სტიქიური უბედურებისგან გამოწვეულ ზარალს წელიწადის ამ დროს ყველაზე მეტად გრძნობს ქვეყანა. მოსახლეობას უფრო ხშირად წყალდიდობისგან მიყენებული ზარალის დათვლა და მასთან გამკლავება უწევს. საქართველო ყოველწლიურად სტიქიისგან 300 მლნ დოლარით ზარალდება. ეკოლოგები ამბობენ, რომ ეს მასშტაბები სამომავლოდაც გაიზრდება.

უახლოეს დღეებში ბათუმში საქართველო, თურქეთი და აზერბაიჯანი თავდაცვის სფეროში ურთიერთობის გაღრმავებისთვის სამმხრივი ფორმატის თანამშრომლობის მემორანდუმის გაფორმებას გეგმავენ, რაც ექსპერტების ნაწილში უკვე ფასდება, როგორც რეგიონში ერთგვარი ახალი საპირწონე ალიანსის შექმნა - თურქულ-ქართულ-აზერბაიჯანული თანამშრომლობა სომხურ-რუსულ და ალბათ პლუს ირანის გაერთიანების დასაბალანსებლად.

5 მაისს აშშ-ის პრეზიდენტ დონალდ ტრამპის მიერ საქართველოს ტერიტორიული მთლიანობის მხარდამჭერი აქტის ხელმოწერას ოკუპირებული აფხაზეთის ე.წ. საგარეო საქმეთა სამინისტროს მწვავე გამოხმაურება მოჰყვა.

თურქეთში წყალსაცავის დაცლის და პარალელურად საქართველოს ტერიტორიაზე ბოლო დღეებში მოსული ინტესიური ნალექების გამო მდინარე მტკვრის დონე 50-60 სმ-ით მოიმატებს. თუმცა, სპეციალისტების მტკიცებით, მოსახლეობას ამ ეტაპზე საფრთხე არ ემუქრება, რადგან უქმეებზე ნალექების შემცირებს ელოდებიან. გარემოს დაცვის ეროვნული სააგენტოს ჯგუფი მდინარე მტკვრისა და ხევთისის ტერიტორიაზე საგანგებო რეჟიმში მუშაობს.

სოფელ იონჩასთან, ზნაურის მიმართულებით, ზაფხულიდან ახალ მავთულხლართებს გააბამენ, - ამის შესახებ ინფორმაციას ჟურნალისტი გოგა აფციაური ავრცელებს.

საერთაშორისო ორგანიზაციები ეკონომიკური ზრდის შესახებ საქართველოს მთავრობის მონაცემებს არ ენდობიან. მათი შეხედულება სებ-ისა და მთავრობის მოსაზრებას აცდენილია. თუკი მსოფლიო ბანკი დღემდე ქვეყნისთვის 5.2%-იან ზრდას პროგნოზირებდა, ეს მაჩვენებელი მან 3.5%-მდე ჩამოიყვანა. იგივე ნაბიჯი გადადგა ცოტა ხნის წინ სავალუტო ფონდმაც. ჯერჯერობით უცვლელია საქართველოს ეროვნული ბანკის პოზიცია, რომლისთვისაც ეკონომიკური ზრდის ნიშნული 4%-ის ფარგლებშია.

სკოლის მოსწავლეებს რეპროდუქციული და სქესობრივი ჯანმრთელობისა და უფლებების ძირითად საკითხებთან დაკავშირებით სემინარები ჩაუტარდებათ. აღნიშნული რეკომენდაცია პარლამენტს ომბუდსმენმა მიაწოდა, რომელიც ადამიანის უფლებათა დაცვის კომიტეტმაც გაიზიარა.

საკონსტიტუციო კომისიის სახალხო განხილვა დასასრულს უახლოვდება. კონსტიტუციის პროექტთან დაკავშირებით 7 რეგიონში მოსახლეობამ საკუთარი პოზიცია უკვე გამოთქვა. როგორც აღმოჩნდა, ძირითადი შენიშვნები საარჩევნო საკითხებს ეხებოდა, თუმცა გაიზიარებს თუ არა "ოცნება" მათ პოზიციას, უცნობია. შეხვედრების შეჯამებას პარლამენტის თავმჯდომარე სახალხო განხილვის დასრულების შემდეგ აპირებს.

ბოლო დროს აქტიურად მიმდინარეობს საუბარი, რომ ქვეყანაში ამდენი კომერციული ბანკი საჭირო არ არის და მათი რაოდენობა 5-7-ს არ უნდა აღემატებოდეს. ამჟამად საქართველოში 16 ბანკია და მათი გამესამედება კონკურენციას შეამცირებს, ხოლო მომსახურებას გააძვირებს. საბანკო სფეროს სპეციალისტები ფიქრობენ, რომ კომერციული ბანკების ოლიგოპოლიას ხელს ეროვნული ბანკი უწყობს, რომელმაც, შესაძლოა, პროცესი ხელოვნურად დააჩქაროს.

პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი სამხედრო-სავალდებულო სამსახურში გაწვევისგან თავის არიდებასთან დაკავშირებით საკანონმდებლო ცვლილებებზე მუშაობას იწყებს, რისი მიზეზიც პოლიტიკური გაერთიანება "გირჩის" მიერ რეგისტრირებული რელიგიური ორგანიზაცია "ბიბლიური თავისუფლება" გახდა. აღნიშნული ორგანიზაციის მიზანი კი ახალგაზრდების მღვდელმსახურებად კურთხევა და ამ გზით სავალდებულო სამხედრო სამსახურის გადავადებაში დახმარებაა.

ამ კვირაში ტყიბულის შახტში 4 ახალგაზრდა მაღაროელი დაიღუპა. მათი პირობების გაუმჯობესების მოთხოვნით თბილისსა და ქუთაისში საპროტესტო აქციები მოეწყო.

"არ მიმაჩნია, რომ საკონსტიტუციო განხილვა კარგად არის გააზრებული. ასეთი დებატები მოსახლეობას შეუძლია ნახოს გადაცემებში, პარლამენტში და ა.შ. სახალხო განხილვის მთავარი რესურსი არის ის, რომ საზოგადოების მონაწილეობა გახდეს უფრო აქტიური და მათი მხარე დაინახონ პოლიტიკოსებმა, ვიდრე პირიქით. ეს რესურსი კი არასდროს არის გამოყენებული და განხილვა კარგავს ფუნქციას", - აცხადებს პოლიტოლოგი რამაზ საყვარელიძე "რეზონანსთან" საუბრისას.