, შესაძლოა ქვეყანა ევრაზიული კავშირის წევრიც კი გახდეს და ამის შესახებ ინფორმაცია გადაწყვეტილების მიღებისას გავიგოთ. ფაქტია, რომ ჩვენ ყველას ერთად, მთელ საზოგადოებას გვაინტერესებს რა ხდება "გაზპრომთან" დაკავშირებით, თუმცა პასუხს ვერ ვიგებთ", - ამბობს "რეზონანსთან საუბრისას "თავისუფალი დემოკრატების" ერთ-ერთი ლიდერი და პარლამენტის ყოფილი ვიცე-სპიკერი, ზურაბ აბაშიძე.