ეროვნული ბანკის ანგარიში პარლამენტის საფინანსო-საბიუჯეტო კომიტეტმა უარყოფითად შეაფასა. უმრავლესობის წევრმა დეპუტატებმა აღნიშნეს, რომ მათ კითხვებზე ამომწურავი პასუხი ვერ მიიღეს. ზოგიერთმა მათგანმა ქადაგიძის გამოსვლა დემაგოგიად შეაფასა და აღნიშნა, რომ სებ-ის პრეზიდენტი ციფრებით მანიპულირებდა. სხდომაზე ქადაგიძეს რამდენიმე ბანკის გაკოტრების საკითხი და 2009-10 წლებში მიკროსაფინანსო ორგანიზაციებზე ზეწოლის საქმეებიც შეახსენეს.

იმპორტირებულ პროდუქციაზე დღეს არსებული ფასის შენარჩუნება მხოლოდ იმ შემთხვევაშია შესაძლებელი, თუკი ეროვნული ვალუტა დოლართან მიმართებაში 2,1-2,2 ლარის ნიშნულზე დაბალანსდება. წინააღმდეგ შემთხვევაში, როგორც "ბიზნეს-რეზონანსთან" საუბრისას მსხვილი იმპორტიორები აცხადებენ, ბაზარზე პროდუქტი კიდევ გაძვირდება. სავაჭრო ობიექტებში ფასი დღეს არსებული კურსის შემთზვევაშიც მოიმატებს, რამდენადაც, იმპორტიორების თქმით, ძველი ნაშთი ამოწურულია და მათ პროდუქცია უკვე "გაძვირებული დოლარით" შემოაქვთ.

სუპერმარკეტებისა და მაღაზიების დიდ ნაწილში პურის შენახვის ნორმები დაუდევრად ირღვევა. საქართველოში სარეალიზაციო პურის 60%-ს დართული აქვს არასწორი ეტიკეტი, ხოლო სანიტარიულ-ჰიგიენური ნორმების დაცვის მხრივ არსებულ დარღვევათა მასშტაბი 70%-ს აღწევს.

მარწყვის წლევანდელი სეზონი ჩავარდნას გადაურჩა. მართალია, უამინდობამ კახეთის რამდენიმე სოფელში მოსავლის დიდი ნაწილი დააზიანა, მაგრამ დანაკარგს მარწყვის ბიზნესზე სერიოზული გავლენა არ მოუხდენია.

კახეთში წელს ყურძნის უხვ მოსავალს ელიან, თუმცა ღვინის ექსპორტის შემცირება, სავარაუდოდ, ყურძენის შესყიდვასა და მის ფასზე გავლენას მოახდენს. ღვინის კომპანიები "ბიზნეს-რეზონანსთან" აცხადებენ, რომ მათ ღვინის დიდი მარაგი აქვთ, შესაბამისად, ყურძენს ისეთი რაოდენობით ვეღარ შეისყიდიან, როგორიც შარშან.

მთავრობის წლევანდელი საინვესტიციო თამასა ერთი მილიარდი დოლარია. როგორც ეკონომიკის მინისტრის მოადგილე აცხადებს, ხელისუფლებას ასეთი მოლოდინის საფუძველს ქვეყანაში ბოლო პერიოდში გამართული რამდენიმე ბიზნესფორუმი აძლევს. უცხოურ ინვესტიციებთან დაკავშირებით ოპტიმისტური პროგნოზი აქვთ ეკონომისტებსაც. მათი აზრით, იმ შემთხვევაში, თუ ხელისუფლებამ სწორი ეკონომიკური პოლიტიკა განახორციელა, გამორიცხული არ არის, რომ საინვესტიციო მონაგარმა 1,5 მლრდ-საც კი გადააჭარბოს.

ფინანსთა სამინისტრო სახელმწიფო ბიუჯეტში ცვლილებების შეტანაზე უკვე მუშაობს. დაზუსტებული მონაცემები პარლამენტში კვარტალის ბოლოს შევა. ამასთან, მთავრობამ ეკონომიკური ზრდის ახალი პროგნოზიც უნდა წარმოადგინოს. სპეციალისტების ვარაუდით, ბიუჯეტი, დაახლოებით, 5%-ით შემცირდება.

ეროვნულ ბანკს საბანკო ზედამხედველობის ფუნქციას ხელმეორედ ჩამოართმევენ. ხელისუფლება ჩქარობს და ეს საკითხი პარლამენტმა რაც შეიძლება სწრაფად უნდა მოაგვაროს. ამ გადაწყვეტილების მიზეზი სებ-ის პრეზიდენტისადმი ხელისუფლების უნდობლობა გახდა.

დედაქალაქში მდებარე ვალუტის გადამცვლელ პუნქტებში დოლარზე მოთხოვნა მკვეთრად შემცირდა. მოსახლეობა ელოდება, რომ ლარი უფრო მეტად გამყარდება და დოლარის შესყიდვისგან თავს იკავებს. ამასობაში, ეროვნული ბანკის ოფიციალური კურსით, 1 ლარი 2,25-ის ნიშნულამდე გამყარდა. შიდა სავალუტო ბაზარზე ხელოვნურად გამოწვეული აჟიოტაჟი ჩაცხრა.

მსუბუქი ავტომობილების ექსპორტი პოზიციას თმობს. საექსპორტო თვალსაზრისით ამ ჯგუფმა პირველიდან მეორე ადგილზე გადაინაცვლა. დიდია ალბათობა, რომ წლის მეორე კვარტალში ავტომობილები საექსპორტო სამეულიდანაც კი ამოვარდეს.

ევროპა რუსეთზე ენერგოდამოკიდებულების შემცირებისთვის ემზადება. ტრანსანატოლიური გაზსადენის (ტანაპი) მშენებლობა უკვე დაიწყო, მისი განშტოების - ტაპ-ის პროექტის განხორციელება კი 2016 წლის მაისიდან დაიწყება. მშენებლობის დაწყებაზე ნებართვას ხელს იტალიის ეკონომიკის განვითარების მინისტრმა უკვე მოაწერა.

საქართველოში პირუტყვისა და ფრინველის რაოდენობა იზრდება. შესაბამისად, მეცხოველეობაში წინსვლაა. დარგის სპეციალისტები აღნიშნავენ, რომ საქართველოს თავისუფლად შეუძლია 1,7 მილიონი რქოსანი პირუტყვის ყოლა. ასევე აქვს შესაძლებლობა, იყოლიოს 35-40 მილიონი ფრთა ქათამი, რაც მოხსნის ამ სფეროში არსებული პრობლემებს.