მგზავრთა ნაკადის ზრდასთან ერთად, ქუთაისისა და თბილისის აეროპორტებს პრობლემა არ ასცდებათ. არ არის გამორიცხული, ტურისტების მზარდ ნაკადს აეროპორტებმა 4-5 წლის მერე ვეღარ გაუძლოს. 20%-იანი ზრდის პირობებში კი თბილისის აეროპორტს პრობლემა მგზავრთა ტევადობის კუთხით, შესაძლოა, უკვე 2017 წელს დაუდგეს.

ლარის კურსი კატასტროფულად მერყეობს. ეროვნული ვალუტა ერთ დღეს რომ უცებ გაუფასურდება, მეორე დღეს სწრაფადვე მყარდება, წონასწორობის შენარჩუნება ვერაფრით ხერხდება. 30-40-თეთრიანი სხვაობით კურსი თითქმის ყოველდღიურად იცვლება, რაც ბაზარზე სერიოზულ პრობლემას ქმნის.

"მობიტელი" "კავკასუს ონლაინის" საცალო ქსელისთვის ბრძოლას გამოეთიშა, ინტერნეტპროვაიდერის მფლობელი "მაგთიკომი" გახდა. საბითუმო ქსელი, მათ შორის, შავი ზღვის ფსკერზე გამავალი კაბელი კვლავ "კავკასუსის" მფლობელობაში რჩება. კომპანიაში ამტკიცებენ, რომ მის გასხვისებას არ აპირებენ. "რეზონანსის" წყაროს ინფორმაციით, "კავკასუსს" სერიოზული ფინანსური დავალიანება აქვს და მას შემდეგ, რაც საცალო ქსელის აქტივების "მაგთიკომის" მფლობელობაში გადასვლა დასრულდება, ის საბითუმო სეგმენტსაც გაყიდის.

ონლაინ აზარტული თამაშების დასარეგულირებლად მთავრობამ უკან მეორედ დაიხია. "ქართულმა ოცნებამ" ხელისუფლების სათავეში მოსვლისთანავე აზარტული თამაშების შეზღუდვის პირობა დადო, თუმცა ძლიერი ლობისტების წყალობით ამ დაპირების შესრულება ვერ მოახერხა. მოგვიანებით, პრემიერის თანამდებობაზე დასამტკიცებლად პარლამენტში მისულმა კვირიკაშვილმა განაცხადა, რომ ინტერნეტ-კაზინოების მიმართ ძალიან მკაცრი რეგულაცია დაწესდებოდა. ახლა საკითხიც მიჩუმათდა. "რეზონანსისთვის" ცნობილი გახდა, რომ ორ კვირაში მზად იქნება შესაბამისი კანონპროექტი, რომელსაც არასამთავრობო ორგანიზაციები ამზადებენ.

დასავლეთ საქართველოში უამინდობამ ხეხილის ბაღები თითქმის გაანადგურა. რამდენიმე რეგიონში პრობლემა შეექმნა ტყემალს, ალუჩას, ატამსა და თხილსაც კი, რაც სამომავლოდ მოსავლიანობაზე აუცილებლად იმოქმედებს. საფრთხეზე საუბრობენ როგორც სპეციალისტები, ასევე გლეხები და ადგილობრივი მუნიციპალიტეტების წარმომადგენლები. მათი ინფორმაციით, წვიმისა და ქარისგან ხილს ყვავილი არ შერჩა.

ნავთობზე საერთაშორისო ფასების ზრდისა და რუბლის გამყარების მიუხედავად, რუსეთის ეკონომიკური ზრდის მაჩვენებლები ისევ ნეგატიურია. საერთაშორისო ორგანიზაციების პროგნოზით, წელს რუსეთის მშპ-ის ვარდნა გარდაუვალი იქნება და ის იმაზე მეტად დაეცემა, ვიდრე 2015 წლის დეკემბერში ვარაუდობდნენ. ეკონომიკის განვითარების ოპტიმისტურ სცენარზე უარი რუსეთის ცენტრალურმა ბანკმაც თქვა. ისინი ვარაუდობენ, რომ წლეულს მშპ შესაძლოა, 3%-ითაც კი შემცირდეს.

