ზამთრის კურორტები დამსვენებლის მისაღებად მზად არის. სასტუმროებში ნომრების ნახევარზე მეტი უკვე დაჯავშნილია. კერძო სექტორის წარმომადგენლები ვიზიტორების კიდევ უფრო გააქტიურებას ელიან. მიზეზად მიმდინარე მარკეტინგულ კამპანიებს და გაუმჯობესებულ ინფრასტრუქტურას ასახელებენ. რაც შეეხება ფასს, ამ კუთხით მნიშვნელოვანი ცვლილება არ მომხდარა, რაც შარშან იყო, იგივეა წელსაც, უბრალოდ, სურათს ეროვნული ვალუტის გაუფასურება ცვლის.

ენერგეტიკასა და დამამუშავებელ მრეწველობაში ინვესტიციები მცირდება. ეს ის დარგებია, რომლებზედაც უცხოური კაპიტალის მოზიდვის თვალსაზრისით, მთავრობა ყველაზე მეტ იმედს ამყარებდა. მთლიანობაში, სამ კვარტალში 1 მილიარდ დოლარზე მეტი ინვესტიცია შემოვიდა. ეს მაჩვენებელი 17%-ით ჩამორჩება შარშანდელ მაჩვენებელს და 92%-ით აღემატება შარშანწინდელს.

გუშინ ნავთობის გაიაფების 11-წლიანი ანტირეკორდი მოიხსნა. 1 ბარელი ნავთობის შეწონილმა ფასმა, ოპეკის კალათის მიხედვით, 35,3 დოლარი შეადგინა. ბოლოს "შავი ოქრო" ასეთი იაფი 2004 წელს იყო - 36,05 დოლარი. ირანის მსოფლიო ბაზარზე დაბრუნების შიშით, მენავთობეები ფასის 30 დოლარამდე დაცემას ელოდებიან.

ჩემპიონთა ლიგის ჯგუფური ეტაპის ბოლო ტურის მატჩებისას სენსაცია მოხდა "ფოლკსვაგენ არენაზე", სადაც ადგილობრივმა "ვოლფსბურგმა" "მანჩესტერ იუნაიტედი" დაამარცხა 3:2 და ლუის ვან გაალის გუნდი ჩემპიონთა ლიგის ფლეი-ოფს მიღმა დატოვა.

წელს საახალწლოდ მომხმარებელი ხარჯს მკვეთრად ამცირებს. შარშანდელთან შედარებით სადღესასწაულო ბიუჯეტი 30-35%-ით შიკვეცება. სავაჭრო ობიექტის ზოგიერთი წარმომადგენელი არ მალავს, რომ სურსათის სეგმენტში რეალიზაციის კლებაა მოსალოდნელი.

ხობის მონასტერში უკანასკნელმა არქეოლოგიურმა გათხრებმა ახალი ნაგებობები, საყოფაცხოვრებო ნივთები, მოჩუქურთმებული ქვები, ოქროსა და ვერცხლის ძაფებით ნაქარგი სამოსი და სხვა მნიშვნელოვანი სიახლეები გამოავლინა.

გუშინ ლუქსემბურგში ენერგეტიკის მინისტრმა კახა კალაძემ "გაზპრომის" ხელმძღვანელთან ალექსეი მილერთან მორიგი შეხვედრა გამართა. ოფიციალური ინფორმაციით, თემა - კომერციულ სექტორისთვის რუსული გაზის ხელმისაწვდომობა იყო. მთავრობა გაზის იმპორტის დივერსიფიცირებაში სახიფათოს ისევ ვერაფერს ხედავს. მინისტრები აცხადებენ, რომ კომერციული ობიექტებისთვის ნებისმიერი ბაზარი ღია უნდა იყოს, რათა მათ არჩევანი ფასისა და პირობების მიხედვით გააკეთონ.

თხილის ფასი თითქმის ყოველდღიურად იცვლება. წინა კვირას თხილი ერთბაშად 3 ლარით გაიაფდა, თუმცა ორ-სამ დღეში ფასმა დაახლოებით 1,50 ლარით მოიმატა. ერთ-ერთი ვერსიით, თხილის გაიაფება მოთხოვნის შემცირებას უკავშირდება. იმპორტიორების ინფორმაციით, ფასზე გავლენა ხარისხმაც მოახდინა, რადგან მოგება 30-33%-ით შეუმცირდათ.

კოსმეტოლოგია, თმის მოვლა, მანიკურ-პედიკური, პირსინგი, ტატუ - ეს და სხვა მსგავსი თავის მოვლის პროცედურები შესაძლოა კლიენტისთვის საფრთხის შემცველი აღმოჩნდეს. რესპონდენტების განმარტებით, სალონებში დაინფიცირების რისკი არსებობს, ვინაიდან ზოგიერთი შემთხვევაში ხელსაწყოები სადეზინფექციო ხსნარებით კარგად არ მუშავდება. ამიტომ იანვრიდან ჯანდაცვის სამინისტრო კოსმეტიკურ-ესთეტიკური ცენტრების სანიტარიულ-ჰიგიენურ შემოწმებას იწყებს.

თურქეთში რუსული ემბარგოსგან მოსალოდნელი ზარალი უკვე დაითვალეს. მთავრობაში ფიქრობენ, რომ ეს წლიურად 9 მლრდ დოლარი იქნება, უფრო მეტს ასახელებენ თურქი დეპუტატები და აცხადებენ, რომ ემბარგოსგან ქვეყანა წლიურად დაახლოებით 20 მლრდ-ით დაზარალდება, რაც მთლიანი მშპ-ს 3%-ს შეადგენს. მოსკოვის კვალდაკვალ სანქციების დაწესებას ანკარაც გეგმავს, თუმცა რა სახის იქნება ეს სანქციები, თურქეთის პრემიერ-მინისტრი აჰმედ დავითოღლუ ჯერჯერობით არ აკონკრეტებს.

პიარსპეციალისტი არჩილ გამზარდია პოლიტიურ დევნაზე საუბრობს და ამბობს, რომ ილიას უნივერსიტეტიდან მას განსხვავებული პოზიციისა და გადაცემა "2030"-ში მუშაობის გამო ათავისუფლებენ. უნივერსიტეტის ადმინისტრაცია, რომელიც გამზარდიასთან 9 წლის განმავლობაში თანამშრომლობდა, მომავალი სემესტრისათვის ლექტორს ხელშეკრულებას აღარ უფორმებს.

სხვადასხვა საკითხებში ფუნდამენტური განსხვავებების მიუხედავად, არის თემები, რომლის გარშემოც ერთიანები უნდა ვიყოთ და ერთ-ერთი ასეთი საკითხი ვიზალიბერალიზაციაა, - აცხადებს "თავისუფალი დემოკრატების" წევრი ვიქტორ დოლიძე. ამბობს, რომ ევროსტრუქტურებმა საქართველოს მხარდამჭერი მიმართვა შეიმუშავეს, რომელსაც მხარი "ნაციონალური მოძრაობის" გარდა ყველა საპარლამენტო პოლიტიკურმა ძალამ დაუჭირა.