საქართველოში სიგარეტი 5-20 თეთრის ფარგლებში გაძვირდება. საფასო ცვლილება ადვალურ გადასახადს უკავშირდება, რაც შემოსავლის ან ღირებულების მიმართ პროცენტულ მაჩვენებელში დაფიქსირებულ გადასახადს წარმოადგენს. ამ შემთხვევაში იგულისხმება ერთ კოლოფ სიგარეტზე 5%-ის დარიცხვა.

აზერბაიჯანის შემდეგ ტვირთებზე გადაზიდვის ტარიფს "საქართველოს რკინიგზაც" ამცირებს, თუმცა მეზობლებისაგან განსხვავებით, ჩვენთან შემცირებული ტარიფი მხოლოდ ადგილობრივ და საექსპორტო გადაზიდვაზე გავრცელდება.

რამდენიმე დღეში ელექტროენერგიის ტარიფთან დაკავშირებით სემეკის ვერდიქტი გახდება ცნობილი. მართალია, ამ შემთხვევაში კომისია თბოსადგურების ტარიფს დაადგენს, მაგრამ თუ გავითვალისწინებთ, რომ ელექტროენერგიის წარმოებაში თბოსადგურების წილი იზრდება, მათი ტარიფის შესაძლო მატება სამომხმარებლო ტარიფზეც იმოქმედებს. საქართველოში ბოლო წლებში ელექტროენერგიის მოხმარება იზრდება და დეფიციტის დაბალანსება, ძირითადად, იმპორტისა და თბოსადგურების ძვირი ელექტროენერგიის ხარჯზე ხდება.

ხუთ თვეში ქვეყნის ეკონომიკა 2,5%-ით გაიზარდა. თუკი ეს ტემპი გაგრძელდა, მთავრობა ახლადშემოთავაზებულ ეკონომიკის ზრდის პროგნოზს გადააჭარბებს. მაისში უფრო მეტი აქტიურობა აღინიშნება დღგ-ს გადამხდელ საწარმოებშიც.

სახელმწიფო ბიუჯეტს ჩინოვნიკების შრომის ანაზღაურება 1,381 მლრდ ლარი უჯდება. თუ ამას სსიპ-ებს, სახელმწიფო შპს-ებს თუ სხვა სტრუქტურებს დავუმატებთ, რომლებიც თავისი არსით საჯარო უწყებებს მიეკუთვნებიან, ეს ხარჯი 2 მლრდ ლარსაც კი გააჭარბებს.

მომხმარებელი დღემდე ბანკებისა და საფინანსო ორგანიზაციების მსხვერპლად რჩება. ეროვნულმა ბანკმა მომხმარებლის უფლებების დაცვა დღემდე ვერ უზრუნველყო. მომხმარებელს სხვადასხვა მომსახურებაზე საკმაოდ მაღალი საკომისიო გადასახადის გადახდა უწევს, რომელიც ხშირ შემთხვევაში დამალულია. ბანკებმა 2013 წელს საკომისიოებიდან და სხვა მსგავსი მომსახურებიდან 252 მილიონი ლარი მიიღეს, 2014 წელს კი - 283 მილიონი ლარი.

მსოფლიო ბაზარზე ნავთობი იაფდება, ლარის კურსიც მყარდება, მაგრამ საქართველოში ჯერ ფასის დაკლებაზე არავინ ფიქრობს. ამჟამად კომპანიები დაახლოებით 35-თეთრიანი მარჟით მუშაობენ, მაგრამ ლარის კურსისა და სააერთაშორისო ბაზრის ტენდენციებს თუ გავითვალისწინებთ, მოგების წილი დღე-დღეზე კიდევ უფრო გაიზრდება.

"ეროვნულ ბანკის შესახებ" კანონში ცვლილებების პროექტი, რომელიც საზედამხედველო სააგენტოს შექმნას ითვალისწინებს პარლამენტმა პირველი მოსმენით მიიღო. ნახევრად ცარიელ დარბაზში უმრავლესობას ოპონირებას ძირითადად ნაციონალურ მოძრაობა უწევდა.

კახეთში ალოობა დაიწყო. გლეხები მოსავლიანობას არ ემდურიან, მაგრამ ამჯერად მათი პროტესტი ხორბლის ფასმა გამოიწვია. ისინი "რეზონანსთან" საუბარში აღნიშნავენ, რომ გადამყიდველები 1 კილოგრამ ხორბალში მხოლოდ 35-38 თეთრს სთავაზობენ.

ეროვნული ბანკიდან საფინანსო ზედამხედველობის სამსახურის გამოყოფასთან დაკავშირებით პარლამენტში ისევ დიდი დაპირისპირებაა. კანონპროექტის ინიციატორები პოზიციის დათმობას არ აპირებენ, უმცირესობაში კი ამბობენ, რომ სებ-იდან ზედამხედველობის სამსახურის გამოყოფას მხარს არ დაუჭერენ. გუშინდელ სხდომაზე მათ ერთმანეთს გარეწრებიც კი უწოდეს.

დონორების წყალობით სახელმწიფო ბიუჯეტი შემცირებას გადაურჩა. ფინანსთა სამინისტრო სახელმწიფო უწყებებს მიმდინარე ხარჯს უმცირებს და ეკონომიკის გასააქტიურებლად დაზოგილ თანხას ინფრასტრუქტურულ პროექტებში გადაამისამართებს, ნაწილი კი სტიქიისგან მიყენებული ზარალის სალიკვიდაციოდ დაიხარჯება. შეიძლება ითქვას, ამ მხრივ საჭირო თანხა მთავრობას მოძიებული აქვს.

დეპუტატი ზაქარია ქუცნაშვილი 800-მდე ჩინოვნიკისთვის პრემიის მიღების შეზღუდვის ინიციატივით გამოდის. პრემიის გაცემის დარეგულირების წესი სახელმწიფომ დიდი ხანია შეიმუშავა, თუმცა პრობლემა ის არის, რომ მოხელეებმა გამოსავალი სახელფასო დანამატის სახით მოძებნეს. შესაბამისად, პრემიების მოცულობას უკვე სახელფასო დანამატების მოცულობა აჭარბებს. ამიტომაც ქუცნაშვილს თავის ინიციატივაში შესწორების შეტანა მოუწევს.