ირანი დამშრალი ურმიის ტბის აღდგენას საქართველოდან და სომხეთიდან მიღებული წყლით გეგმავს. თეირანში ამბობენ, რომ მხარეებთან შეთანხმება ფაქტობრივად, მიღწეულია. სომხურ მედიაში აღნიშნულ საკითხთან დაკავშირებით კონკრეტული ინფორმაცია არ ვრცელდება, საქართველოს ეკონომიკის სამინისტროში კი ირწმუნებიან, რომ ეს მხოლოდ ირანელების იდეაა და ჯერჯერობით რაიმე კონკრეტული გადაწყვეტილება მიღებული არ არის.

მთავრობაში პირდაპირ უცხოურ საინვესტიციო ნაკადებზე აღარ ღელავენ. ფინანსთა მინისტრი ამბობს, რომ წლის ბოლოსთვის ქვეყანა მილიარდ დოლარზე მეტ ინვესტიციას მიიღებს. აღნიშნული საინვესტიციო მაჩვენებელი "რეზონანსმა" ჯერ კიდევ წლის დასაწყისში დათვალა. ფინანსთა მინისტრი წლის ბოლოსთვის საგადასახდელო ბალანსის გაუმჯობესებას და ამ მიმართულებით ლარზე ზეწოლის შემცირებასაც ელოდება.

საქართველოში ფულადი გზავნილების მოცულობა ისევ შემცირდა, ეროვნული ბანკის მონაცემებით, 2014 წლის ივლისთან შედარებით, წელს უცხოეთიდან დაახლოებით 32%-ით ნაკლები თანხა გადმოირიცხა.

"კავკასუს ონლაინის" ქონებას, შესაძლოა, ყადაღა დაედოს. კომპანიის დამფუძნებელი მამია სანადირაძე ამ თხოვნით სასამართლოს უახლოეს დღეებში მიმართავს. როგორც ბიზნესმენი აცხადებს, "კავკასუსის" გასხვისებას არ დაუშვებს და კომპანიის დასაბრუნებლად ბოლომდე იბრძოლებს. "კომპანიასთან დაკავშირებით დღემდე სასამართლო დავა მიმდინარეობს, მათ შორის ლონდონშიც, რომელიც დროში იწელება. ამ დავის ფონზე კი ცდილობენ, რომ ქონება გაასხვისონ, მაგრამ ეს მათთვის მარტივი არ იქნება", - განუცხადა "რეზონანსს" სანადირაძემ.

საქართველოში მეცხვარეობა სულს ღაფავს. ქართული ცხვარი სომხურ ცხვართან კონკურენციაში დამარცხდა. მეცხვარეები მთავრობას დახმარებას სთხოვენ, მთავრობაში კი აცხადებენ, რომ კერძო პირების ბიზნესურთიერთობაში ვერ ჩაერევიან.

იმპორტი და ექსპორტი, რეალურ რიცხვებში, თითქმის თანაბრად მცირდება. იმპორტის შემცირებაში მნიშვნელოვანი წვლილი ნავთობმა და ავტომობილებმა შეიტანეს. ექსპორტის ვარდნაშიც დიდი როლი ასევე ავტომობილებს უკავია. ეკონომისტების აზრით კი, სავაჭრო ბრუნვაში სერიოზული პრობლემები არ აღინიშნება, თუმცა ამ საკითხზე მთავრობამ ყურადღება უნდა გაამახვილოს.

