ეროვნულმა ბანკმა მუდმივმოქმედი რეფინანსირების სესხი აღარ გასცა. 9 თვის განმავლობაში ეს არის პირველი შემთხვევა, როდესაც კომერციულმა ბანკებმა სებ-ისგან "ლიკვიდურობის აღმოსაფხვრელად" მხოლოდ ჩვეულებრივი რეფინანსირების სესხი მიიღეს. სპეციალისტები ეროვნული ბანკის ამ გადაწყვეტილებას ინფლაციის მაჩვენებლით ხსნიან. მათი აზრით, სებ-ი ფასების "მოსათოკად" იძულებულია, ეკონომიკაში "ფულის გაშვებაზე" უარი თქვას.

წინასაახალწლოდ სავაჭრო ობიექტებში ფასადაკლების აქციები დაიწყო. თითქმის ყველგან წამახალიებელ აქციებს მომხმარებლის მოსაზიდად იყენებენ და რეალურად შემცირებულ ფასს ვერსად ნახავთ. ამიტომ ხშირად მომხმარებელს შეგულებული ნივთის ყიდვა უმნიშვნელო ფასდათმობით ან სულაც ძველი ფასით უწევთ. ესეც მაშინ, როცა საახალწლო აქცია 50-70%-ის ფარგლებში მიმდინარეობს.

წლის ბოლოს ეკონომიკა, სავარაუდოდ, 3%-მდე გაიზრდება. ბოლო წლების განმავლობაში, ეს იქნება პირველი შემთხვევა, როდესაც ეკონომიკური ზრდა პროგნოზირებულზე უფრო მაღალი იქნება. ასევე 3%-იან მატებას ვარაუდობენ საერთაშორისო ორგანიზაციები 2016 წელსაც, თუმცა ისიც ნათელია, რომ მათი პროგნოზი ხშირად არ მართლდება. შესაბამისად, არც ის არის გამორიცხული, მომავალ წელს ეკონომიკური ზრდის მიმართულებით სრულიად განსხვავებული სურათი მივიღოთ.

თურქეთში გამომავალ გაზეთ "ჯუმჰურიეთის" მთავარი რედაქტორი ჯან დუნდარი და ამავე გაზეთის ანკარის წარმომადგენელი ერდემ გიული ქალაქებში ადანაში და ჰატაიში თურქეთის ეროვნული სადაზვერვო სამსახურის ტრაილერებით იარაღის გადაზიდვასთან დაკავშირებით მომზადებული სტატიის გამო დააპატიმრეს.

გასულ კვირას თურქეთში ხელისუფლებამ მისდამი ოპოზიციურად განწყობილი, ქვეყნის ერთ-ერთი ყველაზე ძლიერი ფინანსური სტრუქტურის მქონე დაწესებულების, ჰოლდინგ "კაინაკში" შემავალი კომპანიების მმართველობა ჩაიბარა.

კინორეჟისორი გიორგი შენგელაია აცხადებს, რომ ორ დეპუტატს - სოსო ჯაჭვლიანსა და ირაკლი ტრიპოლსკის კინოსტუდია "ქართული ფილმის" ხელში ჩაგდება სურს. რეჟისორი ამბობს, რომ სწორედ ამ მიზნით, მათ ბიძინა ივანიშვილი შეცდომაში შეიყვანეს.

რუსეთ-თურქეთს შორის დაძაბული ვითარების ფონზე, ზამთრის საკურორტო სეზონის განმავლობაში საქართველომ შესაძლოა, რუსი ტურისტების რეკორდულ რაოდენობას უმასპინძლოს. ცნობილი ონლაინ ტურისტული სააგენტო "ტრიპსტას" კვლევების მიხედვით, იმ ქვეყნების სიაში, სადაც რუსები ზამთრის შვებულების გატარებას აპირებენ, საქართველოს უპრეცედენტოდ მაღალი - მესამე ადგილი უჭირავს.

ხვალ, 1-ელ დეკემბერს ვარშავაში ნატო-ს მინისტერიალი იხსნება, საიდანაც ოფიციალური თბილისი "ძალიან ოპტიმისტურ" გზავნილს ელოდება. თუმცა ვიზა ლიბერალიზაციის პოზიტიური მოლოდინისაგან განსხვავებით, ამ შემთხვევაში პროგნოზი არცთუ დამაიმედებელია: ბლოკში გაწევრიანებას შესთავაზებენ მონტენეგროს, საქართველოს კი - სავარაუდოდ, არაფერს და დღესდღეობით არც მომავალი წლის ვარშავის სამიტისთვისაა დაგეგმილი არც მაპ-ის და მით უმეტეს, არც გაწევრიანების შემოთავაზება.

თბილისში, მოსკოვის გამზირზე უსახლკაროთათვის გაშლილ კარვების ქალაქს უახლოეს პერიოდში აიღებენ. მათი გადაყვანა ლილოში მშენებარე თავშესაფარში მოხდება, რომელიც, როგორც მერიაში აცხადებენ, უახლოეს მომავალში იქნება მზად.

საკრებულოს დეპუტატ რიმა ბერაძის თქმით, დღეში ერთი ადამიანისთვის საკვებად 1.18 ლარი საკმარისია - ეს განცხადება დეპუტატმა უფასო სასადილოების ბიუჯეტზე საუბრისას გააკეთა.

საბავშვო ბაღების მშენებლობა, მეტროსადგურების რეაბილიტაცია, ავარიული შენობების გამაგრება, ხიდებისა და გვირაბების მოწყობა, საზოგადობრივი ტრანსპორტის ავტოპარკის განახლება - ესაა დედაქალაქის 2016 წლის ბიუჯეტით გათვალისწინებული პრიორიტეტების არასრული ჩამონათვალი.

მარტვილის რაიონის სოფელ ნახუნაოში მკვლელობა მოხდა. როგორც ადგილობრივი მცხოვრებლები "მთელ კვირასთან" საუბარში ყვებიან, ტრაგედიის მიზეზი უწყინარი გახუმრება გახდა.