საქართველოსა და ჩინეთს შორის სავაჭრო-ეკონომიკური ურთიერთობა ახალ ეტაპზე გადადის. მთავრობა ამით ექსპორტის გაზრდასა და წარმოების სტიმულირებას ცდილობს. როგორც სპეციალისტები ირწმუნებიან, ეს პროცესი სამომავლოდ გარკვეულ მოგებას მოგვცემს.

საბანკო სექტორში ტოტალური გამსხვილების პროცესის პარალელურად, მიკროსაფინანსო ორგანიზაციების ბანკებად გარდაქმნა იწყება. მიკროსაფინანსოებს კომერციული ბანკის სტატუსის მოსაპოვებლად შესაბამისი კაპიტალი გააჩნიათ, მთავარია, სურვილი ჰქონდეთ. ამ რამდენიმე ხნის წინ საფინანსო ბაზარზე მსგავს ტენდენციას საფუძველი "ფინკა ბანკმაც" მისცა, რომელიც მანამდე მიკროსაფინანსო ორგანიზაციას წარმოადგენდა.

ექსპორტ-იმპორტს შორის სხვაობა საგანგაშოდ იზრდება. საქართველოს უარყოფითმა საგარეო სავაჭრო ბალანსმა იანვარ-აგვისტოში უკვე 65%-ს მიაღწია. იმ შემთხვევაში, თუ ექსპორტის მაჩვენებელი არ გაიზარდა, უახლოეს მომავალში ეს ქვეყნის მაკროეკონომიკურ მდგომარეობას საფრთხეს შეუქმნის. ანალიტიკოსები ამბობენ, რომ ამისათვის აუცილებელია რეალური სექტორის განვითარება და კონკურენტუნარიანი პროდუქციის წარმოება. სხვა შემთხვევაში, ყველა სახელმწიფო რესურსი წყალში გადაყრილი აღმოჩნდება.

გაზგასამართი სადგურები მძღოლებს ყოველ ნაბიჯზე ატყუებენ. გარდა იმისა, რომ აირბალონებს დაუშვებლად მაღალ ატმოსფეროზე ტუმბავენ, გაზგასამართ ობიექტებში სისტემა ტექნიკურადაც ისეა მოწყობილი, რომ მყიდველი შეძენილი აირის მოცულობასა და ფასშიც მოტყუვდეს. თბილისში აირბალონები ყველგან 220-230 ატმოსფეროზე იტუმბება, ხოლო რეგიონებში ეს მაჩვენებელი 250-260 ატმოსფეროსაც აღწევს, რაც უსაფრთხოების ნორმის უხეში დარღვევაა და ნებისმიერი ასეთი შემთხვევა შესაძლოა, ფატალური შედეგითაც დამთავრდეს.

ეროვნული ვალუტის კურსი დოლარის მიმართ ერთ ადგილზე გაიყინა, არადა, ფინანსისტების ნაწილი წინასაარჩევნოდ ლარის გამყარებას ვარაუდობდა. ასეთი მოლოდინი იყო საზოგადოებაშიც. ის კი არა ბოლო დღეებში ეროვნული ვალუტა ცოცვა-ცოცვით გაუფასურდა კიდეც. ამიტომ მოსახლეობა შიშობს, რომ არჩევნების შემდეგ ლარის გაუფასურება განახლდება, რადგან მათ ყველა იმედი გაუცრუვდათ და ირგვლივ ვერაფერ სანუგეშოს ვერ ამჩნევენ.

საქართველოში მინიმალური ხელფასის ოდენობა კერძო სექტორში 20 ლარს, ხოლო საჯარო სექტორში 135 ლარს შეადგენს. თანაც, ეს მხოლოდ პრეზიდენტის ბრძანებულებითაა განსაზღვრული და მასზე ჩანაწერი კანონში არ არსებობს. ამიტომ, საქართველოს პროფესიული კავშირების გაერთიანება და სახალხო დამცველის აპარატი მთავრობას რეკომენაციას აძლევს და კანონში "მინიმალური ხელფასის" შესახებ ჩანაწერის გაკეთებას სთავაზობს. რაც შეეხება მინიმალური ხელფასის ოდენობას, პროფკავშირებშიც და ომბუდსმენის აპარატშიც მიაჩნიათ, რომ მისი დადგენისას გათვალისწინებულ უნდა იქნეს სამმხრივი კომისიის რეკომენდაციები-კონსულტაციები და მისი კორექტირება პერიოდულად, ქვეყანაში მიმდინარე ეკონომიკური პროცესების შესაბამისად უნდა ხდებოდეს.