სავალუტო ბაზარი უკონტროლოა. სპეციალისტები მთავრობას უფრო მეტად გააქტიურებას ურჩევენ და ხელს ისევ ეროვნული ბანკისკენ იშვერენ. კერძოდ, ეროვნულმა ბანკმა სამშაბათს 100 მილიონი ლარის ერთდღიანი რეფინანსირების სესხი გამოუშვა და მცირედით გამყარებული ლარი ისევ "დაასამარა". სპეციალისტები ამბობენ, რომ მოკლევადიანი ლიკვიდობის პრობლემას კომერციული ბანკები ერთმანეთთან ვაჭრობით უნდა აგვარებდნენ და ამ პროცესში ეროვნული ბანკი საერთოდ არ უნდა ერეოდეს, ვინაიდან მისი ქმედება ლარს აუფასურებს. სები კი, თავის მხრივ, მონეტარულ პოლიტიკას ამკაცრებს და ლარის გაუფასურების ერთ-ერთ მთავარ მიზეზს მასზე "თავდასხმაში" ხედავს.

ხაზინაში თავისუფალი ნაშთის რეკორდული რაოდენობაა. ფინანსთა სამინისტროს ამ დროისთვის ხაზინის ერთიან ანგარიშზე 835 მილიონი ლარი აქვს მობილიზებული და ეს თანხა წლის ბოლოსთვის 1,140 მილიარდ ლარს გადააჭარბებს. დიდი ოდენობით ნაშთის არსებობა მიუთითებს იმაზე, რომ ლარის კურსზე ფისკალური ზეწოლა არ ხდება. ეკონომისტები სამინისტროს ურჩევენ, ფული დეპოზიტების სახით საერთაშორისო საფინანსო ორგანიზაციებში გადაამისამართონ და აქედან სარგებელი მიიღონ.

ირანის სანქციებისგან გათავისუფლების მოლოდინში ნავთობი სულ უფრო და უფრო იაფდება. უცხოელი სპეციალისტები 2016 წლიდან "შავი ოქროს" კიდევ 10 დოლარით - 40 დოლარამდე გაიაფებას ვარაუდობენ. სანავთობო ბაზარზე ასეთი დაბალი ფასი რამდენიმე წლის განმავლობაში შენარჩუნდება. გარდა ირანული პერსპექტივისა, ნავთობის გაიაფებას ჩინეთის ეკონომიკის შესუსტებამაც შეუწყო ხელი, რომელიც ამერიკის შემდეგ ნავთობის მოხმარებით მეორე ადგილზეა.

საქართველოს ინტერნეტ-ბაზარს მონოპოლიზება ემუქრება. ერთი მხრივ "სილქნეტისა" და "კავკასუსის", მეორე მხრივ კი "მაგთიკომისა" და "კავკასუსის" შერწყმასთან დაკავშირებით კომუნიკაციების მარეგულირებელმა კომისიამ საჯარო ადმინისტრაციული წარმოება უკვე დაიწყო. იმ შემთხვევაში, თუ კომისიამ "სილქნეტის" მოთხოვნა დააკმაყოფილა, კომპანია მთლიანი ბაზრის 81%-ს მფლობელი გახდება, "მაგთიკომის" შემთხვევაში კი ეს წილი 34% იქნება.

საქართველოში მოყვანილი ხორბლის მხოლოდ 12% გამოიყენება ფქვილის საწარმოებლად. დანარჩენი საჭმელად გამოუსადეგარია. ფაქტობრივად ქვეყანას არ შესწევს ძალა, კრიზისის შემთხვევაში, (რომელიც შეიძლება უკავშირდებოდეს მსოფლიოში ხორბლის მოსავლის შემცირებას ან თუნდაც ეროვნული ვალუტის გაუფასურებას) მოკლე პერიოდში მაინც პურის ფასი ადგილობრივი ხორბლით დაარეგულიროს.

თამამად შეიძლება ითქვას, რომ ეკონომიკის სამინისტროს "სწრაფი პრივატიზაციის" პროცესი ჩაუვარდა. ლარის კურსის გასამყარებლად გასაყიდად გამოტანილი 20-ზე მეტი ობიექტიდან სამინისტრომ მხოლოდ 3-ის გაყიდვა მოახერხა. ქონების მართვის სააგენტოში კი ამბობენ, რომ ობიექტების შეფასების პროცესი და ინვეტორებთან მოლაპარაკებები ჯერ კიდევ გრძელდება.