ბრიუსელში გამართულმა ევროკავშირი-საქართველოს საპარლამენტო ასოცირების კომიტეტმა მოისმინა ინფორმაცია საქართველოს მიერ აღებული ვალდებულებების შესრულების შესახებ, მიიღო განცხადება და შეიმუშავა რეკომენდაციები, მაგრამ მძაფრი დაპირისპირების თემა გახდა ვიზალიბერალიზაციის საკითხი .

პარლამენტის ვიცე-სპიკერი და მმართველი პარტია "ქართული ოცნება - დემოკრატიული საქართველოს" ერთ-ერთი ლიდერი მანანა კობახიძე "რეზონანსს" და მის ყოველკვირეულ დამატება "მთელ კვირას" საკმაოდ მძიმე ბრალდებას უყენებს, ბოდიშის მოხდას ითხოვს და წინააღმდეგ შემთხვევაში ურთიერთობის გაწყვეტით იმუქრება.

"ერთიანი ნაციონალური მოძრაობის" წევრის, ნიკა მელიას ინფორმაციით, ყოფილმა პრემიერ-მინისტრმა ბიძინა ივანიშვილმა თბილისის ბოტანიკურ ბაღს 4 ჰექტარი "წაართვა" და თავის რეზიდენციას მიუერთა. მელიას თქმით, მან ეს ინფორმაცია კონფიდენციალურად მოიპოვა, სადაც ნათლად ჩანს, რომ ქალაქის მერი დავით ნარმანია და ბოტანიკური ბაღის დირექტორი თამაზ დარჩიძე, ქალაქის ინტერესებს ერთი ადამიანის ახირებას წირავს.

"რუსთავი 2-ის" წილებთან დაკავშირებით სააპელაციო სასამართლომ განაჩენი, შესაძლოა, ორ კვირაში გამოიტანოს. ტელეკომპანიის ერთ-ერთი ადვოკატის, თამთა მურადაშვილის თქმით, სააპელაციო სასამართლო "ურთმელიძის პრაქტიკას აგრძელებს" და შესაბამისად, არ არის გამორიცხული, დასკვნითი პროცესი აღდგომის შემდეგ პირველივე კვირაში ჩაინიშნოს. არხის გენერალური დირექტორის, ნიკა გვარამიას თქმით კი, ტელევიზიას ქიბარ ხალვაშს არავითარ შემთხვევაში არ დაუთმობს და სამოქალაქო დაპირისპირებით იმუქრება.

"ქართულ პასპორტს ბევრი აიღებს, თუმცა რუსეთისა და მის მიერ დასმული აფხაზეთის ე.წ. ხელისუფლებისაგან იმ ხალხის მიმართ, ვინც ქართული პასპორტის აღებას გადაწყვეტს, ძალიან დიდი დევნა და შევიწროება იქნება," - ამბობს პოლიტოლოგი, ევროპული კვლევების ცენტრის ხელმძღვანელი კახა გოგოლაშვილი.

"ორი მთავარი გარემოებით არის დაკავებული დღეს ქართველი კაცის გული და გონება - ეს არის ვიზალიბერალიზაციის საკითხი და საარჩევნო მარათონი, რომელშიც ძალაუნებურად მთელი ქვეყანაა ჩართული. საარჩევნო პროცესი კი უფრო და უფრო მძაფრდება" - აცხადებს მწერალთა კავშირის თავმჯდომარე რევაზ მიშველაძე, რომელსაც "რეზონანსი" ქვეყანაში მიმდინარე მოვლენებზე ესაუბრა.

"ბორდიუჟას ნათქვამს აბსოლოტურად ვიზიარებ, სიტუაცია საკმაოდ სერიოზულია," - ასე აფასებს სამხედრო ანალიტიკოსი ვახტანგ მაისაია კოლექტიური უსაფრთხოების შეთანხმების ორგანიზაციის გენერალური მდივნის, ნიკოლაი ბორდიუჟას ნათქვამს იმის შესახებ, რომ მთიან ყარაბაღში ვითარების ესკალაციამ, შესაძლოა, კავკასიაში ძალიან დიდი ომი გამოიწვიოს.

დღეს მადრიდში, "ვისენტე კალდერონზე" გაიმართება ჩემპიონთა ლიგის ნახევარფინალის პირველი შეხვედრა ადგილობრივ "ატლეტიკოსა" და მიუნხენის "ბაიერნს" შორის. "ბაიერნში" ბოლო სეზონს ატარებს პეპე გვარდიოლა, რომელსაც საკმაოდ კარგი შანსი აქვს გამარჯვებულის რანგში დატოვოს მიუნხენი და ისე ჩაიბაროს "მანჩესტერ სიტი". აღსანიშნავია ისიც, რომ დიეგო სომეონე, "ატლეტიკოს" მთავარი მწვრთნელი, კატალონიელისთვის საკმაოდ ნაცნობი პერსონაა.

სატრანსპორტო კომპანია "მეტრო პლუსი" ბიზნესის გაფართოებას აპირებს და რეისებს, სამეგრელოს გარდა, სხვა რეგიონების მიმართულებითაც გეგმავს. სატრანსპორტო კომპანიაში განმარტავენ, მათ ყველა საჭირო დოკუმენტაცია წესრიგში აქვთ, მოქმედებენ კანონის ფარგლებში და ვერავინ მოედავება. ამ დროს მის წინააღმდეგ აქციები ზუგდიდში, თბილისსა და ბათუმში ზედიზედ იმართება.

ჭუბერში ნენსკრაჰესის მშენებლობა მწვავედ გააპროტესტეს. ხალხს აინეტერსებს, რა სარგებელს მიიღებენ ამ პროექტიდან მაშინ, როდესაც შეიძლება მიკროკლიმატი შეიცვალოს და მათი ცხოვრების წესიც დაირღვეს. "ნენსკრაჰესის" მშენებლობა ზაფხულში უნდა დაიწყოს და ამ ელექტროსადგურმა ქვეყნის ელექტროსისტემას 1,2 მლრდ კვტ/სთ ელექტროენერგია შემატოს.

დედაქალაქის მასშტაბით ავტომობილის გაჩერება, განსაკუთრებით დღის საათებში, პრაქტიკულად, შეუძლებელია. ქუჩები გადატვირთულია არა მარტო სახელმწიფო უწყებების შენობების მიმდებარედ, არამედ ყველგან, სადაც რაიმე დაწესებულება ან საცხოვრებელი კორპუსია. გაუვალი გზების მთავარი პრობლემა ავტომობილების რაოდენობაა. დედაქალაქში დღეს 450 ათასამდე მანქანა მოძრაობს, რაც იმას ნიშნავს, რომ ყველა მეორე ზრდასრული თბილისელი სატრანსპორტო საშუალების მფლობელია.

როგორც ნორჩ მეცნიერთა და გამომგონებელთა ოლიმპიადის პიარ-კონსულტანტმა მაიკო ჩიტაშვილმა "რეზონანსთან" საუბრისას აღნიშნა, ოლიმპიადაში 30 სხვადასხვა ქვეყნიდან 400-მდე ნორჩი გამომგონებელი მონაწილეობდა, საიდანაც ოქროს მედალი საქართველოს 20-ზე მეტმა წარმომადგენელმა აიღო.