საქართველოს ფეხბურთის ფედერაცის საპრეზიდენტო არჩევნების ციებ-ცხელების პარალელურად, ეროვნული ნაკრები ევროპის 2016 წლის შესარჩევი ეტაპის მატჩისთვის შოტლანდიისთან და ირლანდიისთვის ემზადება. კახა ცხადაძემ 4 სექტემბერს შოტლანდიასთან გასამართი შეხვედრისთვის უკვე დაასახელა 24 ფეხბურთელი. თუმცა, ნაკრებს ტრავმის გამო სანდრო კობახიძე დააკლდა - იგი ვერც 4 სექტემბერს შოტლანდიის წინააღმდეგ და ვერც 7 სექტემბერს ირლანდიის წინააღმდეგ ვერ ითამაშებს.

საშინაო და საგარეო ფაქტორებმა სასტუმროები აზარალა. მათი ინფორმაციით, შარშანდელ ზაფხულთან შედარებით, წლეულს სტუმრების ნაკადი შემცირებული იყო. კერძო ბიზნესის წარმომადგენლები მიზეზად ეროვნული ვალუტის გაუფასურებას ასახელებენ. ამას ემატება გაზრდილი კონკურენცია, რაც ახალი სასტუმროების გახსნამ გამოიწვია.

ახალ სატელევიზო სეზონს ტელევიზიები პოლიტიკური თოქ-შოუების გარეშე დაიწყებს. "რეაქციასა" და "იმედის კვირის" გარდა სექტემბრიდან ეთერში აღარ გავა ტელეკომპანია ჯი-დი-ეს-ის გადაცემა "კვირის 2030" არჩილ გამზარდიასთან ერთად.

ჟურნალისტი ეკა ხოფერია "იმედზე" საზოგადოებრივ-პოლიტიკური თოქ-შოუების დახურვას ინგა გრიგოლიას ფაქტორს უკავშირებს. მისი თქმით, პოლიტიკური განცხადებისგან თავს შეიკავებს, თუმცა მისი კოლეგის ნათქვამში ეჭვი არ ეპარება, რომ გადაცემები პოლიტიკური დაკვეთის გამო დაიხურა.

ვანო მერაბიშვილის ყოფილი მოადგილის, ლევან გვაზავას ჯამრთელობის მდგომარეობისა და გამოძიების შესახებ "რეზონანსი" მის ადვოკატს, დარეჯან გილიაშვილს ესაუბრა, რომელიც აცხადებს, დაჭრილის მდგომარეობა სტაბილურად მძიმეა, თუმცა მედიკოსებს მისი გამოჯანმრთელების იმედი აქვთ.

საქართველოს ფეხბურთის ფედერაციის საპრეზიდენტო კანდიდატად ლევან კობიაშვილი ოფიციალურად ჩაერთო - ნაკრების ყოფილი ფეხბურთელი ოფიციალურად დარეგისტრირდა. სფფ-ის პრეზიდენტობისთვის სამი კანდიდატი - რევაზ არველაძე, ლევან კობიაშვილი და მამუკა კვარაცხელია იბრძოლებენ. სამივე კანდიდატი წინასაარჩევნო კამპანიაშია ჩაფლული, შეხვედრებს მართავენ და თავიანთ პროგრამებს აცნობენ.

სამთავრობო კაბინეტში ორი მინისტრი შეიცვალა და ორივე სავარძელი ბანკი "ქართუს" კადრს ერგო. ეკონომიკის მინისტრი გიორგი კვირიკაშვილი პირველ დიპლომატად დაინიშნა, ხოლო მერიაში ექსპრემიერ ივანიშვილის მხრიდან მაკონტროლებლად მიჩნეული ქუმსიშვილი ეკონომიკის მინისტრი გახდა.

ირანს სურს ურმიის ნახევრად დამშრალი ტბის აღდგენა საქართველოდან მტკვრის, ხოლო სომხეთიდან სევანის ტბის წყლის ექსპორტის საშუალებით მოახდინოს.

"თბილისს დღესაც ამშვენებს მაშინდელი თვითმმართველობის შენობა, რომელიც დღეს თავისუფლების მოედანზე მდებარეობს. მას თავდაპირველად ერქვა "საქალაქო სახლი" და იგი 1824-1825 წლებში აშენდა, ცნობილი არქიტექტორის, ალექსანდრე ოზეროვის მიერ შედგენილი პროექტით გადაკეთდა და დღევანდელი სახე, რომელმაც ჩვენამდე მოაღწია, არქიტექტორ პაულ შტერნმა შესძინა" - განაცხადა ისტორიულ მეცნიერებათა დოქტორმა იგორ კვესელავამ, რომელსაც "რეზონანსი" თბილისის თვითმმართველობის ისტორიის შესახებ ესაუბრა.

აბიტურიენტები, რომლებმაც ერთიან ეროვნულ გამოცდებზე ყველა საგანში ბარიერი გადალახეს და უმაღლეს სასწავლებელში მაინც ვერ მოხვდნენ, მეორადი ჩარიცხვების დანიშვნას ითხოვენ. განათლების სამინისტრო და ერთიანი ეროვნული გამოცდების ცენტრი გამონაკლისის დაშვებას არ აპირებენ. ექსპერტი განათლების საკითხებში ზურაბ ვახანია "რეზონანსთან" საუბრისას ამ პოზიციას იზიარებს და მიიჩნევს, რომ გამონაკლისის დაშვების შემთხვევაში, შესაძლოა, სხვა სტუდენტები სხვა მოთხოვნით კიდევ გამოვიდნენ.

ლარის გაუფასურება, საკვებ პროდუქტზე ფასის ზრდა და დენის ტარიფის მოსალოდნელი მატება ხალხში პროტესტს იწვევს. რესპონდენტების უმეტესობა ჩივის, რომ გაძვირებულ ცხოვრებას ვერ უმკლავდება. გამოკითხულთა აზრით, ხელისუფლებას ლარზე გავლენის მოხდენის, სხვა რიგით ფინანსურ საკითხებში ჩარევისა და მოგვარების ბერკეტი აქვს, რაც დროულად უნდა გამოიყენოს.

ბაქო-თბილისი-ყარსის რკინიგზის თურქეთის მონაკვეთის მშენებლობა შეჩერებულია. ამის მიზეზი კონტრაქტორი კომპანიების მხრიდან დაგეგმილ სამუშაოზე უარის თქმა გახდა. ანკარაში ამბობენ, რომ პრობლემა მოგვარდება. პრეზიდენტის მთავარი მრჩეველი ბინალი ილდიმირი ირწმუნება, რომ თურქული მხარე "მნიშვნელოვანი რეგიონული პროექტის" შეჩერებას არ დაუშვებს.