მძღოლების დიდ ნაწილს ძველი ავტომობილების იმპორტზე შეზღუდვის დაწესება სურს, რასაც ვერ ვიტყოდით ტექდათვალიერებაზე. მათი შეფასებით, დღეს ავტოპარკის სავსეა 2000 წელს ქვევით არსებული მანქანებით. ამ სიუხვის გამო მათ სწორედ მიაჩნიათ გარკვეული შეზღუდვების ამოქმედება. ამ საკითხზე შედარებით კრიტიკულია ტაქსისტების აზრი. მათი თქმით, ასეთი აკრძალვა მოახლეობას დამატებით პრობლემებს შეუქმნის.

საქართველოში მეცხვარეობა სულს ღაფავს. ქართული ცხვარი სომხურ ცხვართან კონკურენციაში დამარცხდა. მეცხვარეები მთავრობას დახმარებას სთხოვენ, მთავრობაში კი აცხადებენ, რომ კერძო პირების ბიზნესურთიერთობაში ვერ ჩაერევიან.

გმირთა მოედნისა და თამარაშვილის დამაკავშირებელი გზა, რომელიც 13 ივნისის სტიქიამ გაანადგურა, სექტემბრის ბოლოს გაიხსნება. გზის გახსნა ორ ეტაპად მოხდება - ერთი ნაწილი 15 სექტემბერს, მეორე კი სექტემბრის ბოლოს.

იმპორტი და ექსპორტი, რეალურ რიცხვებში, თითქმის თანაბრად მცირდება. იმპორტის შემცირებაში მნიშვნელოვანი წვლილი ნავთობმა და ავტომობილებმა შეიტანეს. ექსპორტის ვარდნაშიც დიდი როლი ასევე ავტომობილებს უკავია. ეკონომისტების აზრით კი, სავაჭრო ბრუნვაში სერიოზული პრობლემები არ აღინიშნება, თუმცა ამ საკითხზე მთავრობამ ყურადღება უნდა გაამახვილოს.

თბილისის "დინამოს" 18 წლის განშორების შემდეგ ალექსანდრე იაშვილი დაუბრუნდა. 38 წლის ფეხბურთელმა თბილისურ კლუბში კარიერა 1993 წელს დაიწყო, მას შემდეგ რამდენიმე კლუბი შეიცვალა, მაგრამ ახლა ისევ მშობლიური "დინამოს" ღირსებას იცავს. როგორც იაშვილმა "დინამო ტვ"-ისთან ინტერვიუში განაცხადა, "დინამოში" თამაში ოცნების ტოლფასი იყო. გთავაზობთ, ალექსანდრე იაშვილის ინტერვიუს, რომელიც ბევრ სხვა საინტერესო ამბებსაც იხსენებს.

თბილისის პირველ სამშობიაროში 12 აგვისტოს, გვიან მშობიარობისას ახალშობილი გარდაიცვალა, რომლის დაღუპვაშიც მშობლები სამედიცინო პერსონალს ადანაშაულებენ. მათი თქმით, ექიმები უპასუხისმგებლოდ და უყურადღებოდ მოიქცნენ, რასაც ჩვილის სიცოცხლე ემსხვერპლა. თუმცა სამშობიაროს დირექტორი ზაზა ავალიანი აცხადებს, რომ მშობიარობას თავად ესწრებოდა და მედიკოსებს შეცდომა არ დაუშვიათ.

უახლოეს დღეებში ჰიდრომეტეოროლოგიურ სამსახურში ამინდის ცვლილებებს არ ელოდებიან. როგორც გარემოს ეროვნული სააგენტოს მონიტორინგისა და პროგნოზირების ცენტრის ჰიდრომეტეოროლოგიური სამსახურის უფროსმა სვეტლანა ნიორაძემ "რეზონანსთან" საუბრისას განაცხადა, 18-19 აგვისტოს ჩათვლით დედაქალაქში მაღალი ტემპერატურა შენარჩუნდება.

ა/ო "სიდას" დირექტორი ზვიად დევდარიანი "რეზონანსთან" საუბრისას აცხადებს, რომ "რუსთავის 2"-ის ირგვლივ მიმდინარე მოვლენებთან დაკავშირებით არასამთავრობოებს შეკითხვები მომჩივან მხარეთან - ქიბარ ხალვაშთან აქვთ და მასთან შესახვედრად სამოქალაქო სექტორი მზაობას გამოთქვამს.

კინემატოგრაფიის ეროვნული ცენტრი ფრანგულ მხარესთან ერთად ერთობლივი პროდუქტის - ანიმაციური ფილმის გადაღებაზე იწყებს მუშაობას. კინოცენტრის დირექტორის, ნანა ჯანელიძის განცხადებით, წლების შემდგომ ეს იქნება პირველი ანიმაციური ფილმი, რომელსაც საზოგადოება სავარაუდოდ მომდევნო წლის ბოლოს იხილავს. როგორც ჯანელიძემ "რეზონანსს" უთხრა, ახალგაზრდა ანიმატორის, ანა ჩუბინიძის მოკლემეტრაჟიანი ფილმის სცენარზე - "ჯიბის კაცი" - არჩევანი "ფოლიმაჟმა" (ფრანგული ანიმაციური სტუდია) შეაჩერა.

50 წელზე მეტი გავიდა ფიდელ კასტროს საქართველოში ვიზიტის შემდეგ, თუმცა ჩვენს თანამოქალაქეებს დღესაც ახსოვთ რევოლუციური კუბის ლიდერის სტუმრობა. სწორედ ამ პერიოდის რამდენიმე ცნობილ თუ უცნობ ამბავს შევახსენებთ ჩვენს მკითხველს დღევანდელ სტატიაში.

საქალაქო სასამართლოში ზურაბ ჟვანიას საქმის განხილვა გრძელდება. გუშინ და გუშინწინ სასამართლომ ბრალდებულის სტატუსით მისი დაცვის ყოფილი წევრები კობა ხარშილაძე და მიხეილ ძაძამია დაკითხა. ხარშილაძემ სასამართლოს სკანდალური ჩვენება მისცა. მან თქვა, რომ ზურაბ ჟვანიას სექსუალური ორიენტაციის შესახებ ინფორმაცია ჰქონდა, უფრო მეტიც, ამტკიცებს, რომ ჟვანიასგან შეთავაზება მასაც ჰქონდა. აქამდე კი იმიტომ არ საუბრობდა, რომ გარდაცვლილი პრემიერის რეპუტაციას უფრთხილდებოდა.

თბილისის საკრებულომ მირზა შაფის ქუჩის განაშენიანების კორექტირებულ ვარიანტს მხარი დაუჭირა, რასაც არასამთავრობო ორგანიზაციების, საკრებულოს ოპოზიციისა და სამოქალაქო საზოგადოების წარმომადგენლების მხრიდან მწვავე რეაქცია მოჰყვა. ისინი პროექტის ერთი თვით გადადებას მოითხოვდნენ, ვინაიდან მიაჩნიათ, რომ პროექტში ცვლილებების შეტანასთან დაკავშირებით კომპეტენტური განხილვა არ გამართულა, ნაკლები იყო საზოგადოების ჩართულობაც, რაც თბილისის ისტორიულ უბანს კიდევ უფრო მეტი საფრთხის წინაშე აყენებს.