თურქეთი ბაქო-თბილისი-ყარსის სარკინიგზო მაგისტრალის მშენებლობის დაჩქარებას გეგმავს. აზერბაიჯანში კი ვარაუდობენ, რომ რკინიგზა ექსპლოატაციაში უკვე წლის ბოლოს შევა. საქართველოს მონაკვეთზე კი მშენებლობა დასრულების სტადიაზეა.

თხილის მოსავალი წელს, შარშანდელთან შედარებით, ნაკლებია. მიუხედავად ამისა, მოსახლეობა იმედიანადაა განწყობილი, რადგან ხარისხიან მოსავალს ელოდება. არ არის გამორიცხული, პროდუქტის ფასიც გაიზარდოს. ამ მხრივ გავლენას თხილის ტექნიკური რეგლამენტიც მოახდენს.

ეკონომისტების ნაწილი წლის ბოლომდე ეროვნული ვალუტის 1,9-მდე გამყარებას სრულიად რეალურად მიიჩნევენ. ეს ნიშნავს, რომ ფიზიკური პირები კრედიტების პროცენტების დაფარვაში 106 მილიონ ლარს დაზოგავენ, ბიზნესმენები - 140 მილიონ ლარს, ხოლო სახელმწიფო საგარეო ვალების მომსახურების მხრივ 1,5 მილიარდ ლარით ნაკლებს გადაიხდის.

სომხეთისა და აზერბაიჯანის მოქალაქეები მედიკამენტების შესაძენად საქართველოში ჩამოდიან, მიზეზი - დაბალი ფასებია. არადა, საქართველოს მოსახლეობის უმრავლესობა დღემდე თვლის, რომ ქვეყანაში წამლები ძალიან ძვირია, შესაბამისად, მათ არ აქვთ საშუალება, რათა სრულფასოვანი მკურნალობის კურსი ჩაიტარონ. რეალურად კი, საქართველო რეგიონში, მედიკამენტების სიიაფის თვალსაზრისით, სულაც არ გამოიყურება ურიგოდ.

არჩევნების წინ მსხვილი ჰესების თემა აქტუალურობას კარგავს. დიდი ალბათობით, ეს საკითხი არჩევნების შემდეგ გადაინაცვლებს, რომ მოსახლეობის მხრიდან პროტესტი არ გამწვავდეს. სამაგიეროდ, როგორც ექსპერტთა ნაწილი ვარაუდობს, არჩევნების შემდეგ ჰესების თემა გააქტიურდება და მთავრობაც პროექტების განხორციელებისას მეტ პრინციპულობას გამოიჩენს.

ზედამხედველობის სამსახური დიდი ალბათობით კვლავ ეროვნული ბანკის შემადგენლობაში დარჩება. ეკონომიკის მინისტრის განცხადებას, რომ საკითხი ამოწურული და შეთანხმებულია, დეპუტატების მწვავე კრიტიკა მოჰყვა. პარლამენტის საფინანსო-საბიუჯეტო კომიტეტის წარმომადგენელთა შეფასებით, სულ რამდენიმე ხნის წინ უმრავლესობის მხრიდან ერთსულოვნად მხარდაჭერილი კანონონპროექტის ასე ხელაღებით უარყოფა პარლამენტის მიმართ უპატივცემლობას ადასტურებს.

როგორც მცირე მეწარმეები აცხადებენ, მათ მიერ წამოწყებულ წარმოებასა ან გეგმით გათვალისწინებულ საქმიანობას წინ უამრავი პრობლემა ეღობება. საქართველოში ბიზნესის წამოწყებას თან ახლავს როგორც ხელის შემშლელი, ისე ხელშემწყობი ფაქტორიც. საკუთარი საქმიანობის წამოწყება, ფინანსებთან ერთად, კომერციული ფართის სიმცირის გამოც უჭიანურდებათ.

უახლოეს რამდენიმე დღეში საქართველოში საწვავის გაიაფება არ იგეგმება. მიუხედავად იმისა, რომ ლარი ბოლო თვეების განმავლობაში 15%-ით გამყარდა, საერთაშორისო ბირჟებზე ნავთობპროდუქტები ძვირდება. ამჟამად 1 ბარელი ნედლი ნავობის ღირებულება 50 დოლარს გადაცდა, ხოლო "პლატცის" მიხედვით 1 ტონა ბენზინი 518 დოლარს გაუტოლდა.

25 წლის წინ საქართველომ დამოუკიდებლობა გამოაცხადა, საბჭოთა იმპერია წარსულს ჩააბარა და ქვეყანამ თანამედროვე მსოფლიოსთან ინტეგრაციის გზების ძიება დაიწყო. ამ პერიოდის განმავლობაში ქვეყნის ეკონომიკა ღია საბაზრო პრინციპებს მოერგო, დადებითად შეიცვალა მისი სტრუქტურა და გაიხსნა ეკონომიკური საზღვრები. თუმცა მოსახლეობის ცხოვრების დონით და სოფლის მეურნეობის წარმოებით დღეს საქართველო არათუ თანამედროვე მსოფლიოს, არამედ საბჭოთა პერიოდის მაჩვენებელსაც კი ჩამორჩება.

ლარსის საბაჟო-გამშვები პუნქტი შეფერხებით მუშაობს. საზღვართან მანქანების რამდენიმე კილომეტრიანი რიგი დგას. როგორც შემოსავლების სამსახურში აცხადებენ, მოძრაობის შეზღუდვა არა საქართველოს, არამედ რუსეთის გამოისობით ხდება, ჩვენი მხრიდან მძღოლებს არანაირი შეფერხება არ აქვთ. ისინი ჩვეულებრივად გადიან საბაჟო პროცედურებს და ამაში მათ სულ რამდენიმე წუთი ეხარჯებათ.

იპოთეკით დაზარალებული მოსახლეობა ხელისუფლებისგან პრობლემის მოგვარებას ისევ ითხოვს. ბიზნესი კი საპოლიციო გამოსახლების გაუქმებას აპროტესტებს. ეს ნიშნავს, რომ ცოტა ხნის წინ პარლამენტის მიერ მიღებული კანონით ორივე მხარე უკმაყოფილოა. ამ ცვლილებების ერთი დადებითი აქვს ის, რომ დაზარალებულს გამოსახლებამდე ცოტა მეტ ხანს უწევს საკუთარ სახლში დარჩენა.

წელს კახეთში ყურძნის მოსავალს ძალიან კარგი პირი უჩანს. სოფლის მეურნეობის სამინისტრო რთველისთვის უკვე ემზადება. სახელმწიფო ბიუჯეტში კი სუბსიდიისთვის 24,5 მილიონი ლარია გაწერილი, თუმცა არ არის გამორიცხული, რომ ეს თანხა გაიზარდოს. შარშან სახელმწიფოს გლეხებისთვის ყურძნის რეალიზაციაში დასახმარებლად 33 მილიონი ლარი დასჭირდა.