ლარის ახალი ბანკნოტები მიმოქცევაში გამოსვლისთანავე გააყალბეს. ყალბი 20 და 50-ლარიანები აღმოაჩინეს კახეთში, გურიასა და თბილისში. "რეზონანსი" დაინტერესდა, რამდენად დაცულია ახალი კუპიურები. ეროვნულ ბანკში ამტკიცებენ, რომ გამოყენებულია დაცვის უახლესი საერთაშორისო სტანდარტები. შინაგან საქმეთა სამინისტროში კი აცხადებენ, რომ გამოძიება მიმდინარეობს და დეტალები მოგვიანებით გახდება ცნობილი.

ეროვნული ვალუტა ისევ დევალვაციის გზას დაადგა. მარტში ფინანსთა სამინისტროს სახელმწიფო ბიუჯეტის კვარტალის გეგმის შესასრულებლად ერთბაშად 1 მილიარდი ლარი უნდა დაეხარჯა. ბოლო პერიოდში მიმოქცევაში ლარის მასა ისევ გაიზარდა, რამაც, გარკვეულწილად, ეროვნული ვალუტის კურსზე გავლენა მოახდინა. ეკონომისტების აზრით, ამ დროისთვის მდგომარეობა მეტ-ნაკლებად სტაბილურია და გარკვეული დროის შემდეგ ლარი ისევ გამყარების გზას დაადგება.

სამომხმარებლო ბაზრებსა და სუპერმარკეტებში ქართული ბოსტნეული და ხილი თითქმის არსად გვხვდება. ყველგან მასობრივად უცხოური ნაწარმი იყიდება. ხშირია შემთხვევა, როცა მოვაჭრეები შემოტანილ ხილ-ბოსტნეულს ქართულ პროდუქტად ასაღებენ, მაგრამ რეალურად არც ერთი მათგანი ადგილობრივი ნაწარმი არ არის. მომხმარებელიც ყიდვისას ხშირად ტყუვდება.

ფინანსთა სამინისტრომ ბიუჯეტის შესასრულებლად 4 დღეში 275 მილიონი ლარი უნდა მოაგროვოს. იანვარ-თებერვალში კვარტლის ბიუჯეტის მხოლოდ 55% შესრულდა და ხარჯების დასაფინანსებლად სამინისტრომ ხაზინის ნაშთი გამოიყენა. პირველ ორ თვეში საქართველოს სახელმწიფო ბიუჯეტი არაჯანსაღად გამოიყურება, თუმცა მთავრობას მომდევნო თვეების იმედი აქვს.

ქვეყანაში არსებული მიწის ნაკვეთების 75%-მდე დაურეგისტრირებელია. ამ პრობლემის მოსაგვარებლად, ერთხელ დაწუნებული კანონპროექტი შეცვლილი სახით პარლამენტში გუშინ შევიდა. მთავრობა მიწის მესაკუთრებს დოკუმენტებში არსებული ხარვეზების გამოსწორებაში დახმარებას ჰპირდება და რაც ყველაზე მთავარია, ეს ყველაფერი უფასო იქნება.

თუკი ლარი 2-2,05 ნიშნულამდე გამყარდება, ელექტროენერგიის ტარიფის კვლავ შემცირება დადგება დღის წესრიგში. ამ დროისთვის, სემეკი დოლარის მიმართ ეროვნული ვალუტის ცვლილებას აკვირდება. კომისიაში უნდა დარწმუნდნენ, რომ კურსი სტაბილური იქნება. ჯერჯერობით ეროვნული ვალუტა 2,30-ის ნიშნულის ფარგლებში მერყეობს.