დედაქალაქის გამწვანების პროგრამის სისრულეში მოყვანა ჭიანურდება. ქალაქ თბილისის მერია მცენარეების დასარგავ ადგილებს ეძებს. თბილისელები მერიისგან დაპირების შესრულებას და რეკრეაციული ზონის გაზრდას მოითხოვენ. ისინი კონკრეტულ ადგილებსაც ასახელებენ, სადაც გამწვანება აუცილებელია. "რეზონანსის" რესპონდენტები ძირითად აქცენტს შიდა კვარტალურ ეზოებზე და საბავშვო ბაღის, სკოლის მიმდებარე ტერიტორიებზე აკეთებენ.

ეროვნული ბანკიდან საბანკო ზედამხედველობის სამსახურის გამოყოფის კანონპროექტზე ბანკირებმა, დეპუტატებმა, მთავრობის წევრებმა და ბიზნესმენებმა გუშინ კიდევ ერთხელ იმსჯელეს. აღმოჩნდა, რომ კანონპროექტთან დაკავშირებით ბევრი კითხვა არსებობს და ამ საკითხზე მუშაობა მომავალშიც გაგრძელდება. თუმცა საბოლოო გადაწყვეტილება არ შეიცვლება - სებ-ი ბანკების ზედამხედველობის უფლებას დაკარგავს.

მთავრობამ ეკონომიკის ზრდის პროგნოზი 2%-მდე დაიყვანა და ბიუჯეტი სწორედ ამ პარამეტრის მიხედვით შეიკვეცება. განახლებული ბიუჯეტის საბოლოო ვარიანტი ფინანსთა სამინისტრომ 10 ივნისამდე უნდა წარმოადგინოს. მთავრობაში ირწმუნებიან, რომ ძირითადად ადმინისტრაციული ხარჯები შეიზღუდება. თუმცა აღსანიშნავია, რომ სახელმწიფო უწყებების ნაწილი გამოყოფილ თანხას ახლაც ვერ ითვისებს. ეს იმას ნიშნავს, რომ ბიუჯეტის ხარჯვით ნაწილში ისევ პრობლემებია.

სოციალური მომსახურების სააგენტოს სერვის-ცენტრები გაუმართავად მუშაობენ. ოპერატორთან მისასვლელად მოქალაქეებს რიგში საათობით უწევთ დგომა. ხალხი აშკარად უკმაყოფილოა და სისტემის გამართული მუშაობის მიზნით ახალი კადრების დამატებას ითხოვს, რის აუცილებლობასაც ოფიციალურ უწყებაში ვერ ხედავენ.

"სამწუხაროა, რომ საქართველოში არათუ მოქალაქეების, არამედ ხელისუფლების წარმომადგენლთა უმრავლესობას წარმოდგენა არ აქვს დღევანდელი სახელმწიფო სიმბოლიკის შინაარსსა და მის წარმომავლობაზე. არადა, წარმოუდგენელია მოქალაქეს საკუთარი დროშისა და გერბის შესახებ ჩამოყალიბებული, მკაფიო აზრი არ ჰქონდეს," - ამბობს სამართლის დოქტორი, პროფესორი ავთანდილ კახნიაშვილი, რომელსაც "რეზონანსი" სახელმწიფო სიმბოლიკის მნიშვნელობასა და შინაარსობრივ ნაწილზე ესაუბრა.

საძოვრების პრობლემა ამჯერად გურჯანის რაიონის სოფელ ჩუმლაყში გააპროტესტეს. წლების წინათ, მას შემდეგ, რაც ეკონომიკის სამინისტრომ სასოფლო-სამეურნეო მიწებისა და საძოვრების გაყიდვა დაიწყო, საპროტესტო აქციები საქართველოს სხვადასხვა კუთხეში პერმანენტულად იმართება. მოსახლეობა ჩივის, რომ ისინი პირუტყვის გამოკვებას ვეღარ ახერხებენ.

რაფა ბენიტესმა მადრიდის "რეალის" მთვარი მწვრთნელის რანგში პირველი პრესკონფერენცია გამართა. ცნობილი სპორტული გამომცემლობა "აზ"-ის ინფორმაციით, ბენიტესმა ისაუბრა მის ემოციებზე, "რეალზე", გუნდის გაძლიერებაზე, ასევე მაურინიოსა და ანჩელოტის კვალზე. "ნაპოლის" ყოფილმა თავკაცმა, ფიფას პრეზიდენტის, ბლატერის გადადგომის თაობაზე ასეთი კომენტარი გააკეთა: "დღეს ჩემი პრეზენტაციის დღეა და გთხოვთ, ასეთი კითხვები სხვას დაუსვათ ან სხვა დროს დასვით."

"დემოკრატიული მოძრაობის" კახეთის კოორდინატორი, ბიზნესმენი ვალერი შოშიაშვილი მისი საქმის გამოსაძიებლად ხელისუფლებას ვადას პარასკევამდე აძლევს. მისი თქმით, თუ ხელისუფლება სამართლიანობის აღდგენის პროცესს არ დააჩქარებს, 5 ივნისს ყვარელში ექს-პრეზიდენტ მიხეილ საკაშვილის კუთვნილ სახლში მის ოჯახის წევრებთან და თანამშრომლებთან ერთად შეიჭრება, "სისხლის ღვრის ფასადაც" რომ დაუჯდეს. მანამდე კი ყვარელში რჩება და "ოცნების" ხელისუფლებისგან რეაგირებას ელოდება.

პროკურატურაში წინა ხელისუფლების დროს წართმეული ქონების დაბრუნების მოთხოვნით შესული 50 ათაზე მეტი საჩივრიდან სამ თვეში 5 საქმე დასრულდა. როგორც პროკურატურამ გუშინ განაცხადა, 5 ფაქტი გახსნილია და დაზარალებულ პირებს ქონება დაუბრუნდებათ.

უკრაინაში საბრძოლო მოქმედებები განახლდა. ადგილობრივი და დასავლური მედიის მიერ გავრცელებული ცნობით, მეამბოხეთა უკანონო შეიარაღებულმა ფორმირებებმა 3 ივნისს, გამთენიისას, ფართომასშტაბიანი იერიში მიიტანეს დასახლებულ პუნქტ მარინკაზე. ეს დასახლებული პუნქტი დონეცკიდან სულ რაღაც 10 კილომეტრის მოშორებით მდებარეობს.

ქართულ პოლიტიკაში დამთავრდა ხანა, რომლის ხასიათსაც დიდწილად მიხეილ სააკაშვილის პიროვნება, მისი მოკავშირეობა ან მასთან დაპირისპირება განსაზღვრავდა - ასე აფასებს ექსპრეზიდენტის ოდესის გუბერნატორად დანიშვნას ფილოსოფოსი ზაზა ფირალიშვილი.

თბილისში მალე შესაძლოა კიდევ ერთი სკვერი გადაიქცეს სასტუმროდ - ქეთევან წამებულის გამზირზე არსებულ სკვერში, სადაც ფარნავაზ მეფის ძეგლი დგას, 6-სართულიანი სასტუმროს აშენება იგეგმება. პროექტი უკვე შეთანხმებულია, საბოლოო ნებართვისათვის კი მერიაში დამკვეთის მიერ საჭირო დოკუმენტების წარმოდგენას ელოდებიან. ჯერ-ჯერობით უცნობია, რა ბედი ელის ფარნავაზის ძეგლს და გაიჩეხება თუ არა სკვერში ხეები.