ხვალ, 28 აპრილს, 5 საათზე მერიასთან მძღოლები და ავტომოყვარულები "სითი-პარკის" წინააღმდეგ აქციას მართავენ. მათი მთავარი მოთხოვნა კომპანიასთან ხელშეკრულების მოშლა და ქალაქიდან მისი გაძევებაა. შეუსრულებლობის შემთხვევაში კი 5 მაისს პარლამენტის წინ მორიგი, გაცილებით მასშტაბური აქციით იმუქრებიან.

საქართველოს მთავარმა საგამოძიებო უწყებამ საგარეო ფრონტზე კიდევ ერთი მარცხი განიცადა - საბერძნეთის უზენაესმა სასამართლომ ქართულ მხარეს დათა ახალაიას ექსტრადიციაზე უარი უთხრა. ბადაშვილის უწყებამ უარის თქმის მიზეზი ჯერჯერობით არ იცის. იურისტები კი საგარეო ფრონტზე ქართული მხარის მარცხს ორი მიზეზით ხსნიან. "ანტიკორუფციული პალატის" თავმჯდომარე პაატა შავაძე ამბობს, რომ პროკურატურაში ჯერ ისევ ძველი კადრები მუშაობენ, რომლებიც ხელს უშლიან გამოძიების მიმდინარეობას. საქართველოს საკონსტიტუციო სასამართლოს ყოფილი წევრი გია მეფარიშვილი კი "ოცნებას" დიპლომატიას უწუნებს და მასში კორექტირების შეტანას ურჩევს.

უკვე რამდენიმე დღეა, მომავალი სასაწავლო წლისათვის პირველკლასელთა რეგისტრაცია მიმდინარეობს და სექტემბრიდან მხოლოდ ის ბავშვები იქნებიან სკოლის მოსწავლეები, რომლებსაც 6 წელი სწავლის დაწყებამდე უსრულდებათ. თუმცა, კანონში შესაძლოა ცვლილებები შევიდეს და სკოლაში შესვლა იმ ბავშვებმაც შეძლონ, რომელთაც 6 წელი 31 დეკემბრამდე შეუსრულდებათ.

უკრაინის სამხრეთ-აღმოსავლეთ რეგიონებში მიმდინარე საბრძოლო მოქმედებებში საქართველოს ათობით მოქალაქე იბრძვის. მათი დიდი ნაწილი სამთავრობო ძალების შემადგენლობაშია. უკრაინის ტერიტორიული მთლიანობისათვის წარმოებულ ბრძოლებში უკვე სამი ქართველი მეომარი დაიღუპა. სოფელ შიროკინოში 18 აპრილს დაღუპული გიორგი ჯანელიძე თბილისში შაბათს ჩამოასვენეს.

ადვოკატთა ასოციაციის თავმჯდომარე ზაზა ხატიაშვილი მთავარ პროკურატურას ადვოკატებზე თავდასხმისა და მათი უფლებების შელახვის ფაქტების გამოსაძიებლად 30-დღიან ვადას აძლევს. მოთხოვნის შეუსრულებლობის შემთხვევაში კი ადვოკატთა საერთო ეროვნული გაფიცვით იმუქრება, რამაც შესაძლოა ქვეყანაში სასამართლოების პარალიზება გამოიწვიოს.

წელს, წინა 2 წლის მსგავსად, საქართველო დამოუკიდებლობის დღეს სამხედრო აღლუმის გარეშე აღნიშნავს. დამკვიდრებული ტრადიციისამებრ, იქნება საბრძოლო ტექნიკის გამოფენა-დათვალიერებაც და საზეიმო კონცერტიც. თუმცა, იქნება ერთი განსხვავებაც - თუკი წინა წლებში 26 მაისს სამხედრო ტექნიკა დედაქალაქის ყველა უბანში იყო გამოფენილი და კონცერტებიც ყველა უბარში ტარდებოდა, წელს ეს ყველაფერი მხოლოდ ერთ ადგილას იქნება - რუსთაველზე.

პოეტ მირზა გელოვანის ნეშტის საქართველოში გადმოსვენებასთან დაკავშირებით საზოგადოებრივი მაუწყებლის გენერალური დირექტორის მოადგილე თამაზ ტყემალაძე "მთელ კვირასთან" აცხადებს, რომ ამ მიმართულებით ნაბიჯები უკვე გადაგმულია და მიდის მუშაობა. მისი თქმით, მას, როგორც ინიციატორს, სურვილი აქვს, რომ მირზა გელოვანის ცხედარი ბელორუსიდან საქართველოში 8 მაისს გადმოასვენონ. ამ დღეებში იგი აპირებს ბელორუსში გამგზავრებას და დარწმუნებულია, რომ 8 მაისისთვის ეს საქმე მოესწრება. თუ სად დაკრძალავენ პოეტის ნეშტს, ეს საკითხი ჯერ უცნობია.

ტურინის "იუვენტუსი" ჩემპიონთა ლიგის ნახევარფინალში 12 წლიანი შესვენების შემდეგ იასპარეზებს. მაშინდელივით ფინალში გადასასვლელ შეხვედრაში იტალიური გრანდი მადრიდის "რეალს" შეერკინება.

დაძაბული ვითარებაა თერჯოლაში, სადაც ერთმანეთს რელიგიურ ნიადაგზე ადგილობრივი მართლმადიდებელი მრევლი და იეჰოვას მოწმეები უპირისპირდებიან. მართლმადიდებელი მოსახლეობის პროტესტს იწვევს ის, რომ იეჰოვას მოწმეები ქალაქის ცენტრში, საჯარო სკოლასთან ახლოს შენობის აშენებას აპირებენ, სადაც პერიოდულად შეიკრიბებიან ხოლმე. მართლმადიდებლები შიშობენ, რომ ეს ბავშვებზე გარკვეულ გავლენას მოახდენს.

სპორტისა და ახალგაზრდულ საქმეთა საპარლამენტო კომიტეტის დაპირისპირება სპორტის მინისტრთან კვლავ გრძელდება. გუშინ მინისტრმა ლევან ყიფიანმა საპარლამენტო კომიტეტის მიერ მისი მისამართით გამოთქმულ ბრალდებებს "თითიდან გამოწოვილი" უწოდა და განაცხადა, რომ საქმე პიროვნულ დაპირისპირებას ეხება.

"მიუხედავად იმისა, რომ რამდენიმე ადამიანის სიცოცხლეც კი ძალიან ძვირფასია, რამდენიმე ერთეული შემთხვევა, რაზეც საუბარია, სიტუაციის დრამატიზების საშუალებას არ ქმნის," - ამის შესახებ საპარლამენტო უმრავლესობის წევრმა ზაქარია ქუცნაშვილმა პანკისელ მოსახლეობასთან შეხვედრის შემდეგ განგვიცხადა.

ევროკომისია 13 მაისს წარმოადგენს თავის ანგარიშს საქართველოსა და უკრაინის მიერ იმ ვალდებულებების შესრულებასთან დაკავშირებით, რომელიც აუცილებელია ევროკავშირთან უვიზო მიმოსვლის მისაღებად. ამ დასკვნაზე დიდად იქნება დამოკიდებული, თუ რას მიიღებს საქართველო 21-22 მაისს რიგაში დაგეგმილ ევროკავშირის "აღმოსავლეთის პარტნიორობის" სამიტზე.