მოსახლეობას კრედიტის გადახდა სულ უფრო და უფრო უჭირს. ეროვნული ვალუტა კი გაუფასურებას განაგრძობს. სერიზული საფიქრალი გაუჩნდათ ბანკებსაც. კლინტების მხრიდან ვადაგადაცილება მატულობს. ლარი დოლართან მიმართებაში 2,5 ლარს თუ მიაღწევს, მდგომარეობა ძალიან დაიძაბება და ბანკები ვალის ამოღებას ვეღარ შეძლებენ.

მთავრობა დამატებული ღირებულების გადასახადის გადახედვას არ აპირებს. მსხვილი ბიზნესის წარმომადგენლების მოთხოვნას, რომ შეღავათი დაუწესდეთ ან დღგ-ს გადასახადი გაუქმდეს, ჯერჯერობით რეაგირება არ მოჰყოლია. საპარლამენტო უმრავლესობაში აცხადებენ, რომ არსებულ სიტუაციაში ბიზნესთან ასეთ დათმობაზე არ წავლენ.

თბილისის უპრეცედენტო ბიზნესფორუმს საქართველო ლარის გაუფასურების ფონზე მასპინძლობს. სპეციალისტები ვარაუდობენ, რომ ამით ქვეყნის საინვესტიციო გარემო დაზარალდება, ინვესტორები კი ზედმეტ სიფრთხილეს გამოიჩენენ.

ჭარბმა ნალექმა გლეხებს პრობლემა შეუქმნა. გურჯაანის რაიონში ატმის ბაღებს დაავადება, ე.წ. "ხუჭუჭა" მოედო. ლაგოდეხისა და სიღნაღის რაიონში საზამთროს ბაღების ნაწილი გაფუჭდა, დასავლეთ საქართველოში კი თხილს ტკიპა გაუჩნდა. გლეხების დიდ ნაწილს აგროდაზღვევის პროგრამაში სახელმწიფოს თანამონაწილეობის მიუხედავად, მოსავალი დაზღვეული არ აქვს.

სასოფლო-სამეურნეო მიწების უცხოელებზე მიყიდვის შესახებ კანონპროექტი ისევ ჰაერშია გამოკიდებული. პარლამენტში ჯერ პროექტის საბოლოო ვერსიაზეც კი ვერ შეჯერებულან. კანონის დამტკიცებამდე უცხოელები მიწას უპრობლემოდ იძენენ.

ეროვნული ბანკის პრეზიდენტი ლარის დევალვაციაზე კომენტარს ისევ არ აკეთებს და ამბობს, რომ დეტალებზე მომავალ კვირას პარლამენტში ანგარიშის წარდგენისას ისაუბრებს. მანამდე კი ქადაგიძის ქმედებებს კანონმდებლები ისევ აკრიტიკებენ. დეპუტატთა აზრით, ლარის დევალვაციის ერთ-ერთი მიზეზი სწორედ ეროვნული ბანკის დაგვიანებული რეაქცია გახდა.

ევროპის რეკონსტრუქციისა და განვითარების ბანკის ყოველწლიური ფორუმი დაიწყო. საქართველოს დედაქალაქი 4 ათასზე მეტ ადამიანს მასპინძლობს. აღნიშნული ფორუმის ფარგლებში, ევრობანკი 5-წლიან სამოქმედო სტრატეგიას დაამტკიცებს. საქართველოს კი ეძლევა საშუალება, წარმოაჩინოს საკუთარი შესაძლებლობა ეკონომიკის განვითარების კუთხით.

ქვეყანაში მომსახურება გაძვირდა. სხვადასხვა სფეროში ფასმა 5-10%-ით მოიმატა. კომპანიებში აცხადებენ, რომ რთული გადაწყვეტილება ლარის გაუფასურების გამო მიიღეს.

ქართული ავეჯის ექსპორტს პრობლემა აქვს. ადგილობრივი ნაწარმი უმეტესწილად აზიის ქვეყნებში იყიდება, თუმცა ბოლო დროს მოთხოვნა შემცირდა, რის გამოც კომპანიებმა ექსპორტი შეამცირეს, ზოგმა საერთოდაც გაურკვეველი პერიოდით შეაჩერა.

ყაზახეთიდან, რომელიც საქართველოსთვის ერთ დროს მთავარი ინვესტორი ქვეყანაც კი იყო, ინვესტიციები მკვეთრად მცირდება. გახშირდა შემთხვევა, როდესაც ყაზახურ კომპანიებში სხვადასხვა სახის პრობლემა იქმნება. სპეციალისტები მიუთითებენ, რომ ხშირ შემთხვევაში ეს ყაზახური მენეჯმენტის ბრალია.

საქართველოში, შესაძლოა, ბუნებრივი აირის ტარიფი შემცირდეს, ელექტროენერგიის კი გაიზარდოს. დენის გაძვირების შემთხვევაში, როგორც ენერგეტიკის მინისტრი აცხადებს, მთავრობა სუბსიდირებას განახორციელებს. ამასთან, კალაძე ტარიფების გადახედვასთან დაკავშირებით კომპანიების განაცხადს ლარის გაუფასურებით ხსნის, თუმცა ამბობს, რომ "არანაირი პანიკის საფუძველი არ არსებობს".

ეროვნული ვალუტა გაუფასურებას განაგრძობს. შესაბამისად, საზოგადოება აღნიშნულთან დაკავშირებით უფრო მეტ განმარტებას ითხოვს. ეროვნულმა ბანკმა პასუხისმგებლობა მოიხსნა და ამბობს, რომ იგი მხოლოდ ფინანსურ სტაბილურობასა და ინფლაციაზეა პასუხისმგებელი. მიზნობრივი ინფლაცია კი 5%-ია, სტატისტიკის ეროვნული სამსახური კი 3%-ზე ნაკლებს აჩვენებს. იყო თუ არა სწორი, როდესაც საქართველო ინფლაციის "თარგეთირების" მოდელზე გადავიდა ან რამდენად სწორად განისაზღვრა 5%-იანი ინფლაციური ზღვარი?