ეროვნული ვალუტა გაუფასურებას განაგრძობს, ტურიზმის ადმინისტრაცია კი ტურისტების რეკორდულ ზრდაზე საუბრობს. ქვეყანაში ექსპორტის შემცირების ტენდენციაც იკლებს. აქედან გამომდინარე, ლარის დევალვაციის მიზეზების ძებნისას ეკონომისტები ხელს ისევ ეროვნული ბანკისკენ იშვერენ. ბოლო პერიოდში მათ მიერ არაერთხელ ისმის ფრაზა, რომ სებ-ი "კონტრშეტევაზე გადავიდა" და მის ხელთ არსებული ინსტრუმენტების მეშვეობით მიმოქცევაში ლარის მასას ზრდის, შესაბამისად, მის გაუფასურებასაც უწყობს ხელს.

თბილისთან ახლომდებარე აგარაკებზე დამსვენებლების სიმცირეზე ჩივიან. მიუხედავად იმისა, რომ მომხმარებელს დასვენება ოჯახებში ან საოჯაო ტიპის სასტუმროებში უწევს, ტარიფები წამყვანი სასტუმროების ფასს დიდად არ ჩამოუვარდება. თითქმის ყველა ტურისტულ დაბაში მომსახურება გაძვირებულია, რასაც ადგილობრივები ლარის გაუფასურებითა და ზოგადად ინფლაციით ასაბუთებენ. ამასთან, მეპატრონეები დამსვენებლებს ხშირად მთელი სეზონის საფასურის გადახდას წინასწარ ავალდებულებენ.

კვირის ბოლომდე ბენზინის ფასს მინიმუმ 5 თეთრი უნდა დააკლდეს. ბოლო 3 თვის განმავლობაში მსოფლიო ბაზარზე ნავთობი 23%-ით გაიაფდა. საქართველოში შემცირდა ნავთობპროდუქტების საბითუმო ღირებულება. ნავთობკომპანიების წარმომადგენლების განცხადებით, ფასების შემცირებაზე უკვე მსჯელობენ. ამ დროისთვის კი ნავთობიპორტიორები, საშუალოდ, 45-თეთრიანი მარჟით საქმიანობენ.

მოსახლეობის ეკონომიკური მდგომარეობის გათვალისწინებით, წიგნები ნაკლებად იყიდება, რასაც მოჰყვა ე.წ. კომპიუტერული წიგნების წინა პლანზე წამოწევა. ინფორმაციის მიღება და ელექტრონული წიგნების შეძენა მომხმარებლისთვის სულ უფრო ხელმისაწვდომია. კომპიუტერის როლის ასეთმა ზრდამ ბეჭდური გამოცემებისადმი მკითხველთა დამოკიდებულება, გარკვეულწილად, შეცვალა.

რძისა და რძის პროდუქტების ტექნიკური რეგლამენტის ამოქმედების შემდეგ სარეალიზაციო ქსელში მცენარეული "მაწონი", "არაჟანი" და "კარაქი" ისევ რჩება. ეს დარღვევები სოფლს მეურნეობის მინისტრმა ოთარ დანელიამ თავად აღმოაჩინა. აღსანიშნავია, რომ ამ შემთხვევაში, მწარმოებელთან ერთად, რეალიზატორიც ჯარიმდება.

უძრავი ქონების ბაზარზე ზაფხულისთვის დამახასიათებელი უძრაობაა. ბროკერების შეფასებით, გარდა იმისა, რომ პრობლემა სეზონურია, ბოლო პერიოდში ამ ბიზნესს ისედაც დიდი ჩავარდნა აქვს. ზაფხულის შეთავაზებების მიუხედავად, თბილისში ბინების როგორც ყიდვა-გაყიდვა, ასევე დაქირავებაც ჭირს, ხოლო გირაოზე თითქმის არ არის მოთხოვნა.

პრეზიდენტმა ვეტოს უფლება მესამედ გამოიყენა და ბანკების ზედამხედველობის შესახებ კანონი დაბლოკა. საპარლამენტო უმრავლესობაში ამბობენ, რომ მარგველაშვილმა საზოგადოებას თავი კიდევ ერთხელ შეახსენა და ვეტოს დასაძლევად ემზადებიან. "თავისუფალი დემოკრატები" კი ვეტოს დაძლევის შემთხვევაში საკონსტიტუციო სასამართლოში აპირებენ ჩივილს.

გერმანული გამოცემა "ფინანს ნახრიხტენის" ანალიტიკოსი საქართველოს საბერძნეთის ბედს უწინასწარმეტყველებს და აღნიშნავს, რომ ათენის კრიზისი "დომინოს ეფექტით" გავრცელდება. ქართველი ეკონომისტები კი ასეთ საფრთხეს ვერ ხედავენ, ვინაიდან სახელმწიფო საგარეო ვალს საგანგაშო ნიშნულამდე ჯერ არ მიუღწევია, თუმცა ქვეყანა სერიოზული პრობლემების წინაშე მაინც დგას.

დღეს სემეკი "თელასის" განაცხადს ტარიფის კორექტირებასთან დაკავშირებით წარმოებაში მიიღებს. ენერგეტიკის მინისტრმა უკვე ივარაუდა, რომ თბილისში დენი ისევე გაძვირდება, როგორც რეგიონებში. თუ ეს მოხდა, თბილისელებისთვის პირველად ისტორიაში ყველაზე ძვირი გადასახადი დაწესდება - ტარიფი უფრო დიდი იქნება, ვიდრე გაიფებამდე, ანუ წინა ხელისუფლების პერიოდში იყო.

საქართველოს სოფლის მეურნეობაში გვალვა სერიოზულ პრობლემას შექმნის. უამინდობის ხანგძლივად შენარჩუნების შემთხვევაში, მზესუმზირის, ყურძნისა და ბოსტნეულის რაოდენობა დაახლოებით 35-50 პროცენტით, ხოლო სიმინდის მოსავალი 50-60 პროცენტით შემცირდება.

საქართველოში ტურისტების ბუმია. ამ ფონზე ეროვნული ვალუტა დოლართან მიმართებაში ისევ უფასურდება. შესაბამისად, ჩნდება საშიშროება, რომ შემოდგომის მიწურულს კურსი ისევ "გაიქცევა". ეკონომიკის მინისტრი ასეთ საფრთხეს ვერ ხედავს და ლარის გაუფასურებას მსოფლიოში ნავთობის გაიაფებას აბრალებს. ეროვნული ბანკის პრეზიდენტი მიზეზად - "ეროვნული ბანკის შესახებ" კანონში შეტანილ ცვლილებებს ასახელებს. ეკონომისტთა ნაწილი ლარის უკან სვლაში სებ-ის პრეზიდენტის გიორგი ქადაგიძის ბრალეულობას ამჩნევს.

"საქართველოს ენერგეტიკას მაფიოზები მართავენ", - აცხადებენ ენერგეტიკოსები და განმარტავენ, რომ ქვეყანაში ელექტროენერგიის საფეხურეობრივი ტარიფი საერთოდ უნდა გაუქმდეს. რეალური გათვლებით კი, 1 კვტ/სთ-ს ღირებულება მაქსიმუმ 12-13 თეთრია.