ქართულ ბაზარზე რუსული საწვავის წილი დიდი სისწრაფით იზრდება. თუ ამ ქვეყნიდან იმპორტირებულ ბენზინსა და დიზელს, დაახლოებით, 10% ეკავა, იანვარში ეს მაჩვენებელი ერთბაშად 43%-მდე გაიზარდა. სპეციალისტები ამ ფაქტს რუსული საწვავის სიიაფით ხსნიან. პარალელურად აღნიშნავენ, რომ, წინა წლებისგან განსხვავებით, ბაზარი ახლა მეტად თავისუფალია, გაიზარდა იმპორტიორთა რიცხვი და შესაბამისად კონკურენცია.

მთავრობას სასოფლო-სამეურნეო მიწის რეგისტრაციის შესახებ პროექტზე მუშაობა თავიდან მოუწევს. სპეციალისტების შეფასებით, იგი ხალხსა და მთავრობას შორის სერიოზული დაპირისპირების მიზეზიც შეიძლება გამხდარიყო, რადგან პროექტი შორს დგას ქვეყნის დღევანდელი საჭიროებებისგან.

ენერგეტიკის სამინისტრო აფხაზეთისთვის 100 მლნ კვტ/სთ-ის მოცულობის ელექტროენერგიას იყიდის. ფასი გაასაიდუმლოებულია, მიუხედავად იმისა, რომ გადასახადის გადამხდელს ამ ინფორმაციის მიღების უფლება აქვს. ჯერჯერობით, აფხაზეთი ისევ ენგურჰესის ელექტროენერგიით მარაგდება, თუმცა სადგურის გენერალური დირექტორი ლევან მებონია "რეზონანსთან" საუბარში აღნიშნავს, რომ ენგურჰესში წყლის 7-10 დღის მარაგია.

როგორც გუშინ გახდა ცნობილი, ჩვენი ფერმერებისთვის დროებით ქუვეითის ბაზარიც დაიხურა. წელს ეს რიგით მეორე აკრძალვაა, რომელიც ქართული პირუტყვის იმპორტს დაუწესდა. მანამდე თავი აზერბაიჯანმა გამოიდო.

"კავკასუს-ონლაინის" დამფუძნებელი კომპანიის საბითუმო სეგმენტის, მათ შორის, შავი ზღვის ფსკერზე გამავალი ოპტიკურ-ბოჭკოვანი კაბელის შეძენასთან დაკავშირებით მოლაპარაკებას "კავკასუსის" მოქმედ ხელმძღვანელობასთან მართავს. მამია სანადირაძე ამბობს, რომ ეს გადაწყვეტილება მას შემდეგ მიიღო, რაც ხელისუფლებამ მისი საქმე "თაროზე" შემოდო და სამართლიანობის აღდგენაზე, პრაქტიკულად, უარი თქვა. "კავკასუს-ონლაინის" საცალო სეგმენტს კი, როგორც ცნობილია, რუსული "ვიმპელკომი" უმიზნებს. მოლაპარაკება დასრულებულია და ოფიციალურ გარიგებასაც ხელი მალე მოეწერება.

კობა გვენეტაძის ეროვნული ბანკის საბჭოს წევრად დამტკიცების საკითხი სასწორზე დაიდო. "ბიზნეს-რეზონანსის" ინფორმაციით, "ქართული ოცნება" მის საკითხს კვირას განიხილავს. უმრავლესობის დეპუტატებში დაბნეულობა გამოიწვია გვენეტაძის პოზიციამ საფინანსო ზედამხედველობის სამსახურის ეროვნული ბანკის შემადგენლობაში დარჩენასთან დაკავშირებით. თუკი რამდენიმე დღის წინ პოლიტიკურ-ეკონომიკური ელიტა გვენეტაძის უშუალოდ სებ-ის პრეზიდენტად დანიშვნას წინასწარმეტყველებდა, ახლა მისი საბჭოს წევრად დამტკიცებაც კი კითხვის ნიშნის ქვეშ დადგა.

