წინა წელთან შედარებით, თხილი 52%-ით გაიაფდა. ფასთან ერთად, მოთხოვნაც ერთბაშად შემცირდა. დასავლეთ საქართველოში მდებარე თხილის ქარხნებმა პროდუქტის ჩაბარებაზე უარი თქვეს. როგორც ქარხნებში აცხადებენ, რეალიზაციის პრობლემა აქვთ და ჯერჯერობით ექსპორტსაც ვერ ახორციელებენ. ევროპაში ქართულ თხილზე მოთხოვნამ მნიშვნელოვნად იკლო. დაბალ ფასად თხილის რეალიზაციისგან თავს იკავებს მოსახლეობაც.

ამერიკის შეერთებული შტატების მიერ რუსეთისთვის განახლებული სანქციების სიაში "ვითიბი ბანკი საქართველოც" მოხვდა. ბანკში აღნიშნავენ, რომ სანქციები მათ საქმიანობას ხელს არ უშლის და ამ შეზღუდვას ვერც კლიენტი იგრძნობს. შეგახსენებთ, რომ ამერიკამ რუსეთს სანქციები 2014 წელს ყირიმში მიმდინარე მოვლენების გამო დაუწესა და 2 დღის წინ მათი სია გააფართოვა.

წელს ყველაზე მეტად მედიკამენტები გაძვირდა, შემდეგ სურსათი და ჰიგიენური პროდუქტები. ანალიტიკოსები ამბობენ, რომ ასევე გასათვალისწინებულია ფარული ინფლაცია, როდესაც მოსახლეობის მსყიდველუნარიანობა მცირდება.

ქართულ კომპანიებს უფლება მიეცათ, რეგულარული ფრენა განახორციელონ რუსეთის 7 ქალაქში: მოსკოვში, პეტერბურგში, სამარაში, ეკატერინბურგში, სოჭში, როსტოვსა და მინვოდში. ავიაკომპანიები კი რუსეთში ახალი მიმართულებების ათვისებას ვერ ახერხებენ.

რეგიონში ენერგეტიკული რესურსების განაწილებისთვის ბრძოლა ახალ ფაზაში შედის. ამერიკა ევროპაში თხევადი გაზის ექსპორტზე კონტრაქტებს აფორმებს, რუსეთი ცდილობს აზიიდან რაც შეიძლება დიდი მოცულობის გაზის ტრანსპორტირება დაიბევოს და ევროპის ბაზარზე მონოპოლიური მდგომარეობა შეინარჩუნოს. თურქეთის მთავრობა კი დივერსიფიკაციის მიმართულებით გააქტიურდა, ვინაიდან რუსეთი მისთვის არასაიმედო ქვეყანა გახდა. ამ დროს საქართველო, შეიძლება ითქვას, "ორ ცეცხლს" შუაა ჩავარდნილი.

არარეგისტრირებული მიწის ნაკვეთები, შესაძლოა, სახელმწიფოს საკუთრება გახდეს. მათი განკარგვის ან სარგებლობაში გადაცემის კუთხით ერთწლიანი შეზღუდვა დაწესდება. ცვლილება არ შეეხება იმ მოქალეებს, რომლებიც მემკვიდრეობით მიღებულ მიწებს რეგისტრაციის გარეშე განკარგავენ და ფაქტობრივი მფლობელები არიან.

რუსეთის მიერ თურქეთისთვის დაწესებული ეკონომიკური სანქციები ძალაში პირველი იანვრიდან შედის, თუმცა რუსი მებაჟეები საზღვრზე თურქულ პროდუქციას რამდენიმე დღეა აღარ უშვებენ. მოსკოვი სანქცირებული პროდუქციის სიის გაზრდასაც გეგმავს და ქვეყანაში თურქული საფეიქრო ნაწარმის აკრძალვასაც აპირებს. რუსი მებაჟეები თურქეთის მიერ "მესამე" ქვეყნის "გამოყენებაზე" საუბრობენ და აცხადებენ, რომ ასეთი ფაქტი მათ უკვე აღკვეთეს.

ეროვნული ვალუტის დევალვაციამ კომერციული ბანკების მიერ უცხოურ ვალუტაში გაცემული სესხების მოცულობა 2,7 მლრდ ლარით გაზარდა. ეს იმ შემთხვევაში, თუკი ლარის კურსი 2,4-ის ნიშნულზე დაბალანსდება. ლარის კიდევ უფრო გაუფასურების შემთხვევაში, მსესხებლები კიდევ უფრო მეტად დაზარალდებიან.

საქართველოში კრიპტოვალუტის მეორე საპროცესინგო დატა-ცენტრი ამოქმედდაელექტრონული ფული მსოფლიოშიც კი ახალია და ამ პროცესების გააქტიურებას საქართველოში ეკონომისტების ნაწილი სკეპტიკურად უყურებს. ისინი ამბობენ, რომ ელექტრონული ფული სრულიად უკონტროლოა, რომლითაც მარტივია არალეგალური ოპერაციების წარმოება.

რეგიონის ვალუტები ისევ განსაცდელშია. გუშინ აზერბაიჯანული მანათი 33,5%-ით გაუფასურდა. გაუფასურებას განაგრძობს თურქული ლირა, ყაზახური ტენგე და რუსული რუბლი. მომავალ წელს ანალიტიკოსები ამ ვალუტებს კიდევ უფრო მძიმე დღეებს უწინასწარმეტყველებენ. ეკონომისტები ამბობენ, რომ მეზობელი ქვეყნების ვალუტების გაუფასურებამ ლარის კურსზე გავლენა არ უნდა მოახდინოს, ვინადიან მათი ეკონომიკური და პოლიტიკური მდგომარეობა საქართველოსგან სრულიად განსხვავებულია. საქართველოს შედარება შეიძლება სომხეთთან, რომლის ვალუტა სტაბილურად და მყარად დგას.

გლობალური ეკონომიკის ზრდის საგაისო პროგნოზი არასახარბიელოა. მსოფლიო ბანკის პრეზიდენტი მომავალ წელს "იმედგაცრუების" წელს უწოდებს. ნეგატიურია საერთაშორისო სავალუტო ფონდის პროგნოზიც, სსფ-შიც თვლიან, რომ 2016-ში მსოფლიო ეკონომიკა შემცირდება. მეტ-ნაკლებად ოპტიმისტურია "ფიჩი". სააგენტოში თვლიან, რომ გაისად გლობალური ეკონომიკა მართალია მცირედით, მაგრამ მაინც გაიზრდება.

მუნიციპალური ავტობუსები, შესაძლოა, კერძო კომპანიის მფლობელობაში გადავიდეს. აღნიშნული იდეა მერიაში უკვე არსებობს, თუმცა როგორც ნარმანიას უწყებაში ირწმუნებიან, ეს მომავლის პერსპექტივაა და ამ ეტაპზე ქალაქის მთავრობის მთავარ მიზანს თბილისში ახალი ავტობუსების შემოყვანა წარმოადგენს. იმ შემთხვევაში, თუკი ე.წ. ყვითელი ავტობუსები კერძო კომპანიის მფლობელობაში გადავიდა, ეს ცალსახად მგზავრობის გაძვირებას გამოიწვევს, რასაც სპეციალისტთა თქმით, სერიოზული საზოგადოებრივი პროტესტი მოჰყვება.