მოსახლეობის აღწერის შედეგებმა წელიწადზე მეტით დაიგვიანა. ამ დროისთვის მარტო ის ვიცით, რომ საქართველოში ზუსტად იმდენი ადამიანი ცხოვრობს, რამდენიც ამომრჩეველია. ეს არის ყველაზე დიდი კითხვის ნიშანი, რომელიც ამ აღწერების შედეგებმა აჩვენა. ახლა ჩვენ შეგვიძლია ვიმკითხაოთ, ცესკო ცდებოდა, თუ სტატისტიკა შეცდა. საზოგადოება კიდევ სხვა უამრავი, რებუსით მოცული საკითხის გახსნას ელოდება - მიგრაცია, დასაქმება, უმუშევრობა და ასე შემდეგ.

საქართველოს პრემიერ-მინისტრის არაბული არდადეგები დასრულდა. მთავრობა მცდელობას არ აკლებს, რომ საქართველოში არაბი ინვესტორები კიდევ ერთხელ შემოიპატიჟოს. არადა ერთ დროს არაბულ ბიზნესს ქართულ ეკონომიკაში საკმაოდ მნიშვნელოვანი ადგილი ეკავა. საემიროები 2008-2009 წლებში პირდაპირი ინვესტიციების მოცულობით ინვესტორი ქვეყნების სამეულშიც კი შედიოდა. მერე არაბებმა საქართველოში ფულის დაბანდება შეამცირეს, 2011-ში კი საერთოდ 52,3 მლნ-ს კაპიტალი გაიტანეს.

ტურისტულ სეზონს ქვეყანა წელსაც მოუმზადებელი ხვდება. წამყვანი კურორტების გარდა, თითქმის ყველგან პრობლემაა. ტურისტული კომპანიების ინფორმაციით, მოთხოვნამ აშკარად მოიმატა, თუმცა მხოლოდ ბათუმის ხარჯზე, რადგან დანარჩენი კურორტების მიმართ დაინტერესება არც ისე დიდია.

მოკლევადიან პერიოდში ლარი დოლართან მიმართებით 2,2 ლარის დიაპაზონში იმოძრავებს. არჩევნების ფაქტორის გათვალისწინებით, სპეციალისტები არ გამორიცხავენ, რომ შემოდგომისთვის 1 დოლარის ყიდვა 2 ლარადაც კი იყოს შესაძლებელი.

2012 წლის საპარლამენტო არჩევნებიდან დღემდე ბიზნესში დასაქმებულთა რაოდენობა მხოლოდ 50 ათასი კაცით გაიზარდა. სიღარიბის მაჩვენებელი თითქმის იგივეა. ეკონომიკა კი ისეთი ტემპით ვითარდება, რომ თუ ასე გაგრძელდა, ევროკავშირის ყველაზე სუსტი ქვეყნის - ბულგარეთის - დონეს 2027 წელს მივაღწევთ.

პრეზიდენტისა და მთავრობის სარეზერვო ფონდებიდან გახარჯული თანხის მოცულობა ბოლო 3 წლის განმავლობაში 51,3%-ითაა გაზრდილი. 2012-ში ორივე ფონდის საკასო ხარჯი 114 მლნ ლარს შეადგენდა, შარშან კი ეს თანხა 172,6 მლნ ლარამდე გაიზარდა. პრობლემას ფონდების ბიუჯეტიც წარმოადგენს, რომელიც წლის ბოლოს საბიუჯეტო კანონში გაწერილ თანხას ხშირად 2-3-ჯერ აღემატება. ეს იმის ბრალია, რომ მხარჯავი დაწესებულებები საკუთარ ბიუჯეტს სწორად ვერ გეგმავენ.

თბილისში კვების ობიქტებზე მოთხოვნამ, წინა წელთან შედარებით, დაახლოებით 20-25%-ით მოიმატა. როგორც უძრავი ქონების სააგენტოებში განმარტავენ, სარესტორნო და სწრაფი კვების ობიექტების ბიზნესი ერთადერთი მიმართულებაა, რომელსაც გამოცოცხლება დაეტყო.

კომერციულ ბანკებში ფიზიკური პირების 1,4 მილიარდი ლარი ინახება. ამ დროს საქართველოში დეპოზიტების დაზღვევა არ არსებობს. რომელიმე ბანკის გაკოტრების შემთხვევაში შეიძლება მეანაბრეების თანხა დაიკარგოს.

გარდაბანში მზის, ხოლო გორთან ქარის ელექტროსადგურები აშენდება. ალტერნატიული ენერგეტიკა ნელ-ნელა მკვდარი წერტილიდან დაიძრა. ენერგეტიკოსები აღნიშნავენ, რომ საქართველოში არის პოტენციალი, რომ ქარის გამოყენებით 4 მლრდ კვტ/სთ-ით ელექტროენერგია მივიღოთ, ხოლო მზის გამოყენებით - 1,5-2 მლრდ კვტ/სთ ენერგია.

ლარის გამყარება სამომხმარებლო ბაზარზე რატომღაც არ აისახება. იმპორტიორები და სავაჭრო სფეროს წარმომადგენლები ცვლილებებს არ გეგმავენ. წელიწად-ნახევრის წინ, როგორც კი ლარის გაუფასურება დაიწყო და პროდუქტი გაძვირდა, ითქვა, რომ გაიაფება გაჭირდებოდა. ასეც მოხდა, მიუხედავად იმისა, რომ ლარი მყარდება, ზემოგებაზე ორიენტირებულ ბიზნესში ფასის შემცირებაზე არავინ ფიქრობს. ზოგიც რეალობას იმდენად მოსწყდა, რომ გაიაფების ნაცვლად, პროდუქტს თვითნებურად აძვირებს.

რეგიონებთან შედარებით თბილისში 75%-ით მეტი უცხოური ინვესტიცია შედის. რაიონების განვითარება, ძირითადად, ისევ სახელმწიფო პროგრამებზეა ჩამოკიდებული. მცირე ზომის შიდა პროექტები რეგიონების მხოლოდ კუს ნაბიჯებით განვითარებასაც ძლივს უზრუნველყოფს.

ბოლო დროს მარჯვენასაჭიან ავტომობილებზე მოთხოვნამ ისევ მკვეთრად მოიმატა. მომხმარებელი ცდილობს, მანქანის შეძენა კანონმდებლობის ამოქმედებამდე მოასწროს. იმპორტიორების ინფორმაციით, შეკვეთის მეტი წილი ამ ეტაპზეც მარჯვენასაჭიანებზეა. ისინი შიშობენ, რომ აკრძალვის დაწესებით საქართველოში იაფი მანქანის ხანა დასრულდება და ხალხს მანქანის ყიდვა ზოგადად გაუჭირდება.