ყოფილი ბიზნესმენი თამაზ ხუხაშვილი კუთვნილი ქონების უკანონოდ წართმევაში წინა ხელისუფლების მაღალჩინოსნებს ადანაშაულებს. ის ბრალს სდებს ეკონომიკის მინისტრის მოადგილე კახა დამენიას და მის მიმართ სისხლის სამართლის საქმის აღძვრას მოითხოვს. ბიზნესმენი წართმეული ქონების კომპენსაციასაც ითხოვს, რომლის ჯამური ოდენობა 210 000 აშშ დოლარია.

ნავთობპროდუქტების იმპორტის რამდენიმეთვიანი ზრდა აგვისტოში დასრულდა. იმპორტიორებმა საქართველოში 37 ათასი ტონით ნაკლები ნავთობპროდუქტები შემოიტანეს. გარკვეულწილად, ეს ფაქტი უკავშირდება იმასაც, რომ აჭარიდან თურქეთის მოქალაქეებმა ბენზინისა და დიზელის გადატანის მასშტაბები შეამცირეს.  პარალელურად, მცირედით გაიზარდა ნავთობის ფასი საერთაშორისო ბაზარზე, თუმცა ამ პროცესს საქართველოს საცალო ქსელში გავლენა არ მოუხდენია.

საქართველოში უმუშევრობის პრობლემა დღემდე მწვავედ დგას.  ამიტომაც, წინასაარჩევნო პერიოდში პოლიტიკური პარტიების მხრიდან "დამატებითი სამუშაო ადგილების შექმნის" დაპირება ერთ-ერთ მთავარ პუნქტად იქცევა. ამჯერადაც, პარტიები ჩვეულ სტილს არ ღალატობენ და გამარჯვების შემთხვევაში ათეულობით ათასი სამუშაო ადგილის შექმნის პირობას დებენ. ზოგი 135 ათასზე საუბრობს, ზოგი - 200 ათასზე, ზოგიერთის სურვილი უფრო ამბიციურია და მომავალი 4 წლის განმავლობაში დამატებით 250 ათასი ადამიანის დასაქმებაზე აკეთებს გათვლას.

ბინის ქირაობა გაიაფდა. უძრავი ქონების სააგენტოების ინფორმაციით, წლევანდელ სეზონზე ფასი 50-200 დოლარით ნაკლებია, გააჩნია ბინის ფართს და ადგილმდებარეობას. დილერები ქირის ღირებულების შემცირების ტენდენციას მოთხოვნის კლებით ხსნის.  ჯერჯერობით აქტიურობით არც სტუდენტები გამოირჩევიან. ისინი მცირე იაფფასიან ბინებს ეძებენ, რაც სააგენტოებს თითქმის არ აქვთ.

ქართული პომიდორი და კარტოფილი, ძირითადად, ადგილობრივ ბაზარზე იყიდება. ფერმერების ინფორმაციით, უცხოურ ბაზრებზე ისინი ამჯერად უფრო ნაკლებად გადის, რამაც გარკვეული გავლენა ფასზეც მოახდინა. წინა წელთან შედარებით, სამომხმარებლო ბაზარზე პომიდვრისა და კარტოფილის ყიდვა 30-40 თეთრით ნაკლებადაა შესაძლებელი.

"ქართული ოცნების" წინასაარჩევნო ეკონომიკური პროგრამის მიღმა რამდენიმე ისეთი საკითხი დარჩა, რაც წინა არჩევნების წინ მმართველი გუნდისთვის ერთ-ერთი პრიორიტეტი იყო. მათ შორის, სამართლიანობის აღდგენის საკითხი, ანტიმონოპოლიური საქმიანობის პერსპექტივა ქვეყანაში და სხვა. ყველაზე მიმზიდველი წელსაც სამუშაო ადგილების შექმნაა, თუმცა მმართველი პარტიის არგუმენტს დამაჯერებლობა აშკარად აკლია.