საქართველოში რეგისტრირებული ბიზნეს-სუბიექტებიდან რეალურად მხოლოდ 21% მოუშაობს. სტატისტიკის ეროვნული სამსახურის მონაცემებით, 629 ათასი კომპანიიდან აქტიური მხოლოდ 130 ათასია. თუმცა სპეციალისტების გათვლებით, ეს ციფრიც გადაჭარბებულია, რამდენადაც არსებული სიტუაციიდან გამომდინარე, გამორიცხულია, რომ დღეს ქვეყანაში 60-65 ათასზე მეტი კომპანია მუშაობდეს. ეს იმას ნიშნავს, რომ ქვეყანაში რეგისტრირებული ბიზნეს-სუბიექტებიდან რეალურად მხოლოდ 10-11% ახერხებს საქმიანობას.

იანვარში საქართველოს მთავარი საექსპორტო ქვეყანა ჩინეთი გახდა. წინა წლის ლიდერი - აზერბაიჯანი - ათეულშიც კი აღარ იმყოფება. ამასთანავე, ევროკავშირში ექსპორტი 38%-ით შემცირდა, ხოლო დსთ-ს ქვეყნებში - 46%-ით. იანვრის სტატისტიკამ აჩვენა, რომ საქართველოში ავტომობილების ბიზნესს სერიოზული პრობლემა აქვს. როგორც "რეზონანსი" ვარაუდობდა, ნედლი ნავთობის ექსპორტმა ღვინის ექსპორტს გაუსწრო.

ჰიბრიდული ძრავის მქონე ავტომანქანების იმპორტზე გადასახადი, შესაძლოა, განულდეს. როგორც საპარლამენტო უმრავლესობა განმარტავს, განბაჟების წესების შეცვლა ამ კატეგორიის ავტომობილების ბიზნესს მნიშვნელოვნად წაახალისებს. ელექტრომობილების წილი იმპორტში 0,001%-ს ძლივს აღწევს. ჰიბრიდული ძრავის მქონე მანქანების შემთხვევაში, ეს მაჩვენებელი 2-3%-ს არ აღემატება. შეღავათის შემთხვევაში კი ეს მაჩვენებელი მინიმუმ გაორმაგდება.

თურქეთსა და რუსეთს შორის დაძაბული ურთიერთობის ფონზე, საქართველო რუსი ტურისტების მოზიდვას ცდილობს. რამდენად გაამართლდება მთავრობის მოლოდინი, ეს ცალკე საკითხია, ვინაიდან თურქეთს ჩამოცილებული ტურისტების დიდი ნაკადის წაყვანა აღმოსავლეთ ევროპის ქვეყნების დიდი სურვილიცაა. საქართველოს საკურორტო ზონებში (განსაკუთრებით შავი ზღვისპირეთში) არსებული მაღალი ფასი და დაბალი ხარისხი კი ტურისტებისთვის არც ისე მომხიბვლელია.

"ქართული ოცნების" დეპუტატები კობა გვენეტაძის პოზიციამ საფინანსო ზედამხედველობის სამსახურის ეროვნული ბანკში დარჩენასთან დაკავშირებით დააბნია. მართალია, ეს გადაწყვეტილება პოლიტიკური მოტივით იყო მიღებული და გიორგი ქადაგიძის წასვლის შემდეგ უმრავლესობისთვის არსებითი მნიშვნელობა აღარ ექნება როგორი სტატუსით იმუშავებს აღნიშნული უწყება, მაგრამ ცხადი გახდა, რომ "ქართული ოცნების" დეპუტატებს, გვენეტაძის მხარდაჭერის შემთხვევაში, ახალი არგუმენტების მოძიება დასჭირდებათ.

სამინისტროების არაეფექტური მუშაობის გამო განუხორციელებელი ან გაწელილი პროექტების სიმრავლემ მთავრობა მათი მაკონტროლებელი სამსახურის შექმნაზე დააფიქრა. სპეციალისტები კი ქვეყნის პრემიერს მოუწოდებენ, რომ ახალი ველოსიპედის შექმნა საჭირო არ არის, ვინაიდან მისი ადმინისტრაციის მთავარი მოვალეობა სწორედ სამინისტროებთან კოორდინაცია და მათი საქმიანობის ანალიზია.