ინტერნეტ-მაღაზიების ნაწილს კრიზისიდან გამოსვლა უჭირს. ერთ წელიწადზე მეტია, რაც პრობლემა ამ ბიზნესში ლარის გაუფასურების გამო შეიქმნა. მართალია, კურსი ბოლო პერიოდში ოდნავ დასტაბილურდა, მაგრამ გაყიდვის გაუმჯობესება, მცირე გამონაკლისის გარდა, კომპანიებში ჯერჯერობით არ შეიმჩნევა.

ეროვნული ვალუტა, შესაძლოა, შემოდგომით ისევ გაუფასურდეს. ანალიტიკოსების პროგნოზით, დღეს ლარის გაძლიერებას მხოლოდ მოკლევადიანი ეფექტი ექნება და ზამთრის დასაწყისში ის კვლავ დაეცემა. გამორიცხული არ არის, რომ იმ პერიოდისთვის ერთი დოლარის ღირებულებამ 2,4-ის ნიშნულსაც კი გადააჭარბოს. ოპტიმისტური მოლოდინი აქვთ ეკონომიკის სამინისტროში, სადაც წლის ბოლოსთვის ლარის კურსის 2,2-2,25-ის ნიშნულზე დაბალანსებას ელიან. სებ-ი კი ეროვნული ვალუტის კურსზე კომენტარს ისევ არ აკეთებს, სამაგიეროდ, მისი ნახტომისებურ გამყარებას ბაზრიდან დოლარის ამოღებით აჩერებს.

ეკონომიკა წინ კუს ნაბიჯებით მიიწევს. შედეგად ქვეყნის მთავარი პრობლემების მოგვარება - უმუშევრობა, სიღარიბის დონის შემცირება ვერ ხერხდება. ხელისუფლებაში, ხშირად თავს იმით იმართლებენ, რომ მეზობელი ქვეყნები უარეს მდგომარეობაში არიან. სპეციალისტები კი აცხადებენ, რომ ეკონომიკას სჭირდება სტრუქტურული რეფორმები, რათა გაცილებით უფრო მაღალი ზრდა გვქონდეს და მოსახლეობის ცხოვრების დონე გაუმჯობესდეს.

ქართული სასოფლო-სამეურნეო პროდუქტის ფასი ოქტომბრამდე შენარჩუნდება. წინა წელთან შედარებით, ეროვნული ნაწარმი ცოტათი გაიაფდა. სპეციალისტების შეფასებით, ცვლილება სამომხმარებლო ბაზარზე ადგილობრივი ბოსტნეულის სიჭარბეს უკავშირდება, მაგრამ ეს დროებითი მოვლენაა და რამდენიმე თვეში იმპორტირებული პროდუქტით ჩანაცვლების საჭიროება დადგება.

დაცვის კომპანიების წარმომადგენელთა ინფორმაციით, წელს მომხმარებელი პასიურია. მათ ზოგიერთ შემკვეთთან ხელშეკრულების გაწყვეტაც უწევთ, რადგან ობიექტის დაცვის ხარჯს ყველა ვერ უმკლავდება. ასეთი კი, როგორც დაცვის კომპანიებში განმარტავენ, მომხმარებელთა დაახლოებით 10-15%-ია, რომელსაც პრობლემა ლარის გაუფასურების გამო შეექმნა.

2016 წლის 2 კვარტლის მონაცემებით, საქართველოში ხორცისა და ხორცპროდუქტების წარმოება კატასტროფულად მცირდება. სპეციალისტები ამ ფაქტს ორი მიზეზით ხსნიან - ერთია ის, რომ 2016 წელს ხორცის ექსპორტი გაიზარდა, რის გამოც პირუტყვის სულადობრივი მაჩვენებელი შემცირდა, მეორე - ქვეყანაში საძოვრების დეფიციტია.

ქვეყანაში ექსპორტის ვარდნა გრძელდება. ერთ-ერთ მთავარ საექსპორტო პროდუქტს ფეროშენადნობებს საერთაშორისო ბაზრებზე ისევ რეალიზაციის პრობლემა აქვს. თხილისა და ღვინის ექსპორტი ზრდის ტენდენციით ხასიათდება, მაგრამ ამ პროდუქტების წილი მთლიან ექსპორტში იმდენად მცირეა, რომ სხვა პროდუქტების შემცირების კომპენსირებას ვერ ახდენს. რაც შეეხება იმპორტს, პირველ ადგილზე კანადიდან შემოტანილი "ცე ჰეპატიტის" მედიკამენტებია, მას კი ნავთობპროდუქტები მოსდევს.

წელს თხილის ხარისხთან დაკავშირებით ბევრი უზუსტობაა. ექსპორტიორებისა და თხილის შემსყიდველების მიერ გავრცელებულ ინფორმაციას, რომ პროდუქტი უხარისხოა, გლეხები კატეგორიულად უარყოფენ. საქართველოს თითქმის ყველა რეგიონში, სადაც თხილი მოყავთ, ხალხი თხილის ხარისხით უკმაყოფილო აშკარად არ არის. მოსახლეობა ეჭვობს, რომ მეწარმეები ხმას სპეციალურად ავრცელებენ, რომ პროდუქტი იაფად შეისყიდონ.

საქართველოდან თურქეთში ნახევარფაბრიკატი ხორცის გატანა განიხილება. "ფერმერთა ასოციაციაში" მიიჩნევენ, რომ ნახევარფაბრიკატი საკმაოდ ძვირადღირებული პროდუქტია და ამ იდეის რეალიზაცია მეცხოველეობის განვითარებას მნიშვნელოვნად შეუწყობს ხელს.

სავალუტო კრიზისის გამო მეზობელ ქვეყნებში კომერციული ბანკები იხურება. ბოლო ორი დღის განმავლობაში აზერბაიჯანში კიდევ ორი ბანკი - "კავკასიის განვითარების ბანკი" და "ატრაბანკი" გაკოტრდა. აღნიშნული ფაქტის გამო კი, "კავკასიის განვითარების ბანკ - საქართველოში" სებ-მა დროებითი მმართველი დანიშნა.

სოციალურად დაუცველი მოსახლეობის შენახვა და მათთვის დაწესებული გარკვეული შეღავათები სახელმწიფოს საკმაოდ ძვირი უჯდება. ბოლო 5 წლის განმავლობაში ბიუჯეტიდან სოციალური დახმარებებისთვის გათვალისწინებულმა ასიგნებებმა დაახლოებით 146%-ით მოიმატა და დღეს ის მთლიანი ბიუჯეტის 6,7%-ს შეადგენს, ამ დროს კი 5,3%-ით შემცირდა.

ქართულ ალტერნატიულ ენერგეტიკაში ფიქლის გაზი არ მოიაზრება. მის დასადგენად კვლევები არ ჩატარებულა, უფრო მეტიც, ქართველი გეოლოგები ექსპერიმენტების საჭიროებას არც ხედავენ და ამტკიცებენ, რომ ფიქლის გაზი საქართველოში არ არსებობს. ევროპაში კი რუსული გაზის ერთ-ერთ ალტერნატივად სწორედ ფიქლის გაზს მოიაზრებენ და მის მოპოვებაზე აქტიურად მუშაობენ.