ახლად არჩეული მმართველი გუნდი აქტიურად საუბრობს საკონსტიტუციო ცვლილებების აუცილებლობაზე. მათი განცხადებით, დაგეგმილი ცვლილებები შეეხება აბსოლუტურად ყველა საკითხს, კონსტიტუციის ყველა თავს.

ზუგდიდის ბოტანიკურ ბაღში გუშინ 16 წლის მოზარდმა სიცოცხლე თვითმკვლელობით დაასრულა. ტრაგედიას რამდენიმე ადამიანი შეესწრო, მაგრამ მათ გოგონას გადარჩენა ვერ მოასწრეს.

ტელეკომპანია "რუსთავი 2"-ის წილების საქმესთან დაკავშირებით უზენაესი სასამართლო საქმის არსებით განხილვას 21 ნოემბრიდან დაიწყებს. თუმცა პროცესს მხარების წარმომადგენლები არ დაესწრებიან, რადგან უზენაესმა სასამართლომ "რუსთავი 2"-ის შუამდგომლობა არ დააკმაყოფილა და საქმეს ზეპირი მოსმენის გარეშე განიხილავს. აქედან გამომდინარე, ტელეკომპანიის წარმომადგენლები სასამართლო პროცესებს უკვე სკეპტიკურად უყურებენ და ბრძოლის ახალი ეტაპისთვის ემზადებიან.

რუსეთი სისხლის სამართლის საერთაშორისო სასამართლოდან გამოდის. ვლადიმირ პუტინმა განკარგულებას ხელი უკვე მოაწერა, რაც თბილისში შეფასდა, როგორც მოსკოვის მხრიდან 2008 წლის აგვისტოს ომის დანაშაულებებიდან თავის დაძვრენის მცდელობა, თუმცა ამ "თავის დაძვრენამ" ჰააგის გამოძიებას ერთგვარი დაბრკოლებაც შეიძლება შეუქმნას, რადგან რუსეთი აგვისტოს ომის საქმეების განხილვასა და დამნაშავეების იდენტიფიცირებაში მონაწილეობას არ მიიღებს და არც სასამართლოს გადაწვეტილებას აღასრულებს. ეს კი ნიშნავს, რომ არა თუ ვინმეს დაკავება, არამედ იმის დამტკიცებაც გაჭირდება, რუსი სამხედრო პირებიდან კონკრეტულად ვინ ჩაიდინა ესა თუ ის დანაშაული.

მინისტრ ლევან იზორიას მიერ გუშინწინ ავიაციისა და საჰაერო თავდაცვის სარდლის მოვალეობის შემსრულებლად სერგო ნინუას, ხოლო ავიაციისა და საჰაერო თავდაცვის შტაბის უფროსად გიორგი ცაბაძის დანიშვნას სამხედრო ექსპერტებისა და ანალიტიკოსების მწვავე შეფასებები და განცხადებები მოჰყვა.

"ეროვნული ფორუმის" ერთ-ერთი ლიდერი, ანი მიროტაძე აცხადებს, რომ აუცილებელია შეიქმნას ახალი ერთიანი პოლიტიკური გაერთიანება, თუმცა როგორი ფორმით მოხდება და ვინ იქნებიან ამ გაერთიანების წევრები, ამაზე საუბარი ამ ეტაპზე გაუმართლებლად მიაჩნია. ამბობს, რომ ამ საკითხზე არასაპარლამენტო ოპოზიციაში უკვე მსჯელობენ, თუმცა რა გადაწყდება საბოლოოდ, ამაზე დაზუსტებულ ინფორმაციას საზოგადოება უახლოეს მომავალში მიიღებს.

"ხან ამერიკული ტანკები რომ შემოდიოდა თბილისში ორიოდ კვირით, ხან ფინანსური დახმარებები იყო, ხან არმიის წვრთნა ტარდებოდა, ამერიკელების ფულით ნატო-ს სასწავლო ცენტრი გაიხსნა და ა.შ. ეს ყველაფერი ნელ-ნელა გაქრება," - ასე პესიმისტურად ხედავს პოლიტოლოგი სოსო ცინცაძე საქართველო-ამერიკის მომავალ ურთიერთობებს და ამბობს, რომ ილუზიები სტრატეგიულ პარტნიორობასთან დაკავშიორებით, დასრულდა.

დედაქალაქში პარკირების ერთ ადგილზე 16-17 მანქანა მოდის, რაც არა მარტო ავტომობილების რაოდენობის გაზრდამ, არამედ ავტოსადგომების ტერიტორიის უკანონო მიტაცებამ გამოიწვია - ამის შესახებ "რეზონანსთან" ტრანსპორტისა და გზების ასოციაციის ხელმძღვანელმა, დავით მესხიშვილმა განაცხადა.

საქართველოს საბანკო სექტორში ფულის გათეთრების ნიშნები აშკარაა. ჯერჯერობით სახეზეა ერთი ფაქტი, რომელიც "კაპიტალ ბანკის" საქმიანობას ეხება და მისთვის ლიცენზიის გაუქმების მიზეზი გახდა. როგორც სპეციალისტები ვარაუდობენ, საქართველოში არალეგალური ფულის მოძრაობა მხოლოდ "კაპიტალ ბანკით" არ შემოიფარგლება. ფულის გათეთრების და სხვა უკანონო მაქინაციებში შეიძლება, სწორედ ამ ტიპის ბანკები იყვნენ ჩართული. ისინი ძალიან პასიურები არიან, არ ემსახურებიან ხალხს და, ძირითადად, ფულის გატარებით არიან დაკავებული.

სახელმწიფო მოხელეები ბოლო დროს ლარის გამყარებაზე თითქმის აღარ საუბრობენ და მხოლოდ მის დასტაბილურებაზე აკეთებენ აქცენტს. ბიზნესმენები და სპეციალისტები კი ამბობენ, რომ თუკი ეროვნული ვალუტა დღევანდელ ნიშნულზე "დასტაბილურდა", ქვეყანა ეკონომიკურ კრიზისს თავს ვერ დააღწევს და ვერც მოსახლეობა ამოვა ჭაობიდან. ლარის დღევანდელ მაჩვენებელზე (2.48) შეჩერება აშფოთებთ იმპორტიორებსა და მსესხებლებს.

იმ შემთხვევაში, თუ მე-9 მოწვევის პარლამენტი და მთავრობა ახალ წლამდე არსებული ნარკოპოლიტიკის ცვლილებას არ განახორციელებს და მარიხუანას ლეგალიზაციას არ დაუშვებს, "გირჩის" წევრები 31 დეკემბერს, მარიხუანას საჯაროდ დათესავენ. თუმცა, "ქართული ოცნება" ლეგალიზაციას დაშუვებლად მიიჩნევს და აცხადებს, რომ არც პირდაპირ და არც ირიბად არ აპირებენ, ხელი შეუწყონ ამ "მავნე ჩვევას" თუ "დაავადებას".

"სოფელში პრობლემებს რა გამოლევს" , - ასე იწყებენ "რეზონანსთან" საუბარს ლაგოდეხის რაიონის სოფელ ჰერეთისკარის მკვიდრები, რომლებიც 27 წლის წინ აჭარის სტიქიას გამოექცნენ, თუმცა სტიქიასთან ბრძოლა აქაც უწევთ.